মুখ্যমন্ত্ৰীৰ মূৰত চুলি গজোৱা ঔষধ লগাবলৈ সাজু পংকজ পাঠক

dainik janambhumi August 04, 2025

ডিজিটেল ডেস্কঃ এইবাৰ মুখ্যমন্ত্ৰী ড° হিমন্ত বিশ্ব শৰ্মাৰ মূৰত চুলি গজাবলৈ সাজু হৈছে আচার্য পংকজ পাঠক। আয়ুর্বেদিক ঔষধৰ সমান্তৰালকৈ তপা মূৰত চুলি গজোৱা ঔষধৰ বাবে আচার্য পংকজ পাঠকে ঘূৰি ফুৰিছে ৰাজ্যৰ উজনিৰ পৰা নামনিলৈ। 

দেওবাৰে নলবাৰীৰ ঐতিহ্যমণ্ডিত শ্রী শ্রী হৰি মন্দিৰত পংকজ পাঠকে তপামূৰীয়া লোকসকলৰ বাবে এটা শিবিৰ অনুষ্ঠিত কৰে। এই শিবিৰত তপামূৰীয়া লোকৰ যথেষ্ট ভিৰ হোৱা পৰিলক্ষিত হয়। উক্ত শিবিৰত পাঠকে কয় যে যদি মুখ্যমন্ত্রী ড° হিমন্ত বিশ্ব শর্মাই তেওঁক চুলি গজোৱা ঔষধ ল'বলৈ মাতে, তেন্তে তেওঁ যাবলৈ সাজু আছে। অর্থাৎ মুখ্যমন্ত্রী ড° হিমন্ত বিশ্ব শৰ্মাৰ মূৰত ঔষধ লগাবলৈ সাজু আচার্য পংকজ পাঠক। 

আনহাতে সাংবাদিকে কৰা প্ৰশ্নত পংকজ পাঠকে কয় যে যদি পাঠকে মূৰত চুলি গজা তেল তৈয়াৰ কৰিছে তেন্তে তেনে ঔষধৰ বাবে নোবেল বঁটা পাব লাগে বুলি মুখ্যমন্ত্ৰীয়ে কোৱা কথাৰ বাবে তেওঁ অধিক উৎসাহ পাইছে। অৱশ্যে পাঠকৰ মূৰত চুলি গজা ঔষধ লগাবলৈ নলবাৰীত যথেষ্ট তপামূৰীয়া লোকৰ ভিৰ হৈছে যদিও এই তেল ঘঁহাৰ পাছত চুলি গজিবলৈ আৰম্ভ কৰিছে নে নাই, সেয়া সময়তহে প্রমাণিত হ'ব।

Share This