সন্ত্রাসবাদৰ বিৰুদ্ধে আপোচবিহীন স্থিতি ল'ব লাগে এছ চি অ'ৰ দেশসমূহে

dainik janambhumi July 17, 2025

ডিজিটেল ডেস্কঃ ছাংহাই ক'-অপাৰেশ্যন অর্গেনাইজেশ্যনে (এছ চি অ') সন্ত্রাসবাদ আৰু উগ্ৰপন্থাৰ বিৰুদ্ধে যুঁজৰ ক্ষেত্ৰত আপোচবিহীন স্থিতি ল'ব লাগে। চীনৰ ৰাষ্ট্ৰপতি ঝি জিনপিঙক সাক্ষাৎ কৰাৰ কেইঘণ্টামানৰ পাছতেই এছ চি অ'ৰ এখন সভাত ভাৰতৰ বিদেশ মন্ত্রী এছ জয়শংকৰে এইদৰে মন্তব্য কৰে। ৰাষ্ট্ৰপতি জিনপিঙৰে সাক্ষাতৰ সময়ত জয়শংকৰে চীন-ভাৰতৰ শেহতীয়া দ্বিপাক্ষিক সম্পৰ্কৰ বিষয়ত চীনা ৰাষ্ট্ৰপতিজনক অৱগত কৰে।

উল্লেখযোগ্য যে এছ চি অ'ৰ বিদেশ মন্ত্ৰীসকলৰ বৈঠকত অংশ লোৱাৰ বাবে দেশৰ বিদেশ মন্ত্রী জয়শংকৰ বৰ্তমান চীনত আছে। চীনৰ তিয়াজিনত আয়োজিত এই সন্মিলনত জয়শংকৰে অন্য দেশসমূহৰ বিদেশ মন্ত্ৰীসকলৰ সৈতেও বৈঠকত মিলিত হয়। বিদেশ মন্ত্ৰীসকলৰ বৈঠকত জয়শংকৰে কয় যে জম্মু-কাশ্মীৰৰ পৰ্যটনভিত্তিক অর্থনীতি ধ্বংস কৰা আৰু ধর্মীয় বিভাজন অনাৰ উদ্দেশ্যৰে ২২ এপ্রিলত পহলগামত সন্ত্রাসবাদীৰ আক্রমণ সংঘটিত হৈছিল। উল্লেখযোগ্য যে এই বৈঠকখনত পাকিস্তানৰ বিদেশ মন্ত্ৰী ইশ্বাৰ ডাৰো উপস্থিত আছিল। জয়শংকৰে সন্মিলনখনত তিনিটা অশুভ শক্তি-সন্ত্রাসবাদ, বিচ্ছিন্নতাবাদ আৰু উগ্ৰপন্থাৰ বিৰুদ্ধে একেলগে যুঁজিবলৈ বিদেশ মন্ত্রীসকলক আহ্বান জনায়।

Share This