ৰাজস্থানৰ নেতৃত্বত ৰিয়ান পৰাগ

dainik janambhumi March 21, 2025

ডিজিটেল ডেস্ক : অসমৰ প্রথমগৰাকী ক্রিকেটাৰ হিচাপে আই পি এলত কোনো দলৰ নেতৃত্বৰ দায়িত্ব চম্ভালিব ৰিয়ান পৰাগে। উত্তৰ-পূৰ্বাঞ্চলৰ ক্ৰিকেটত ইতিহাস সৃষ্টিৰে ৰিয়ানে আসন্ন আই পি এলত ৰাজস্থান ৰয়েলছৰ (আৰ আৰ) প্ৰথম তিনিখন খেলত নিয়মীয়া অধিনায়ক সঞ্জু ছেমছনৰ পৰিৱৰ্তে নেতৃত্বৰ দায়িত্ব পালন কৰিব ৰিয়ানে। শক্তিশালী অলৰাউণ্ডাৰ, ৰাজস্থান ৰয়েলছৰ অন্যতম গুৰুত্বপূৰ্ণ খেলুৱৈ বিয়ানে অহা ২৩ মাৰ্চত ছানৰাইজাৰ্ছ হায়দৰাবাদৰ বিৰুদ্ধে দলৰ প্ৰথমখন খেলত অধিনায়ক হিচাপে অৱতীৰ্ণ হ'ব। 

ইয়াৰ পাছত অহা ২৬ মার্চত গুৱাহাটীত ডিফেন্ডিং চেম্পিয়ন কলকাতা নাইট ৰাইডাৰ্ছ আৰু ৩০ মাৰ্চত পাঁচবাৰৰ বিজয়ী চেন্নাই ছুপাৰ কিংছৰ বিৰুদ্ধে ৰাজস্থান ৰয়েলছৰ নেতৃত্বৰ দায়িত্বত থাকিব ৰিয়ান। ইফালে, উইকেটকীপিং আৰু ফিল্ডিঙৰ বাবে সেউজ সংকেত নোপোৱাৰ পৰিপ্ৰেক্ষিতত সঞ্জু ছেমছনে মাথোঁ বেটিঙৰ দায়িত্বহে পালন কৰিব। এই পৰিস্থিতিত ৰাজস্থান ৰয়েলছৰ দলীয় মেনেজমেন্ট ঘৰুৱা ক্রিকেটত অসমক নেতৃত্ব দিয়াৰ অভিজ্ঞতা থকা ৰিয়ানৰ ওপৰত ভৰসা ৰাখিয়েই তেওঁৰ কান্ধত গুৰু দায়িত্ব অর্পণৰ সিদ্ধান্ত গ্রহণ কৰে। 

আঘাতমুক্ত হৈ কিছুদিন পূৰ্বে আৰ আৰৰ শিবিৰত যোগ দিছিল ছেমছনে। আই পি এলত আৰম্ভণিতে বেটাৰ হিচাপে খেলিলেও উইকেটকীপিং আৰু ফিল্ডিং নকৰিব তাৰকা ক্রিকেটাৰগৰাকীয়ে। সেই অনুসৰি ছেমছনক হয়তো ইমপেক খেলুৱৈ হিচাপে ব্যৱহাৰ কৰিব ৰাজস্থানে। ৰাজস্থানৰ ফ্ৰেন্সাইজীৰ তৰফৰ পৰা কোৱা হৈছে যে ছেমছন দলৰ এক অবিচ্ছেদ্য অংগ। উইকেটকীপিং আৰু ফিল্ডিঙৰ অনুমতি নোেপাৱা পর্যন্ত তেওঁ মাথোঁ বেটাৰ হিচাপে দলক সাহায্য কৰিব। সম্পূর্ণ ফিট হৈ উঠিলেই তেওঁ পুনৰ নেতৃত্বলৈ উভতি আহিব।

Share This