সমুদ্ৰৰ ওপৰেৰে পুনৰ ৰে'ল চলাচলৰ বাবে সাজু ভাৰতীয় ৰে'ল বিভাগ

Dainik janambhumi February 05, 2025

ডিজিটেল ডেস্ক: সমুদ্ৰৰ ওপৰৰে ৰে'লযাত্ৰাৰ অবিস্মৰণীয় অভিজ্ঞতা। এখন অত্যাধুনিক নতুন দলঙেৰে ৰে'লযাত্রীক পুনৰ সেই ৰোমাঞ্চকৰ অভিজ্ঞতা প্রদানৰ বাবে সাজু হৈছে ভাৰতীয় ৰে'ল বিভাগ। তামিলনাডুৰ মূল ভূ-খণ্ডৰ সৈতে ৰামেশ্বৰমক সংযোগ কৰি বংগোপসাগৰৰ ওপৰত সাজু হৈ উঠিছে নতুনকৈ নিৰ্মাণ কৰা পামবন ৰে'ল দলং। দলংখনৰ তলেৰে বিশাল জাহাজ পাৰ হৈ যাব পৰাকৈ 'ভাৰ্টিকেল লিফট'ৰ ব্যৱস্থা কৰা হৈছে। কেৱল ভাৰততে নহয়, এছিয়াৰ ভিতৰতে প্রথমবাৰলৈ এই দলংখনত সংযোজিত হৈছে 'ভার্টিকেল লিফট'। চলিত মাহৰ ভিতৰতে প্রধানমন্ত্রী নৰেন্দ্ৰ মোদীয়ে নতুন পামবন দলং মুকলি কৰি ৰামেশ্বৰমলৈ পুনৰ ৰে'লযাত্ৰাৰ ফ্লেগ অফ কৰাৰ সম্ভাৱনা আছে। দলংখনৰ ওপৰেৰে ইতিমধ্যে দুবাৰকৈ পৰীক্ষামূলক ৰে'ল চলাচল সম্পন্ন কৰা হৈছে আৰু নতুন দলংখনৰ সুৰক্ষামূলক দিশটো পৰীক্ষা কৰিছে মাদ্রাজ আৰু বোম্বে আই আই টিয়ে।

উল্লেখ্য যে তামিলনাডুৰ দক্ষিণ প্ৰান্তৰ মন্দপমৰ সৈতে পামবন দ্বীপত অৱস্থিত ৰামেশ্বৰমক সংযোগ কৰি বংগোপসাগৰৰ বুকুত ১৯১৪ চনতে নির্মাণ হৈছিল ৰে'ল দলং। শ্রীলংকাৰ সৈতে ব্যাৱসায়িক সম্পর্ক বৃদ্ধি কৰাৰ লক্ষ্যৰে ব্ৰিটিছ প্রশাসনে এই দলংখন নিৰ্মাণ কৰাৰ সিদ্ধান্ত লৈছিল। পামবন দলঙেই আছিল ভাৰতত সাগৰৰ বুকুত নিৰ্মাণ কৰা প্ৰথমখন দলং। কেইবাবাৰো সামুদ্রিক ধুমুহাই ক্ষতিগ্রস্ত কৰিলেও এটা শতিকাজুৰি এই পামবন দলঙেৰে ৰামেশ্বৰমলৈ অব্যাহত আছিল ৰে'ল যাতায়াত। ১৯৮৮ চনত বংগোপসাগৰৰ ওপৰেৰে ৰামেশ্বৰমক স্থলপথেৰে সংযোগ কৰি নিৰ্মাণ কৰা হয় এখন পথ সেতু। পুৰণি ৰে'ল দলংখন ক্রমাৎ দুর্বল হৈ অহাত উক্ত দলংখনৰ সমান্তৰালভাৱে নতুন এখন ৰে'ল দলং নিৰ্মাণৰ সিদ্ধান্ত লোৱা হয়। ২০১৯ চনৰ নৱেম্বৰ মাহত নতুন দলংখনৰ আধাৰশিলা স্থাপন কৰিছিল প্ৰধানমন্ত্ৰী নৰেন্দ্ৰ মোদীয়ে। সুৰক্ষাজনিত কাৰণত ২০২২ চনৰ পৰা পুৰণি ৰে'ল দলংখনেৰে ৰে'ল চলাচল বন্ধ কৰা হয় আৰু তেতিয়াৰ পৰাই ৰামেশ্বৰমলৈ বন্ধ হৈ আছে ৰে'লৰ যাতায়াত। কভিড পৰিস্থিতিয়ে নতুন দলংখনৰ নিৰ্মাণৰ কাম বাধাগ্রস্ত কৰিলেও ৰে'ল বিভাগে যথেষ্ট কম সময়ৰ ভিতৰতে দলংখনৰ নিৰ্মাণ সম্পূৰ্ণ কৰি তুলিছে। ২.১০ কিল'মিটাৰ দৈৰ্ঘ্যৰ দলংখন নির্মাণত ব্যয় হৈছে ৫৩১ কোটি টকা। মুঠ ১০১ টা খুঁটা থকা ৰে'ল দলংখন সম্পূৰ্ণৰূপে দেশীয় ষ্টীলেৰে নিৰ্মাণ কৰা হৈছে। এটা ৰে'লপথেৰে দলংখন নিৰ্মাণ কৰা হ'লেও ভৱিষ্যতলৈ দ্বৈত ৰে'লপথলৈ সম্প্ৰসাৰিত কৰাৰ সুবিধা ৰাখি খুঁটাসমূহৰ ব্যৱস্থা কৰা হৈছে।

