সন্ত্ৰাসবাদীয়ে বিত্তীয় সহায় নোপোৱা হʼলে পহলগাম-কাণ্ড নহʼলহেঁতেন

dainik janambhumi June 17, 2025

ডিজিটেল ডেস্কঃ ফাইনেন্সিয়েল একশ্যন টাস্ক ফ'র্চে (এফ এ টি এফ) পহলগাম-সন্ত্রাস আক্রমণক গৰিহণা দি কয় যে বিত্তীয় সহায়ৰ অবিহনে এই আক্ৰমণ সংঘটিত কৰিব পৰা নগ'লহেঁতেন। বিশ্বৰ সন্ত্রাসবাদী কার্যকলাপ নিৰীক্ষণ কৰা সংস্থাটোৱে এটা বিবৃতিত কয় যে পহলগাম-আক্রমণ আৰু অন্যান্য শেহতীয়া আক্রমণ ধন অবিহনে আৰু সমর্থকে পুঁজি যোগান নধৰা হ'লে সংঘটিত নহ'লহেঁতেন। 

এফ এ টি এফে কয় যে সংঘটিত ঘটনাসমূহত সন্ত্রাসবাদীক পুঁজি যোগান ধৰা সন্দৰ্ভত সংস্থাটোৱে সামগ্রিক বিশ্লেষণ মুকলি কৰিব। সংস্থাটোৰ সভাপতি এলিছা ডে এণ্ডা মাড্রাজোৱে কয় যে কোনো এটা কোম্পানী, কর্তৃপক্ষ বা দেশে অকলে সন্ত্রাসবাদৰ প্রত্যাহ্বানৰ বিৰুদ্ধে যুঁজিব নোৱাৰে। তেওঁ কয় যে বিশ্বৰ সন্ত্রাসবাদ শেষ কৰিবলৈ সমগ্র বিশ্ব এক হ'ব লাগিব। উল্লেখযোগ্য যে এফ এ টি এফে সন্ত্রাস কাৰ্যক কাচিৎহে ধিক্কাৰ জনায় আৰু শেহতীয়া দশকত এয়া হৈছে তৃতীয়টো গৰিহণা। সেয়েহে, সংস্থাটোৰ এই গৰিহণাই তাৎপর্য বহন কৰিছে। 

উল্লেখযোগ্য যে যদিও পাকিস্তানে পহলগাম সন্ত্রাসবাদী আক্ৰমণত দেশখনৰ কোনো ভূমিকা থকাৰ কথা অস্বীকাৰ কৰি আহিছে, ভাৰতে এই ঘটনাৰ সৈতে পাকিস্তানস্থিত সন্ত্রাসবাদী সংগঠন লস্কৰ-এ-তৈয়বা আৰু ইয়াৰ অধীনৰ সংগঠন টি আৰ এফৰ পহলগাম আক্ৰমণৰ সৈতে সম্পৰ্কৰ কথা কৈ আছে। তদুপৰি ভাৰতত হোৱা সন্ত্রাসবাদী কার্যকলাপত পাকিস্তানৰ সহায় আৰু পুঁজি যোগানৰ বিষয়তো ভাৰতে আলোকপাত কৰিছে। পাকিস্তান এফ এ টি এফৰ গ্রে' লিষ্টত কেইবাবাৰো আছিল। প্ৰথমবাৰ ২০০৮ চনত পাকিস্তান এই তালিকাত তালিকাভুক্ত হৈছিল। কিন্তু দুবছৰৰ পাছত পাকিস্তানৰ নাম আঁতৰ কৰা হয়। পুনৰ ২০১২ চনত দেশখনৰ নাম গ্রে' লিষ্টত অন্তর্ভুক্ত হয় আৰু ২০১৫ চনত আঁতৰোৱা হয়। ২০১৮ চনতো পাকিস্তানক গ্রে' লিষ্টত অন্তর্ভুক্ত কৰা হৈছিল আৰু ২০২২ চনৰ অক্টোবৰত আঁতৰ কৰা হৈছিল।

Share This