'ৰাহুল গান্ধীয়ে দিয়া প্রমাণ সু-সংগঠিত গৱেষণাৰ এক উত্তম নথি'

dainik janambhumi August 11, 2025

ডিজিটেল ডেস্কঃ এন চিপি (এছ পি)ৰ মুৰব্বী শাৰদ পাৱাৰে শনিবাৰে কংগ্ৰেছৰ জ্যেষ্ঠ নেতা ৰাহুল গান্ধীৰ 'ভোট চুৰি' দাবীক সমর্থন জনায়। শাৰদ পাৱাৰে কয় যে ৰাহুল গান্ধীয়ে নিৰ্বাচন আয়োগৰ বিৰুদ্ধে অনা 'ভোেট চুৰি'ৰ অভিযোগৰ এক বিশদ তদন্ত কৰা উচিত।

 নির্বাচনী প্ৰক্ৰিয়াৰ স্বচ্ছতা আৰু আয়োগৰ নিকা ভাবমূৰ্তিৰ বিষয়ত ওপজা সন্দেহ দূৰ কৰাৰ বাবেই এই নিৰপেক্ষ তদন্তৰ আৱশ্যকতা আছে। ৰাহুল গান্ধীক এখন শপতনামাৰ জৰিয়তে অভিযোগসমূহ ঘোষণা-পত্রযোগে প্রকাশ কৰিবলৈ নির্বাচন আয়োগে জনোৱা প্ৰত্যাহ্বানৰ যুক্তিযুক্ততা সন্দর্ভতো প্রশ্ন উত্থাপন কৰে শাৰদ পাৱাৰে। উল্লেখযোগ্য যে ৰাহুল গান্ধীয়ে দাবী কৰিছিল যে নির্বাচন আয়োগে বিজেপিৰ সহযোগত নিৰ্বাচনত এক 'বৃহৎ অপৰাধমূলক প্ৰৱঞ্চনা' কৰিছিল। যোৱা বৰ্ষৰ লোক সভাৰ নিৰ্বাচনত কৰ্ণাটকৰ মহাদেৱ পুৰা বিধানসভা সমষ্টিত হোৱা 'ভোট চুৰি'ৰ বিষয়ত তেওঁ তথ্যসহকাৰে প্ৰমাণ দাখিল কৰিছিল। গান্ধীয়ে মহাৰাষ্ট্ৰ আৰু হাৰিয়ানাৰ বিধানসভাৰ নির্বাচনতো এই অনুৰূপ ধৰণে নিৰ্বাচন আয়োগে বিজেপিৰ বাবে 'ভোট চুৰি' কৰিছিল বুলি দাবী কৰিছিল। ইয়াৰ পাছতে শাৰদ পাৱাৰে কয় যে ৰাহুল গান্ধীয়ে 'ভোেট চুৰি'ৰ বিষয়ত আগবঢ়োৱা তথ্য হৈছে সুসংগঠিত গৱেষণাৰ এক উত্তম নথি। সেইবাবে নির্বাচন আয়োগৰ নিৰ্বাচনী প্রক্রিয়াত উত্থাপন হোৱা এই প্রশ্নসমূহ নাইকিয়া কৰিবলৈ এক নিৰপেক্ষ তদন্তৰ আৱশ্যকতা আছে বুলি পাৱাৰে সাংবাদিকক কয়। নির্বাচন আয়োগ যিহেতু এটা স্বতন্ত্র সংস্থা, সেইবাবে ৰাহুলৰ পৰা পৃথককৈ ঘোষণা-পত্ৰ বিচৰাটো উচিত নহয় বুলি পাৱাৰে মন্তব্য কৰে।

Share This