১৭ বছৰ ধৰি কাৰাগাৰত থকা পাকিস্তানী কয়দীক মুকলি

Kakali Deka February 06, 2025

ডিজিটেল ডেস্কঃ ১৭ বছৰ যাৱজ্জীৱন কাৰাদণ্ড ভুগি উত্তৰ প্ৰদেশৰ গোৰখপুৰ কাৰাগাৰৰ পৰা মুক্তি লাভ কৰে পাকিস্তানী কয়দী মাছৰুফে। তেওঁক আৰক্ষীৰ জিম্মাত দিল্লীস্থিত পাকিস্তান দূতাৱাসলৈ প্ৰেৰণ কৰা হৈছে। য’ৰ পৰা তেওঁক পঞ্জাবৰ আটাৰী সীমান্তৰে পাকিস্তানলৈ প্ৰেৰণ কৰা হ’ব। চোৰাংচোৱাগিৰিৰ অভিযোগত ২০০৮ চনত বাহৰেইচৰ পৰা গ্ৰেপ্তাৰ কৰা হৈছিল মাছৰুফক।

৫ ফেব্ৰুৱাৰী, বুধবাৰে গোৰখপুৰৰ সংমণ্ডল কাৰাগাৰৰ পৰা মুকলি কৰি দিয়া হয় পাকিস্তানী কয়দী মাছৰুফ ওৰফে গুড্ডুক। তেওঁক আৰক্ষীৰ জিম্মাত দিল্লীলৈ লৈ যোৱা হৈছে। পাকিস্তানৰ বাসিন্দা মাছৰুফক দিল্লীত থকা পাকিস্তানৰ দূতাৱাসক গতাই দিয়া হ’ব। ইয়াৰ পৰা আনুষ্ঠানিকতা সম্পূর্ণ কৰি পঞ্জাবৰ আটাৰী সীমান্তৰে পাকিস্তানলৈ পঠিওৱা হ’ব তেওঁক৷

মাছৰুফৰ বিৰুদ্ধে ৰুজু হৈছিল দেশদ্ৰোহ আৰু জালিয়াতিৰ গোচৰ

২০০৮ চনত বাহৰেইচ আৰক্ষীয়ে চোৰাংচোৱাগিৰি, দেশদ্ৰোহ, জালিয়াতি আৰু ষড়যন্ত্ৰৰ অভিযোগত গ্ৰেপ্তাৰ কৰিছিল মাছৰুফক। কাৰণ নিৰাপত্তা সংস্থাই সন্দেহ কৰিছিল যে তেওঁ ভাৰতৰ সন্ত্ৰাসবাদী সংগঠনৰ বাবে তথ্য সংগ্ৰহ কৰি আছে। তদন্তৰ অন্তত তেওঁৰ বিৰুদ্ধে দেশদ্ৰোহ আৰু চোৰাংচোৱাগিৰিৰ গোচৰ ৰুজু কৰা হয়। ২০১৩ চনত আদালতে তেওঁক যাৱজ্জীৱন কাৰাদণ্ডৰ শাস্তি বিহিছিল।

ভাৰতৰ গৃহ মন্ত্ৰ্যালয়ৰ নিৰ্দেশত মাছৰুফৰ মুক্তিৰ প্ৰক্ৰিয়া সম্পূৰ্ণ হৈছিল। জিলা কাৰাগাৰ আৰক্ষী আৰু নিৰাপত্তা সংস্থাৰ তত্ত্বাৱধানত গোৰখপুৰৰ পৰা দিল্লীস্থিত পাকিস্তানী দূতাৱাসলৈ প্ৰেৰণ কৰা হয়। তাৰ পৰা আইনী পদ্ধতি সম্পূর্ণ কৰি অহা ৭ ফেব্ৰুৱাৰীত তেওঁক আটৰী সীমান্তলৈ লৈ যোৱা হ’ব৷ য'ত তেওঁৰ নথি-পত্ৰ পৰীক্ষা কৰা হ'ব। তাৰ পাছত পাকিস্তানী কৰ্তৃপক্ষক গতাই দিয়া হ’ব। ২০১৫ চনত মাছৰুফক বাৰাণসী কেন্দ্ৰীয় কাৰাগাৰলৈ বদলি কৰা হৈছিল।

তেওঁ তাত থকা বন্দীসকলক উচটনি দি বিদ্ৰোহ আৰম্ভ কৰিবলৈ চেষ্টা কৰিছিল। ইয়াৰ পাছত ২০১৯ চনত চৰকাৰৰ নিৰ্দেশত তেওঁক গোৰখপুৰ জে'ললৈ আনি উচ্চ নিৰাপত্তাৰক্ষীৰ বেৰেকত ৰখা হয়। ইয়াতেই তেওঁ আজীৱন কাৰাদণ্ডৰ শাস্তি সম্পূৰ্ণ কৰিলে। আইনী আনুষ্ঠানিকতা সম্পূৰ্ণ হোৱাৰ পাছত ভাৰত চৰকাৰে তেওঁক মুকলি কৰি দিয়াৰ সিদ্ধান্ত লয়।

গোৰখপুৰ জে'লৰ অধীক্ষক দিলীপ পাণ্ডেই কয় যে পাকিস্তানী কয়দীজনে আজীৱন কাৰাদণ্ড সম্পূৰ্ণ কৰিছে। তেওঁক আৰক্ষীৰ জিম্মাত দিল্লীস্থিত পাকিস্তানী দূতাৱাসলৈ প্ৰেৰণ কৰা হৈছে। এই সন্দৰ্ভত গোৰখপুৰ জিলা প্ৰশাসনে পাকিস্তানৰ দূতাৱাসক অৱগত কৰিছে। বুধবাৰে পুৱা ৯-৩০ বজাত গোৰখপুৰ জে'লৰ পৰা দিল্লীলৈ প্ৰেৰণ কৰে। য’ৰ পৰা তেওঁক ৭ ফেব্ৰুৱাৰীত আটাৰী সীমান্তত পাকিস্তানী বিষয়াৰ হাতত গতাই দিয়া হ’ব। ২০০৮ চনৰ পৰা ভাৰতীয় কাৰাগাৰত প্ৰায় ১৭ বছৰ কটাবলগীয়া হোৱাৰ পাছত এতিয়া মহম্মদ মাছৰুফে নিজৰ গৃহভূমি পাকিস্তানলৈ উভতি যাব।

উৎসঃ- প্ৰাগ নিউজ ডিজিটেল

চুমি, বিশাল, দীপাংকৰৰ কেলেংকাৰিৰ নতুন তথ্য ফাদিল