অনিশ্চয়তাৰ দিশে মস্কো-কীভৰ শান্তি চুক্তি 

dainik janambhumi March 17, 2025

ডিজিটেল ডেস্ক : ৰাছিয়াৰ ৰাষ্ট্ৰপতি ভ্লাডিমিৰ পুটিনে আমেৰিকাৰ ৰাষ্ট্ৰপতি ট্রাম্পৰ ৩০ দিনীয়া ইউক্রেইনৰ সৈতে যুদ্ধবিৰতিৰ প্ৰস্তাৱ মানি লোৱাৰ পাছতো পুটিনে ইউক্রেইনৰ লগতে আমেৰিকালৈ শান্তি চুক্তি বিষয়ক কেইবাটাও চর্ত বান্ধি দিছিল। এই শান্তি চুক্তিৰ প্ৰক্ৰিয়া চলি থকাৰ মাজতে শনিবাৰৰ পৰা পুনৰ ৰাছিয়া আৰু ইউক্রেইনৰ মাজত প্রচণ্ড সংঘৰ্ষৰ পুনৰ সূত্রপাত হয়। 

তিনি বছৰীয়া যুদ্ধৰ সম্ভাব্য শান্তি চুক্তিয়ে এতিয়া অনিশ্চয়তাৰ দিশত গতি কৰিছে। দেওবাৰে পুৱা ইউক্রেইনৰ চৰকাৰী কৰ্তৃপক্ষই সদৰী কৰা অনুসৰি, ৰাছিয়া আৰু ইউক্রেইনৰ মাজত ড্র'ন, বিমান আক্রমণ অব্যাহত আছে। দুয়োপক্ষৰ আক্ৰমণ-প্রত্যাক্ৰমণৰ পাছত বহু লোক আহত হৈছে আৰু দুয়ো দেশৰ ৰাজহুৱা সা-সম্পত্তিৰ লগতে আন্তঃগাঁথনিও ধ্বংস হৈছে। আনহাতে, ৰাছিয়াৰ পশ্চিমৰ কুৰ্স্ক অঞ্চলৰ পৰা ইউক্রেইনৰ সেনাক আঁতৰি যাবলৈ ৰুছ সেনাই আগ্রাসন অব্যাহত ৰাখিছে। ৰুছ প্ৰতিৰক্ষা মন্ত্ৰ্যালয়ে দেওবাৰে কয় যে ৰাছিয়াৰ অঞ্চলত ৰুছ সেনাই ৩১খন ইউক্রেইনৰ ড্ৰ'নক গুলীয়াই ভূপাতিত কৰিছে। আনহাতে, ইউক্রেইনতো ৰাছিয়াই ড্র'ন আক্রমণ সংঘটিত কৰি আছে। ৰাজধানী কীভ অঞ্চলত ৰাছিয়াই ড্ৰ'ন আক্রমণ অব্যাহত ৰাখিছে দেওবাৰলৈকে। 

ইফালে, ইউক্রেইনৰ ৰাষ্ট্ৰপতি জেলেনস্কীয়ে কয় যে কুৰ্স্ক অঞ্চলত ৰাছিয়াৰ সৈন্যই ইউক্রেইনী সেনাক ঘেৰি ধৰি থকা নাই। গ্রাউণ্ডৰ পৰিস্থিতিৰ বিষয়ত ৰুছ ৰাষ্ট্ৰপতি পুটিনে 'মিছা' মাতিছে বুলি জেলনস্কীয়ে অভিযোগ কৰে। আনহাতে, লণ্ডনৰ পৰা পোৱা বাতৰি অনুসৰি, ব্রিটেইনৰ প্ৰধানমন্ত্ৰী কেয়াৰ ষ্টাৰ্মাৰে শনিবাৰে কয় যে ৰাষ্ট্ৰপতি পুটিনে যদি ইউক্রেনৰ সৈতে শান্তি প্রক্রিয়াত অংশ নলয়, তেনেহ'লে ২৫খন মিত্র দেশে ৰাছিয়ালৈ কঠোৰ অর্থনৈতিক নিষেধাজ্ঞা আৰোপ কৰিব। লণ্ডনত এখন সংবাদমেলত প্রধানমন্ত্রী ষ্টাৰ্মাৰে কয় যে ২৫খন মিত্র দেশে এই অর্থনৈতিক নিষেধাজ্ঞা ৰাছিয়াৰ বিৰুদ্ধে আৰোপ কৰিবলৈ শনিবাৰে সন্মত হৈছে। ষ্টাৰ্মাৰে কয় যে এই নিষেধাজ্ঞাৰ বিষয়টো লৈ ৰাছিয়াৰ ওপৰত অধিক হেঁচা প্রয়োগ কৰিব পৰা যাব। উল্লেখযোগ্য যে ৰাছিয়াৰ ৰাষ্ট্ৰপতি পুটিনে ইউক্রেইনৰ সৈতে সংকটৰ মূল কাৰকবোৰ নির্মূল নকৰালৈকে শান্তি প্রক্রিয়া সম্ভৱ নহয় বুলি চৰ্ত আৰোপ কৰিছিল।

Share This