নেশ্যনেল ডিফেন্স একাডেমিৰ সমীপত উদ্ধাৰ পাকিস্তানী মুদ্ৰা 

Kakali Deka February 09, 2025

ডিজিটেল ডেস্কঃ পুনেত হঠাৎ পাকিস্তানী মুদ্ৰা পোৱাৰ ফলত সমগ্ৰ চহৰতে আলোড়নৰ সৃষ্টি হৈছে। পুনেৰ মুলশী তালুকৰ ভুকুম অঞ্চলত পাকিস্তানী মুদ্ৰাৰ নোট উদ্ধাৰ হোৱাৰ খবৰ পোহৰলৈ আহিছে। নেশ্যনেল ডিফেন্স একাডেমি (এন ডি এ) চৌহদৰ পৰা কেইমিটাৰমান দূৰত অৱস্থিত স্কাই আই মানছ লেক চিটিৰ আইৰিছ ৩ ছ’চাইটিত সংঘটিত হয় এই কাণ্ড।

ছ’চাইটিৰ অধ্যক্ষ সাহদেৱ যাদৱে যেতিয়া এই নোটখন লিফটৰ বাহিৰত পৰি থকা দেখিলে, তেতিয়া তেওঁ লগে লগে বাৱধান থানাত যোগাযোগ কৰি বিষয়টোৰ বিষয়ে অৱগত কৰে। ইয়াৰ পিছতে তেওঁ আৰক্ষীক এই বিষয়টোৰ পুংখানুপুংখ তদন্ত কৰিবলৈ আনুষ্ঠানিক আৱেদনো দাখিল কৰে।  

আৰক্ষীয়ে নোটখন পৰীক্ষা কৰি দেখিলে যে নোটখন আগতে ব্যৱহাৰ হৈছে আৰু ইয়াত একাধিকবাৰ ব্যৱহাৰ কৰাৰ চিন আছে। এতিয়া প্ৰশ্ন উত্থাপন হয় যে কাৰ পকেটৰ পৰা এই নোটখন পৰিল আৰু ভাৰতলৈ কেনেকৈ আহিল? এই ঘটনা নিৰাপত্তা সংস্থাসমূহৰ বাবে এক ডাঙৰ চিন্তাৰ বিষয় হৈ পৰিছে, কিয়নো অঞ্চলটো ৰাষ্ট্ৰীয় প্ৰতিৰক্ষা একাডেমিৰ অতি ওচৰতেই সংঘটিত এই ঘটনা ।

আৰক্ষীয়ে অঞ্চলটোত স্থাপন কৰা চি চি টিভি কেমেৰাৰ ফুটেজ স্কেন কৰি নোটখন কেনেকৈ সেই ঠাইত উদ্ধাৰ হ’ল সেই কথা জানিবলৈ আৰম্ভ কৰিছে। লগতে সমাজৰ বাসিন্দাসকলকো জেৰা কৰিছে আৰক্ষীয়ে। বৰ্তমান আৰক্ষীয়ে এই বিষয়টোক গুৰুত্ব সহকাৰে লৈ সম্ভৱপৰ সকলো কোণৰ পৰা তদন্ত অব্যাহত ৰাখিছে ৷

এই ঘটনাৰ পিছত স্থানীয় ৰাইজো চিন্তিত হৈ পৰিছে আৰু অঞ্চলটোৰ নিৰাপত্তাৰ ব্যৱস্থা কটকটীয়া কৰিবলৈ প্ৰশাসনক দাবী জনাইছে। আৰক্ষী বিষয়াসকলে কয় যে তদন্ত সম্পূৰ্ণ হোৱাৰ পিছতহে যিকোনো সিদ্ধান্তত উপনীত হ’ব পাৰিব। এতিয়া এই পাকিস্তানী মুদ্ৰাৰ নোটখন কেৱল কাৰোবাৰ অসাৱধানতাৰ ফল নে ইয়াৰ আঁৰত লুকাই আছে গভীৰ ষড়যন্ত্ৰ, সেয়া চাবলৈ আগ্ৰহী সমগ্ৰ দেশ। বিষয়টোৰ মূল কথা জানিবলৈ আৰক্ষী আৰু নিৰাপত্তা সংস্থাসমূহ সম্পূৰ্ণৰূপে নিয়োজিত হৈ পৰিছে।

(উৎস, প্ৰাগ নিউজ ডিজিটেল)

Share This