সুৰাৰ বিজ্ঞাপনত ৰংঘৰৰ ফটো, ৰাজ্যজুৰি প্ৰতিক্রিয়া

dainik janambhumi July 21, 2025

ডিজিটেল ডেস্ক : শিৱসাগৰৰ ঐতিহাসিক ৰংঘৰ কেতিয়াবা বেদখলকাৰীৰ কবলত আৰু কেতিয়াবা
কৃত্রিম বানে অস্তিত্ব বিপন্ন কৰি অহাৰ সমান্তৰালভাৱে এইবাৰ ঐতিহ্যত চূড়ান্ত কুঠাৰাঘাত কৰিব খুজিছে এটা সুৰা কোম্পানীয়ে। All Seasonsনামৰ সুৰা কোম্পানীটোৱে বিজ্ঞাপনত ৰংঘৰৰ ফটো ব্যৱহাৰ কৰাক লৈ এতিয়া ঐতিহাসিক নগৰখনত চাঞ্চল্যৰ সৃষ্টি হৈছে। সদৌ টাই আহোম ছাত্র সন্থাৰ নেতা পার্থ গগৈয়ে এই সন্দর্ভত তীব্র প্রতিক্রিয়া ব্যক্ত কৰি ক্ষোভেৰে কয় যে এয়া এক নোহোৱা-নোপজা ঘটনা। কোনো এজন অসমীয়াই এয়া মানি ল'ব নোৱাৰে। অনতিপলমে কোম্পানীটোৱে যদি সুৰাৰ বিজ্ঞাপনৰ পৰা ৰংঘৰৰ ফটো আঁতৰাই নেপেলায় তেন্তে নিজাববীয়াকৈ আটাছুৱে গোচৰ তৰিব বুলি সকীয়নি প্রদান কৰে। 

আনহাতে, আহোম সেনাৰ নেতা আয়ুস ৰঞ্জন গগৈয়ে ক্ষোভেৰে কয় যে যিসময়ত ৰংঘৰৰ সৌন্দর্যবর্ধন আৰু সংৰক্ষণৰ বাবে দাবী উত্থাপন হৈ আহিছে তেনে সময়তে All Seasonsনামৰ সুৰা কোম্পানীটোৱে ৰংঘৰক সুৰাৰ সৈতে একাকাৰ কৰি পেলাইছে। সুৰাই পৰিয়াল ধ্বংস কৰাৰ দৰে এইবাৰ ঐতিহাসিক সম্পদ ধ্বংস কৰিবলৈ ওলাইছে। শীঘ্রই সুৰা কোম্পানীটোৱে ভুল স্বীকাৰ নকৰিলে প্রতিবাদী কাৰ্যসূচী গ্ৰহণ কৰা হ'ব বুলি মন্তব্য কৰে আহোম সেনাৰ নেতাজনে। আনহাতে, এনে কাণ্ডক তীব্র ভাষাৰে গৰিহণা দিছে অসমীয়া যুৱ মঞ্চই। 

এই কাৰ্যই জাতিৰ ঐতিহ্যত আঘাত কৰাৰ লগতে অসমীয়াৰ স্বাভিমানত আঘাত কৰিছে বুলি মন্তব্য কৰে। ইফালে, উক্ত ঘটনাৰ তদন্ত বিচাৰি অসমীয়া যুৱ মঞ্চৰ জয়সাগৰ আঞ্চলিক সমিতিয়ে স্থানীয় জয়সাগৰ আৰক্ষী চকীত এজাহাৰ দাখিল কৰিছে।

Share This