ৰয়েল চেলেঞ্জাৰ্ছ বেংগালুৰুৰ পঞ্চম জয়

dainik janambhumi April 21, 2025

ডিজিটেল ডেস্ক : ৰয়েল চেলেঞ্জাৰ্ছ বেংগালুৰুৱে (আৰ চি বি) অষ্টাদশ সংস্কৰণৰ ইণ্ডিয়ান প্রিমিয়াৰ লীগত (আই পি এল) পঞ্চম জয় সাব্যস্ত কৰিছে। চলিত আই পি এলৰ দেওবাৰৰ এখন খেলত অ'পেনাৰ বিৰাট কোহলী আৰু দেৱদত্ত পাৰিকালৰ অর্ধশতৰানৰ সহায়ত পঞ্জাব কিংছক ৭ উইকেটত পৰাজিত কৰে আৰ চি বিয়ে। কোহলী আৰু পাৰিকালৰ মাজত সংগৃহীত ১০৩ ৰানৰ জৰিয়তে আৰ চি বিয়ে ৭টা বল বাকী থকা অৱস্থাত ১৫৮ ৰানৰ লক্ষ্য অতিক্রম কৰে। 

কোহলীৰ ৫৪টা বলত ৭টা চাৰি আৰু এটা ছয় সম্বলিত অপৰাজিত ৭৩ আৰু পাৰিকালৰ ৩৫টা বলত ৫টা চাৰি আৰু ৪টা ছয় সম্বলিত ৬১ ৰানে দলৰ জয়ৰ ভেটি গঢ়ে। দলীয় স্ক'ৰ ৬ ৰানতে আনগৰাকী অ'পেনাৰ ফিল ছল্ট (১) আউট হ'লেও কোহলী আৰু পাৰিকালে অর্ধশতৰান গোটাই দললৈ সহজ জয় কঢ়িয়াই আনে। 

অধিনায়ক ৰজত পাটিডাৰে ১২ ৰানত আউট হ'লেও উইকেটকীপাৰ জিতেশ শর্মাই ১১ ৰানত বেট ধৰি থাকে। ইয়াৰ আগেয়ে প্ৰভছিমৰন সিঙৰ সৰ্বাধিক ৩৩, শশাংক সিঙৰ অপৰাজিত ৩১, জুছ ইংলিছৰ ২৯ আৰু মার্কো জেনছেনৰ অপৰাজিত ২৫ ৰানৰ সহায়ত পঞ্জাব কিংছে ৬ উইকেটত ১৫৭ ৰান কৰে। আৰ চি বিৰ ক্রুনাল পাণ্ডিয়া আৰু ছুয়াছ শর্মাই দুটাকৈ উইকেট দখল কৰে।

Share This