গুৱাহাটীত মহিলা বিশ্ব কাপৰ উদ্বোধনী অনুষ্ঠানত নাথাকে পাকিস্তান

dainik janambhumi September 07, 2025

ডিজিটেল ডেস্কঃ আন্তঃৰাষ্ট্রীয় ক্রিকেট পৰিষদৰ (আই চি চি) মহিলা বিশ্ব কাপৰ উদ্বোধনী অনুষ্ঠান ৩০ ছেপ্টেম্বৰত গুৱাহাটীত অনুষ্ঠিত হ'ব। উদ্বোধনী অনুষ্ঠানত শ্রেয়া ঘোষালে অনুষ্ঠান পৰিৱেশন কৰিব। মহিলা ক্রিকেট বিশ্ব কাপৰ ভাৰত আৰু শ্রীলংকাই যুটীয়াভাৱে আয়োজন কৰিছে। 

ইফালে গুৱাহাটী বর্ষাপাৰা ষ্টেডিয়ামত অনুষ্ঠিত হ'বলগীয়া বিশ্ব কাপৰ উদ্বোধনী অনুষ্ঠানত উপস্থিত নাথাকে পাকিস্তান। উল্লেখযোগ্য যে ডিচেম্বৰত অনুষ্ঠিত হোৱা আই চি চিৰ বৈঠকত এই বুলি সিদ্ধান্ত লোৱা হৈছিল যে বহু ৰাষ্ট্ৰীয় ক্ৰিকেট প্রতিযোগিতাৰ ক্ষেত্ৰত ভাৰত আৰু পাকিস্তানে ২০২৭ চনলৈকে ইখনে সিখন দেশলৈ গৈ ক্রিকেট নেখেলে আৰু দুয়োখন দেশৰ মেচ নিৰপেক্ষ দেশত অনুষ্ঠিত হ'ব। 

সেয়েহে পাকিস্তানী মহিলা ক্রিকেট দলটোৱে বিশ্ব কাপতো ভাৰতত নেখেলে। পাকিস্তানী মহিলা দলটোৰ বিশ্ব কাপৰ সকলো খেল শ্রীলংকাত অনুষ্ঠিত হ'ব। পাকিস্তানী মহিলা ক্রিকেট দলটোৱে ভাৰতত নেখেলাৰ লগতে প্রতিযোগিতাৰ উদ্বোধনী অনুষ্ঠানতো উপস্থিত নাথাকে। ভাৰতীয় ক্রিকেট নিয়ন্ত্রণ ব'ৰ্ড আৰু পাকিস্তান ক্রিকেট ব'ৰ্ডৰ মাজত হোৱা বুজাবুজি অনুসৰি পাকিস্তানে প্রতিযোগিতাত বাংলাদেশ, ইংলেণ্ড, নিউজিলেণ্ড, দক্ষিণ আফ্রিকা আৰু শ্রীলংকাৰ বিৰুদ্ধে মেচসমূহ শ্রীলংকাত খেলিব। 

উল্লেখযোগ্য যে পহলগামত সন্ত্রাসবাদীয়ে কৰা আক্ৰমণৰ পাছত ভাৰতে পাকিস্তানৰ সৈতে সকলো সম্পর্ক ছেদ কৰে। আনহাতে ক্রীড়া মন্ত্র্যালয়ে অলপতে কৰা ঘোষণা কৰা নীতি অনুসৰি ভাৰত আৰু পাকিস্তানে বহু পাক্ষিক প্রতিযোগিতাত খেলিব যদিও দুয়োখন দেশে পৰস্পৰৰ বিৰুদ্ধে দ্বিপাক্ষিক প্রতিযোগিতাত নেখেলে। ইফালে মহিলা বিশ্ব কাপত আয়োজক ভাৰতীয় দলটোৰ প্ৰতি আস্থা প্রকাশ কৰিছে বি চি চি আইৰ সচিব দেৱজিৎ শইকীয়াই। তেওঁ কয় যে ভাৰতীয় দলটোৱে যোৱা দুবছৰে সুন্দৰ প্ৰদৰ্শন কৰি আহিছে। শেহতীয়াকৈ ইংলেণ্ডৰ বিৰুদ্ধে শৃংখলাত ভাৰতীয় মহিলা দলটোৱে শক্তিশালী প্রদর্শন কৰে। শইকীয়াই কয় যে ভাৰতীয় দলৰ খেলুৱৈসকলে বিশাখাপট্টনমত অনুশীলন কৰি আছে আৰু যোৱা ৬-৭ মাহে প্রস্তুতিত সম্পূৰ্ণৰূপে মনোযোগ দিছে। 

ইফালে মহিলা বিশ্বকাপৰ প্ৰতি জনসাধাৰণক অধিক আকৰ্ষিত কৰাৰ লক্ষ্যৰে এক বিশেষ পদক্ষেপ গ্রহণ কৰিছে। প্রতিযোগিতাৰ প্ৰতিখন মেচৰ টিকটৰ দাম ১০০টকা নির্ধাৰণ কৰা হৈছে। শইকীয়াই কয় যে ইয়াৰ উদ্দেশ্য হ'ল যাতে মহিলা ক্রিকেটক অধিক জনপ্রিয় কৰিব পাৰি আৰু দর্শকেৰে পূৰ্ণ হৈ থকা ষ্টেডিয়ামত যাতে খেলুৱৈসকলে খেলিব পাৰে। 

ইফালে কালি নিশাৰ পৰা মহিলা বিশ্ব কাপৰ মেচৰ আগতীয়া টিকটৰ বুকিং কালি  সন্ধিয়া সাত বজাৰ পৰা আৰম্ভ হৈছে। ক্রিকেট প্রেমীসকলে গ্রুপ পৰ্যায়ৰ মেচৰ বাবে টিকট অহা চাৰি দিনলৈ আগতীয়াকৈ বুকিং কৰিব পাৰিব। ক্রিকেট প্রেমীসকলে ভাৰত আৰু শ্রীলংকাত আনুষ্ঠিত হ'বলগীয়া বিশ্ব কাপৰ মেচ চোৱাৰ বাবে গুগল পে'ৰ জৰিয়তে tickets.cricketworldcup.com.ৰ পৰা টিকট বুক কৰিব পাৰিব। 

অহা ৯ ছেপ্টেম্বৰৰ নিশা ৮ বজাৰ পৰা সকলো ক্রিকেট প্রেমীৰ টিকট বিক্ৰী মুকলি কৰি দিয়া হ'ব। উল্লেখযোগ্য যে এইবাৰৰ বিশ্ব কাপৰ টিকটৰ ন্যূনতম মূল্য ১০০ টকা হ'ল আই চি চিৰ ইতিহাসত কোনো এখন প্রতিযোগিতাৰ সৰ্বকালৰ সৰ্বনিম্ন মূল্য। ভাৰতত মহিলা বিশ্ব কাপ ১২ বছৰৰ পাছত অনুষ্ঠিত হ'ব।

Share This