শিৱসাগৰত বিধায়ক ৰূপজ্যোতিৰ প্ৰৱেশ নিষিদ্ধ

dainik janambhumi March 22, 2025

ডিজিটেল ডেস্ক : বিধানসভাত শাসকীয় দলৰ বিধায়ক ৰূপজ্যোতি কুৰ্মিয়ে কৰা অভব্য আচৰণত ক্ষুব্ধ হৈ উঠিছে ৰাইজৰ দল। শুকুৰবাৰে শিৱসাগৰ নগৰৰ মাজমজিয়াত ৰাইজৰ দলৰ কৰ্মীসকলে বিধায়কগৰাকীৰ প্ৰতিকৃতি দাহ কৰে যদিও আৰক্ষীয়ে হস্তক্ষেপ কৰা দেখা যায়। 'ৰূপজ্যোতি কুৰ্মিক গ্ৰেপ্তাৰ কৰক', 'ৰূপজ্যোতি কুৰ্মিৰ গুণ্ডাগিৰি নচলিব', 'ৰূপজ্যোতি কুর্মি মুর্দাবাদ' আদি ধ্বনি দি পৰিৱেশ উত্তাল কৰি তোলে দলটোৰ অর্ধশতাধিক কর্মীয়ে। 

শিৱসাগৰ সমষ্টিৰ বিধায়ক অখিল গগৈলৈ আক্ৰমণৰ উদ্দেশ্যে আগবাঢ়ি অহা কাৰ্যক তীব্ৰ গৰিহণা দিছে ৰাইজৰ দলে। শিৱসাগৰ জিলা সমষ্টি সমিতিৰ সভাপতি জিতুজ্যোতি গায়নে সংবাদ মাধ্যমৰ আগত কয় যে বিধায়কগৰাকীক শিৱসাগৰৰ সীমাৰ ভিতৰত সোমাবলৈ দিয়া নহ'ব। তেওঁ ইতিমধ্যে মানসিকভাৱে ভাৰসাম্যহীন হৈ পৰিছে। তেওঁক চিকিৎসাৰ প্ৰয়োজন। 

বিধায়কগৰাকীক জীৱ-জন্তুৰ লগতো তুলনা কৰে দলৰ কৰ্মীসকলে। শীঘ্ৰেই ক্ষমা খোজা আৰু গ্ৰেপ্তাৰ কৰাৰ দাবী জনায় ৰাইজৰ দলৰ কৰ্মীসকলে।

Share This