আজিৰে পৰা আৰম্ভ পৱিত্ৰ ৰমজান মাহ , আজি ৰমজানৰ প্ৰথমটো ৰোজা

Rashmi March 02, 2025

ডিজিটেল ডেস্ক: আজিৰ পৰা আৰম্ভ হ'ল ৰমজানৰ ৰোজা । আজিৰে পৰা পঢ়িব ৰমজানৰ তাৰবীৰ নামাজ। সেই উপলক্ষে ইছলামধৰ্মী লোকৰ মাজত ব্যাপক উছাহ। ইছলাম ধৰ্মৰ লোকসকলৰ বাবে বছৰৰ ১২ মাহৰ আটাইতকৈ গুৰুত্বপূৰ্ণ মাহ হিচাপে বিবেচিত এই পৱিত্ৰ ৰমজান মাহ ।আকাশত ৰমজানৰ জোন দেখাৰ পৰাই আৰম্ভ হয় ৰমজান মাহ । যাৰ বাবে ৰমজান মাহত উপবাসে থাকি ৰোজা পালন কৰে ইছলাম ধৰ্মৰ লোকসকলে। 

উল্লেখযোগ্য যে ইছলাম ধৰ্মৰ পৱিত্ৰ ধৰ্মগ্ৰন্থ কোৰান এই পৱিত্ৰ ৰমজান মাহতে নাজিল হোৱা বাবেই মাহটো অধিক গুৰুত্বপূৰ্ণ হিচাপে গণ্য কৰা হয় ।ৰমজান মাহৰ ৩০ দিনেই ৰোজা পালন কৰে বিশ্বৰ ইছলাম ধৰ্মাৱলম্বীয়ে । ৰমজান মাহৰ ৩০ দিনীয়া ৰোজাৰ অন্তত পালন কৰা হয় ঈদ উল ফিতৰ । এই পৱিত্ৰ ৰমজান মাহ হৈছে ইছলাম ধৰ্মাৱলম্বী লোকসকলৰ বাবে ত্যাগ আৰু পাপ মোচনৰ মাহ ।

কিন্তু কেনেদৰে পালন কৰা হয় ৰোজা ?

ৰমজানৰ ৩০ দিনেই দিনৰ ভাগত খাব অথবা পান কৰিব নোৱাৰিব কোনো খাদ্য সামগ্ৰী । অৰ্থাৎ চেহেৰী খোৱাৰ পৰা সন্ধিয়া ইফতাৰলৈকে কোনো খাদ্য সামগ্ৰী গ্ৰহণ অথবা পান কৰিব নোৱাৰিব ইছলাম ধৰ্মাৱলম্বী লোকসকলে । সূৰ্য উদয় হোৱাৰ পূৰ্বে হোৱা ফজৰৰ আজানৰ সময়লৈকে খাদ্য সামগ্ৰী গ্ৰহণ অথবা পান কৰিব পাৰিব । সাধাৰণতে ইছলাম ধৰ্মাৱলম্বী প্ৰাপ্তবয়স্ক প্ৰতিগৰাকী সুস্থ লোকৰ বাবেই ৰোজা জৰুৰী।  আনহাতে অসুস্থ লোকৰ বাবে ৰোজাৰ ক্ষেত্ৰত ৰেহাই আছে যদিও পৰৱৰ্তী সময়ত সুস্থ হোৱাৰ পাছত ভংগ কৰা ৰোজা কাজা হিচাপে আদায় কৰিব লাগে।

Share This