পুনেৰ বাছ ধৰ্ষণ-কাণ্ড ; কুঁহিয়াৰ খেতিৰ পৰা আটক অভিযুক্তক

Kakali Deka February 28, 2025

ডিজিটেল ডেস্কঃ মহাৰাষ্ট্ৰৰ পুনেৰ স্বৰ্গগেট বাছ ষ্টেণ্ডত ৰখাই থোৱা এখন পৌৰসভাৰ বাছত সংঘটিত হয় ২৬ বছৰীয়া এগৰাকী মহিলাক ধৰ্ষণৰ ঘটনা । পুৱা প্ৰায় ১.৩০ বজাত পুনে আৰক্ষীয়ে নিজ গাঁও শ্বিৰুৰৰ কুঁহিয়াৰ পথাৰত গ্ৰেপ্তাৰ কৰে অভিযুক্ত দত্তত্ৰেয় গাড়েক। পুনে চহৰৰ ডি চি পি ক্ৰাইম নিখিল পিংগলেৰ মতে, অভিযুক্তই যোৱা দুদিন ধৰি নিজৰ গাঁৱত আত্মগোপন কৰি আছিল। এই গোচৰৰ তদন্তৰ বাবে আৰক্ষীয়ে ১৩টা দল গঠন কৰে। অভিযুক্তক বিচাৰি উলিয়ালে এক লাখ টকাৰ পুৰস্কাৰো ঘোষণা কৰা হয়।

পুনে ধৰ্ষণ গোচৰৰ অভিযুক্ত দত্তত্ৰেয় ৰামদাস গাড়ে মঙলবাৰৰ ঘটনাৰ পিছৰে পৰা পলাতক হৈ আছে। পুৱা প্ৰায় ৫.৩০ বজাত স্বৰ্গগেট বাছ ষ্টেণ্ডত ৰখাই থোৱা ৰাজ্যিক পৰিবহণ নিগমৰ বাছৰ ভিতৰত ২৬ বছৰীয়া এগৰাকী মহিলাক ধৰ্ষণ কৰাৰ অভিযোগ উত্থাপন হৈছে ।

ইয়াৰ পূৰ্বে ধৰ্ষণৰ অভিযুক্তই বাছখনৰ বাবে অপেক্ষা কৰি থকা মহিলাগৰাকীক ৰৈ থকা বাছখন আন ঠাইত ৰখাই থোৱা বুলি কৈ নিৰ্জন বাছত বহিবলৈ বাধ্য কৰাইছিল। ইয়াৰ পাছত বাছ ষ্টেণ্ডৰ মাজত ৰখাই থোৱা বাছখনৰ ভিতৰতে ধৰ্ষণ-কাণ্ড সংঘটিত কৰাৰ অভিযোগ।

অভিযুক্তৰ জন্ম গাঁও গুনাটৰ কুঁহিয়াৰ খেতিত পুনে আৰক্ষীয়ে তালাচী অভিযান আৰম্ভ কৰে। আৰক্ষীয়ে সন্দেহ কৰিছিল যে তেওঁ আত্মগোপন কৰি আছে। বৃহস্পতিবাৰে জ্যেষ্ঠ বিষয়াকে ধৰি ১০০ৰো অধিক আৰক্ষীয়ে এই অভিযান চলাবলৈ গুনাটত উপস্থিত হয়, য’ত ড্ৰ’ন ব্যৱহাৰ কৰি পথাৰসমূহৰ আকাশী চিত্ৰগ্ৰহণ কৰা হয়।

পুনে আৰক্ষীয়ে শুকুৰবাৰে দত্তত্ৰেয় গাড়েক আটক কৰে ।

অভিযুক্ত কুঁহিয়াৰ খেতিত লুকাই থকাৰ তথ্য লাভ কৰাৰ পাছতে আৰক্ষীয়ে উক্ত স্থানত তালাচী অভিযান চলায় । আৰক্ষী উপায়ুক্ত স্মাৰতানা পাটিলে কয়, "আৰক্ষীয়ে তথ্য লাভ কৰে যে অভিযুক্তই তেওঁৰ গাঁৱতে লুকাই আছে । সেই তথ্যৰ ওপৰত ভিত্তি কৰি তালাচী চলোৱাৰ পাছত অভিযুক্তক আটক কৰি জিম্মাত লোৱা হয় ।"

ইয়াৰ উপৰি পুনেৰ মূল প্ৰৱেশ আৰু প্ৰস্থান পইণ্টৰ লগতে গুৰুত্বপূৰ্ণ বাছ ষ্টেণ্ড আৰু ৰে'ল ষ্টেছনত আৰক্ষীয়ে নিৰাপত্তা বৃদ্ধি কৰিছে। ধৰ্ষণৰ অভিযুক্তৰ অৱস্থা সম্পৰ্কে যিকোনো ব্যক্তিয়ে তথ্য প্ৰদান কৰিলেও এক লাখ টকাৰ পুৰস্কাৰ ঘোষণা কৰা হয়। আৰক্ষীৰ মতে, তেওঁৰ ধৰ্ষণৰ অভিযোগত অভিযুক্তৰ বিৰুদ্ধে পুনে আৰু কাষৰীয়া অহিল্যানগৰ জিলাত চুৰি, ডকাইতি আৰু চেইন টনাকে ধৰি কেইবাটাও অপৰাধমূলক গোচৰ ৰুজু হৈছে।

উৎসঃ প্ৰাগ নিউজ ডিজিটেল

বাতিল কৰা হ'ল উচ্চতৰ মাধ্যমিক প্ৰথম বৰ্ষৰ বাকী থকা পৰীক্ষা