শচীনে অস্বীকাৰ কৰিলে প্রকাশিত বাতৰি, বি চি চি আইৰ পৰৱৰ্তী সভাপতি কোন?

dainik janambhumi September 12, 2025

ডিজিটেল ডেস্ক : ভাৰতীয় ক্রিকেট নিয়ন্ত্ৰণ ব'ৰ্ডৰ বার্ষিক সাধাৰণ সভাখন অহা ২৮ ছেপ্টেম্বৰত মুম্বাইত থকা ব'ৰ্ডৰ মুখ্য কাৰ্যালয়ত অনুষ্ঠিত হ'ব। সাধাৰণ সভাত বি চি চি আইৰ বিষয়ববীয়াৰ নির্বাচনো অনুষ্ঠিত হ'ব। এইবাৰ বি চি চি আইৰ সাধাৰণ সভাৰ প্ৰতি সকলোৰে দৃষ্টি নিবদ্ধ হৈ আছে পৰৱৰ্তী সভাপতি কোন হ'ব সেই বিষয়টোক লৈ। বি চি চি আইৰ সাধাৰণ সভাতে ব'ৰ্ডৰ নতুন সভাপতি নির্বাচিত কৰা হ'ব। 

উল্লেখযোগ্য যে প্রাক্তন অলৰাউণ্ডাৰ ৰোজাৰ বিন্নীৰ বয়স ৭০ বছৰ হোৱাত তেওঁ বি চি চি আইৰ নিয়ম অনুসৰি এই পদ ত্যাগ কৰে। ইফালে একাংশ সংবাদ মাধ্যমত প্ৰকাশ পোৱা অনুসৰি পূৰ্বৰ দুবাৰৰ দৰেই এইবাৰো ক্রিকেটত অভিলেখৰ গৰাকী এগৰাকী ক্রিকেটাৰে বি চি চি আইৰ সভাপতিৰ পদ গ্রহণ কৰিব পাৰে। এই ক্ষেত্ৰত ক্ৰিকেটৰ ভগৱান বুলি কোৱা শচীন টেণ্ডুলকাৰৰ নামো ওলাইছে। সংবাদ মাধ্যমত প্ৰচাৰিত বাতৰি অনুসৰি শচীনক ব'ৰ্ডৰ সদস্যসকলে সর্বসন্মতিক্ৰমে সভাপতিৰ পদ গ্রহণ কৰিবলৈ অনুৰোধ জনাব পাৰে। 

অৱশ্যে, এই বাতৰিক ক্ৰিকেটৰ ভগৱান ৰূপে খ্যাত শচীনে অস্বীকাৰ কৰিছে। শচীনৰ ব্যৱস্থাপনা ফার্মে এনে ধৰণৰ সকলো বাতৰিক 'ভিত্তিহীন' বুলি অভিহিত কৰে। টেন্ডুলকাৰৰফার্মে এটা বিবৃতিত কয় যে বি চি চি আইৰ সভাপতি পদৰ বাবে শচীন টেণ্ডুলকাৰৰ নাম বিবেচনা কৰা বা মনোনীত কৰা বুলি কিছুমান বাতৰি তথা উৰা বাতৰি প্ৰকাশ পাইছে। ফার্মখনে কয়, 'আমি স্পষ্টভাৱে জনাব খোজোঁ যে তেনেধৰণৰ কোনো কথা হোৱা নাই, আৰু এনেধৰণৰ ভিত্তিহীন বাতৰিৰ প্ৰতি মনোযোগ নিদিবৰ বাবে সকলোকে অনুৰোধ জনালোঁ।'

Share This