জয় অবিহনেই অভিযান সামৰিলে পাকিস্তানে

dainik janambhumi February 28, 2025

ডিজিটেল ডেস্ক: আয়োজক পাকিস্তানে জয় অবিহনেই চেম্পিয়নছ ট্রফীত অভিযান সামৰিলে। নেৰানেপেৰা বৰষুণৰ বাবে বাংলাদেশ আৰু পাকিস্তানৰ মাজত কালিৰ খেলখন এটা বলো নপৰাকৈ পৰিত্যক্ত হয়। নিজৰ প্ৰথম দুখন খেলত জয়হীন হৈ ৰোৱাৰ বাবে ইতিমধ্যেই প্রতিযোগিতাৰ পৰা বাহিৰ হৈছিল পাকিস্তান আৰু বাংলাদেশ। আজিৰ প্ৰথমবাৰলৈ খেলখন সেয়ে গুৰুত্বহীন আছিল। ২৯ বছৰত প্ৰথমবাৰলৈ আই চি চি টুর্নামেন্ট আয়োজন কৰা পাকিস্তানে কালিৰ খেলখনত শক্তিশালী প্ৰদৰ্শন দাঙি ধৰাৰ আশা কৰিছিল। 

পিছে জয়হীনভাৱেই প্রতিযোগিতাখনত নিজৰ দুৰ্বল অভিযান সামৰে পাক বাহিনীয়ে। নেৰানেপেৰা বৰষুণৰ বাবে সূচী অনুসৰি নিৰ্দিষ্ট সময়ত আৰম্ভ হ'বলগীয়া খেলখন দুঘণ্টাৰ পাছত মেচ ৰেফাৰীয়ে পৰিত্যক্ত হোৱা বুলি ঘোষণা কৰে। ইয়াৰ ফলত দুয়োটা দলে ১ পইন্টকৈ ভগাই লয় আৰু তেনেদৰেই পাকিস্তান আৰু বাংলাদেশে প্রতিযোগিতাখনত জয়হীন হৈ অভিযান সামৰে। ইয়াৰ আগেয়ে ইয়াত হোৱা দক্ষিণ আফ্রিকা আৰু অষ্ট্ৰেলিয়াৰ মাজৰ খেল বৰষুণৰ বাবে বাতিল হৈছিল। প্রতিযোগিতাখনত নিউজিলেণ্ডৰ হাতত ৬০ ৰান আৰু ভাৰতৰ বিৰুদ্ধে ছয় উইকেটত পৰাজিত হোৱাৰ বাবে কঠোৰ সমালোচনাৰ সম্মুখীন হ'বলগীয়া হৈছে দুর্বল প্রদর্শন আগবঢ়োৱা পাকিস্তানী দলটোৱে।

Share This