মেট্ৰিক-উচ্ছতৰ মাধ্যমিক পৰীক্ষা শেষ হোৱালৈকে পিছুৱাব পঞ্চায়ত নিৰ্বাচন !

Dainik Janambhumi January 11, 2025

‘অনিশ্চয়তাৰ মাজত সোমাই পৰিছে ৰাজ্যৰ পঞ্চায়ত নিৰ্বাচন৷ আজি নিশা ১২ বজাৰ ভিতৰত যদি উচ্ছ ন্যায়ালয়ে পঞ্চায়ত নিবাৰ্চনৰ সন্দৰ্ভত ৰায় নিদিয়ে, তেনেহ’লে মেট্ৰিক বা উচ্ছ মাধ্যমিকৰ চূড়ান্ত পৰীক্ষাৰ পাছতহে পঞ্চায়ত নিৰ্বাচন অনুষ্ঠিত হ’ব৷’ আজি জনতা ভৱনত অনুষ্ঠিত এখন সংবাদমেলত এই কথা প্ৰকাশ কৰিছে মুখ্যমন্ত্ৰী ড॰ হিমন্ত বিশ্ব শৰ্মাই৷ তেওঁ কয়, ‘পঞ্চায়ত নিৰ্বাচনৰ দিন ঘোষণা কৰাৰ পাছত অনুষ্ঠিত কৰালৈকে এটা মাহৰ সময় লাগিব৷ কিন্তু এতিয়ালৈকে ন্যায়ালয়ে ৰায় প্ৰদান কৰা নাই৷

এনে পৰিস্থিতিত আমি সমস্যাত পৰিছোঁ৷ কিয়নো অহা ১৪ ফেব্ৰুৱাৰীৰ পৰা মেট্ৰিক আৰু হায়াৰ ছেকেণ্ডাৰী পৰীক্ষা অনুষ্ঠিত হ’ব৷’ ইফালে উচ্ছ ন্যায়ালয়ে পঞ্চায়ত নিৰ্বাচনৰ সন্দৰ্ভত আজিও ৰায় প্ৰদান নকৰাত উদ্বিগ্নতা ব্যক্ত কৰি তেওঁ কয়, ‘উক্ত ৰায়টোৰ বাবে আজিৰ কেবিনেট দিনৰ দুই বজাৰ পৰা প্ৰায় তিনি ঘণ্টা ধৰি অপেক্ষা কৰি আছিল৷ কিন্তু ৰায়টো নাহিল৷ সাধাৰণতে বিধানসভাৰ নিৰ্বাচনৰ পূৰ্বে কোনো ৰাজ্য চৰকাৰে নিৰ্বাচন পাতিব নোখোজে৷ কিন্তু আমি পঞ্চায়ত  নিৰ্বাচন অনুষ্ঠিত কৰিবলৈ ৰৈ আছোঁ৷ এনে পৰিস্থিতিত আজি ১২ বজাৰ আগতে আমি ৰায়টো যদি লাভ নকৰোঁ, তেনেহ’লে পঞ্চায়ত নিৰ্বাচন মেট্ৰিক বা হায়াৰ ছেকেণ্ডাৰী পৰীক্ষাৰ পাছতহে অনুষ্ঠিত কৰিব পৰা যাব৷

আনহাতে কাইলৈ বা পৰহিলৈকে যদি ৰায়টে.া ওলায়, তেনেহ’লেও পঞ্চায়ত নিৰ্বাচন পৰীক্ষাৰ পূৰ্বে পতাটো অসম্ভৱ হৈ পৰিব বুলি মত প্ৰকাশ কৰি ড॰ শৰ্মাই লগতে কয় যে যোৱা তিনি দিন ধৰি চৰকাৰখন ৰায়টোৰ বাবে ৰৈ আছে৷ ইফালে উচ্ছ ন্যায়ালয়ৰ বিচাৰাধীন গোচৰটো কৰিমগঞ্জ জিলাৰ ১৯খন পঞ্চায়তক লৈ হৈছে বুলি অৱগত কৰি তেওঁ কয়, ‘কৰিমগঞ্জ জিলাক বাদ দিও আমি পঞ্চায়ত নিৰ্বাচন পাতিব পাৰিলোঁহেঁতেন৷ এই কথা আমি ন্যায়ালয়কো অৱগত কৰিছোঁ৷’ ইফালে  নিৰ্বাচন পিছুওৱাৰ বাবে কংগ্ৰেছ লাগি আছে বুলি মত প্ৰকাশ কৰি তেওঁ লগতে কয় যে যোৱা লোক সভাৰ নিৰ্বাচনত কৰিমগঞ্জৰ কংগ্ৰেছৰ প্ৰাথ¹ হাফিজ ৰচিদ চৌধুৰী গোচৰটোৰ সৈতে জড়িত হৈ আছে৷

তেওঁক সহায় কৰিছে  কংগ্ৰেছৰ দিনত উচ্ছতম ন্যায়ালয়ৰ চৰকাৰী পক্ষৰ অধিবক্তা এগৰাকীয়ে৷ তেওঁলোকে পঞ্চায়ত নিৰ্বাচন খেলাৰ বাবে সাহস কৰিব পৰা নাই৷ প্ৰকৃততে বিৰোধীয়ে পঞ্চায়ত নিৰ্বাচন খেলি শাসক পক্ষত বিপদত পেলাব লাগিছিল৷ কিন্তু তেওঁলোকে ভয়তে নিৰ্বাচনটো পিছুৱাই আছে৷ ইফালে নিৰ্বাচন পিছুৱাই গ’লে পাছত বানপানীৰ কথাও আহিব বুলি জনাই মুখ্যমন্ত্ৰীয়ে কয় যে ৰায়টোৰ ওপৰতে সকলো কথা নিৰ্ভৰ কৰিব৷ ৰায়টো যদি আমাৰ পক্ষত আহে, তেনেহ’লে কোনো কথা নাই৷ যদি নাহে তেনেহ’লে আমি আকৌ আপীল কৰিব লাগিব৷ উচ্ছতম ন্যায়ালয়লৈ যাব লাগিব৷

Share This