ওড়িশাত ক্ষুব্ধ খেতিয়কে গৰু-ছাগলীক খুৱাইছে বিলাহী

dainik janambhumi February 12, 2025

ডিজিটেল ডেস্কঃ ওড়িশাৰ বজাৰত প্রতি কিল'গ্রাম বিলাহীৰ দাম ১০-১৫ টকা যদিও পথাৰ পৰ্যায়ত বিলাহীৰ দাম প্রতি কিল'গ্রামত ৩-৫ টকালৈ হ্রাস পোৱাত ওড়িশাৰ গঞ্জম জিলাৰ বিলাহী খেতিয়কসকল বৃহৎ লোকচানৰ সন্মুখীন হৈছে। মূল উৎপাদন ব্যয় ঘূৰাই পাবলৈ অসমর্থ হৈ কম দামতে খেতিয়কসকলে বিলাহী বিক্রী কৰিবলৈ বাধ্য হৈছে।

আনহাতে, কিছুৱে বিলাহীবোৰ গৰু-ছাগলীক খুৱাইছে। গঞ্জম ব্লকৰ সাতৰুশয় গাঁৱৰ এজন বিলাহী খেতিয়ক সুৰৰ্থ পাহানে এই সন্দৰ্ভত কয়, 'যোৱা তিনি মাহ বিলাহীৰ বাবে ইমান সময় আৰু ধন ব্যয় কৰাৰ পাছতো আমি খেতিত ব্যয় কৰা শ্ৰমিকৰ মজুৰিকে লাভ কৰিব পৰা নাই।' শুকুৰবাৰে পাহানে প্রতি কিল'গ্রামত ৩ টকাকৈ প্রায় ১৫ কুইণ্টল বিলাহী বিক্রী কৰে। পাহানে আৰু কয়, 'বেপাৰীবোৰে প্রতি কিল'গ্রামত মাত্র ২ টকাকৈ দিব বুলি কোৱাত আমাৰ অঞ্চলৰ কিছু খেতিয়কে বিলাহীৰ খেতি কৰিবলৈও এৰিলে।' মথ মুকুণ্ডপুৰৰ দয়া প্রধানে কয়, 'লাভৰ কথাটো বাদেই বীজ, সাৰ, পেষ্টিছাইড আৰু পৰিবহণত হোৱা ব্যয়েই আমি ঘূৰাই পোৱা নাই।' শত্রুসোলাৰ এজন খেতিয়কে কয় যে ইমান কম দামত বিলাহী বিক্ৰী কৰাতকৈ তেওঁ গৰু-ছাগলীক খুওৱাৰ সিদ্ধান্ত গ্রহণ কৰিলে। উল্লেখযোগ্য যে গঞ্জম ব্লক হৈছে ওড়িশাৰ অন্যতম প্রধান বিলাহী উৎপাদনকাৰী অঞ্চল।

Share This