পাকিস্তান বিশ্ব নিৰাপত্তাৰ প্ৰতি ভাবুকি

dainik janambhumi August 12, 2025

ডিজিটেল ডেস্কঃ পাকিস্তানৰ ফিল্ড মার্শাল জেনেৰেল আছিম মুনিৰে আমেৰিকা - ভ্ৰমণৰ সময়ত দিয়া পাৰমাণৱিক অস্ত্র ব্যৱহাৰৰ ভাবুকিত ভাৰতে তীব্ৰ প্রতিক্রিয়া প্রকাশ কৰিছে। ইয়াৰ লগতে ভাৰতে আমেৰিকাকো সমালোচনা কৰে। বিদেশ মন্ত্ৰ্যালয়ে আজি এটা বিবৃতিত কয় যে ভাৰতে এনে ধৰণৰ ভাবুকিক ভয় নকৰে। বিদেশ মন্ত্র্যালয়ে বিবৃতিটোত কয়, 'পাকিস্তানৰ সেনা প্রধানে আমেৰিকা ভ্ৰমণৰ সময়ত কৰা মন্তব্যই আমাৰ মনোযোগ আকর্ষণ কৰিছে।

পাৰমাণৱিক অস্ত্ৰৰ ভাবুকি দিয়াটো পাকিস্তানৰ পুৰণি অভ্যাস। আন্তঃৰাষ্ট্ৰীয় সম্প্রদায়ে পাকিস্তানৰ এই দায়িত্বজ্ঞানহীন মন্তব্যক গুৰুত্ব দি সিদ্ধান্তত উপনীত হ'ব পাৰে। পাকিস্তান কেৱল আঞ্চলিক নিৰাপত্তাই নহয় বিশ্বৰ সুৰক্ষাৰ প্রতিও ভাবুকি।' ভাৰত চৰকাৰে লগতে কয়, 'এখন বন্ধুত্বপূৰ্ণ ৰাষ্ট্ৰৰ ভূমিৰ পৰা এনেধৰণৰ মন্তব্য কৰাটো খেদজনক। ভাৰতে আগতেই স্পষ্ট কৰি দিছে এনেধৰণৰ পাৰমাণৱিক ব্লেকমেইলিং কেতিয়াও সহ্য নকৰে। আমি আমাৰ ৰাষ্ট্ৰীয় নিৰাপত্তাৰ বাবে প্রয়োজনীয় সকলো পদক্ষেপ গ্রহণ কৰিম।' ভাৰতে লগতে কয় যে এনে ধৰণৰ দীলি দায়িত্বজ্ঞানহীন মন্তব্যৰ পাছত বিশ্বই পাকিস্তানৰ পাৰমাণৱিক ক্ষমতাক লৈ উদ্বিগ্ন হোৱা উচিত।

উল্লেখযোগ্য যে আমেৰিকা ভ্ৰমণলৈ যোৱা জেনেৰেল মুনিৰে দম্ভালি মাৰি কৈছিল যে ভবিষ্যতে যদি ভাৰতৰ সৈতে হোৱা যুদ্ধ তেওঁৰ দেশৰ অস্তিত্বৰ প্ৰতি ভাবুকিৰ সৃষ্টি হয় তেতিয়া সমগ্র অঞ্চলটোক পাৰমাণবিক যুদ্ধৰ মাজলৈ ঠেলি দিব। মুনিৰে কৈছিল, 'আমি এখন পাৰমাণবিক অস্ত্র সম্পন্ন ৰাষ্ট্ৰ আৰু আমি আমাৰ অস্তিত্বৰ প্ৰতি সংকটৰ সৃষ্টি হোৱা বুলি অনুভৱ কৰিলে আমি আধা বিশ্বকো আমাৰ লগত ডুবাম।'

Share This