নতুন পামবন দলঙৰ মূল বিশেষত্ব হ'ল তলেৰে জাহাজ পাৰ হ'ব পৰাকৈ 'ভার্টিকেল লিফট'ৰ ব্যৱহাৰ। জাহাজ পাৰ হোৱাৰ সময়ত দলংখনৰ এটা অংশ ওপৰেৰে উঠি যাব আৰু তলেৰে অনায়াসে জাহাজ পাৰ হ'ব পাৰিব। পুৰণি ৰে'ল দলংখনতো উক্ত সুবিধা আছিল যদিও দলংখনৰ মাজভাগৰ দুটা অংশ ওপৰলৈ তুলি দিয়া হৈছিল, যিটো কামৰ বাবে প্রায় ২৪ মিনিট সময়ৰ প্ৰয়োজন হৈছিল। নতুন ৰে'ল দলংখনত সংযোজিত 'ভার্টিকেল লিফট'খন স্বয়ংক্রিয়ভাৱে ওপৰলৈ উঠিবলৈ ৫ মিনিটতকৈও কম সময়ৰ প্ৰয়োজন হ'ব। উল্লেখ্য যে ভাৰতৰ অন্যতম পৱিত্ৰ তীর্থস্থান হিচাপে গণ্য কৰা ৰামেশ্বৰমৰ ৰামনাথস্বামী মন্দিৰলৈ প্রতিদিনে অলেখ দর্শনার্থীৰ সমাগম ঘটে। পুৰী, দ্বাৰকা, বদ্রীনাথৰ লগতে ৰামেশ্বৰমক ভাৰতৰ চাৰি ধামৰ অন্যতম হিচাপে গণ্য কৰা হয় আৰু  ৰামনাথস্বামী মন্দিৰ ভাৰতৰ ১২টা জ্যোতির্লিংগ মন্দিৰৰ অন্যতম হিচাপে না বিবেচিত হৈ আহিছে। ৰামায়ণৰ কাহিনীৰ সৈতে সম্পর্কিত ৰামেশ্বৰম যুগ  যুগ ধৰি ধৰ্মীয় দৃষ্টিকোণেৰে গুৰুত্বপূৰ্ণ পীঠস্থান হিচাপে বিবেচিত হৈ আহিছে। সমুদ্ৰৰ মাজত অৱস্থিত ৰামেশ্বৰমৰ অপৰূপ প্রাকৃতিক শোভাৰ বাবেও অলেখ পৰ্যটকৰ আগমন ঘটে। ৰামেশ্বৰম দ্বীপ বা পামবান দ্বীপত অৱস্থিত ধনুশকোড়ি  পৰ্যটকৰ অন্য এক আকৰ্ষণথলী। 

