ঝাৰখণ্ডৰ চাতৰাত ভয়ংকৰ বিমান দুৰ্ঘটনা: ৰোগীসহ ৭ যাত্ৰীৰ কৰুণ মৃত্যু

Nikimoni Kachari February 24, 2026

ডিজিটেল ডেস্ক : ঝাৰখণ্ডৰ চাতৰা জিলাৰ গভীৰ অৰণ্যত সোমবাৰে নিশা এখন ব্যক্তিগত এয়াৰ এম্বুলেন্স দুৰ্ঘটনাগ্ৰস্ত হোৱাৰ ফলত বিমানখনত থকা সাতগৰাকী যাত্ৰীৰে কৰুণ মৃত্যু ঘটে। উন্নত চিকিৎসাৰ বাবে ৰাঁচীৰ পৰা দিল্লীলৈ এজন সংকটজনক ৰোগীক লৈ যোৱাৰ পথতে এই শোকাৱহ ঘটনাটো সংঘটিত হয়।

উদ্ধাৰকাৰী সূত্ৰৰ মতে, ‘ৰেডবাৰ্ড এয়াৰৱেজ’ৰ (Redbird Airways) দ্বাৰা পৰিচালিত Beechcraft C90 মডেলৰ বিমানখন নিশা প্ৰায় ৭-১১ বজাত ৰাঁচীৰ বিৰচা মুণ্ডা বিমানবন্দৰৰ পৰা উৰা মাৰিছিল। উৰণৰ প্ৰায় ২৩ মিনিটৰ পাছত, অৰ্থাৎ নিশা ৭-৩৪ বজাত কলকাতা এয়াৰ ট্ৰেফিক কণ্ট্ৰোলৰ সৈতে বিমানখনৰ যোগাযোগ বিচ্ছিন্ন হয়। তাৰ কিছু সময়ৰ পাছতেই চাতৰা জিলাৰ চিমৰিয়াৰ অন্তৰ্গত কাচিয়াতু (Kasiyatu) জঙ্ঘলত বিমানখন দুৰ্ঘটনাগ্ৰস্ত হয়।

দুৰ্ঘটনাগ্ৰস্ত বিমানখনত সাতজন লোক আছিল, যাৰ ভিতৰত আছিল:

ৰোগী: সঞ্জয় কুমাৰ (৪১), যি ৬৩ শতাংশ অগ্নিদগ্ধ অৱস্থাত উন্নত চিকিৎসাৰ বাবে দিল্লীলৈ গৈ আছিল।

চিকিৎসা কৰ্মী: ডাঃ বিকাশ কুমাৰ গুপ্তা আৰু পেৰামেডিক শচীন কুমাৰ মিশ্ৰ।

পৰিয়ালৰ সদস্য: অৰ্চনা দেৱী আৰু ধৰু কুমাৰ।

পাইলট: কেপ্তেইন বিবেক বিকাশ ভগত আৰু কেপ্তেইন চাভৰাজদীপ সিং।

চাতৰাৰ উপায়ুক্ত কীৰ্তিশ্ৰী জিয়ে জনোৱা মতে, দুৰ্ঘটনাটো অতি দুৰ্গম আৰু ঘন হাবিৰ মাজত হোৱাৰ বাবে উদ্ধাৰকাৰী দল ঘটনাস্থলীত উপস্থিত হোৱাত যথেষ্ট প্ৰত্যাহ্বানৰ সন্মুখীন হৈছে। স্থানীয় আৰক্ষী আৰু প্ৰশাসনে নিশাৰে পৰা উদ্ধাৰ অভিযান অব্যাহত ৰাখিছে।

অসামৰিক বিমান পৰিবহণ সঞ্চালকালয়ে (DGCA) ঘটনাটোৰ তদন্তৰ নিৰ্দেশ দিছে। ৰাঁচী বিমানবন্দৰৰ সঞ্চালক বিনোদ কুমাৰৰ মতে, প্ৰাৰম্ভিক পৰ্যায়ত বেয়া বতৰক দুৰ্ঘটনাৰ কাৰণ বুলি সন্দেহ কৰা হৈছে যদিও কাৰিকৰী বিজুতিৰ সম্ভাৱনাও নুই কৰিব নোৱাৰি।

এই ঘটনাত ঝাৰখণ্ডৰ প্ৰাক্তন মুখ্যমন্ত্ৰী চম্পাই ছোৰেণে গভীৰ শোক প্ৰকাশ কৰিছে। তেওঁ মৃতকৰ পৰিয়ালবৰ্গলৈ সমবেদনা জ্ঞাপন কৰাৰ লগতে ঘটনাটোৰ এক উচ্চস্তৰীয় তদন্তৰ দাবী জনাইছে।

উৎস: প্ৰাগ নিউজ ডিজিটেল