এই ধনুশকোড়িতে শেষ হৈছে ভাৰত ভূখণ্ডৰ পথ আৰু তাৰ পৰাই সীতাক উদ্ধাৰৰ বাবে শ্রীলংকালৈ ৰামসেতু নিৰ্মাণ কৰা হৈছিল বুলি লোকবিশ্বাস প্রচলিত হৈ আহিছে। ধনুশকোড়িত লগ লাগিছে ভাৰত মহাসাগৰ আৰু বংগোপসাগৰ, দুখন সাগৰৰ মাজেৰে কৰা দীর্ঘ পথযাত্রা যিকোনো পৰ্যটকৰ বাবেই হ'ব পাৰে এক চিৰস্মৰণীয় অভিজ্ঞতা। তদুপৰি ৰামেশ্বৰমত আছে ৰাম আৰু ৰামায়ণৰ কাহিনীৰ সৈতে বিজড়িত অন্য অনেক মঠ-মন্দিৰ। এনেক্ষেত্ৰত ৰামেশ্বৰমলৈ পৰ্যটক আৰু দৰ্শনাৰ্থীৰ যাত্ৰা সুচল কৰি তোলাত নতুনকৈ নির্মিত পামবন ৰে'ল দলঙে নিঃসন্দেহে বিশেষ ভূমিকা গ্ৰহণ কৰিব। নতুন দলংখন মুকলি হোৱাৰ পিছতে ৰামেশ্বৰমলৈ পুনৰ ৰে'লৰ যাতায়াত আৰম্ভ হ'লে পৰ্যটকৰ আগমন অধিক বৃদ্ধি পাব বুলি আশা কৰা হৈছে। মঙলবাৰে দেশৰ বিভিন্ন প্ৰান্তৰ পৰা অহা সাংবাদিকৰ উপস্থিতিত নতুন দলংখনৰ বিশেষত্ব ব্যাখ্যা কৰে দলংখন নিৰ্মাণৰ দায়িত্বত থকা ৰে'ল বিকাশ নিগম লিমিটেডৰ জ্যেষ্ঠ উপ মহাপ্রবন্ধক এছ শ্রীনিবাসনে। এই দলংখন ভাৰতীয় ৰে'ল বিভাগৰ অভিযান্ত্রিক দক্ষতাৰ এক অপূর্ব নিদর্শন হিচাপে বিবেচিত হ'ব বুলিয়েই ধাৰণা কৰা হৈছে। প্রসংগত উল্লেখ্য যে ব্ৰিটিছৰ দিনতে নিৰ্মিত অসমৰ দিখৌ দলঙৰ তলেৰে জাহাজ পাৰ হ'ব পৰাকৈ দলঙৰ এটা মূৰ ওপৰলৈ উঠাই দিয়াৰ ব্যৱস্থা কৰা হৈছিল। প্ৰায় অনুৰূপ প্রযুক্তি ব্যৱহাৰ কৰা হৈছিল ১৯১৪ চনত মুকলি হোৱা পামবন ৰে'ল দলঙত। নতুনকৈ নিৰ্মাণ হোৱা ৰে'ল দলংখনত 'ভার্টিকেল লিফট' ব্যৱহাৰ কৰি প্ৰযুক্তিগত উত্তৰণৰ এক অনন্য নিদর্শন দাঙি ধৰিছে ভাৰতীয় ৰে'লৱেই। উল্লেখ্য যে নতুন ৰে'ল দলংখন মুকলি হোৱাৰ পিছতে ভাঙি পেলোৱা হ'ব শতিকাজোৰা ইতিহাসৰ সাক্ষী পুৰণি ৰে'ল দলংখন।

Share This