উত্তৰাখণ্ডৰ জ্যোতিষ পীঠৰ শংকৰাচাৰ্যৰ হুংকাৰ

dainik janambhumi February 12, 2025

ডিজিটেল ডেস্ক: গো-হত্যা নিষিদ্ধ কৰাৰ সন্দৰ্ভত সিদ্ধান্ত গ্রহণ কৰিবলৈ এজন সাধুৱে কেন্দ্ৰীয় চৰকাৰক ৩৩ দিনৰ চূড়ান্ত সময় দি ভাবুকি দিয়ে যে অন্যথা ১৭ মাৰ্চৰ পাছত 'এক কঠোৰ সিদ্ধান্ত' গ্ৰহণ কৰা হ'ব। উত্তৰাখণ্ডৰ জ্যোতিষ পীঠৰ শংকৰাচাৰ্য স্বামী অৱিমুক্তেশ্বৰানন্দ সৰস্বতীয়ে মঙলবাৰে কেন্দ্ৰীয় চৰকাৰক গো-হত্যা নিষিদ্ধ কৰাৰ তথা গাইক 'ৰাষ্ট্ৰ মাতা'ৰূপে ঘোষণা কৰা সন্দৰ্ভত সিদ্ধান্ত ল'বলৈ ৩৩ দিন সময় দিয়ে। 

মহাকুম্ভ নগৰৰ ছেক্টৰ ১৯ত থকা শিবিৰত শংকৰাচাৰ্যগৰাকীয়ে সাংবাদিকৰ আগত কয়, 'ধর্মপুথিবোৰত লিখা হৈছে যে গৰুৰ শৰীৰত ৩৩ কোটি দেৱ-দেৱীয়ে বাস কৰে। আমি যোৱা ডেৰ বছৰে গাইক ৰাষ্ট্ৰ মাতা ঘোষণা কৰিবলৈ এটা আন্দোলন চলাই আছোঁ। এতিয়া আমি সিদ্ধান্ত গ্রহণ কৰিছোঁ যে মাঘী পূৰ্ণিমাৰ পাছ দিনাৰ পৰা (বৃহস্পতিবাৰ) আমি ৩৩ দিনীয়া যাত্ৰা আৰম্ভ কৰিম।' 

তেওঁ আৰু কয় যে ৩৩ দিনীয়া যাত্রা ১৭ মাৰ্চত অন্ত পৰিব। স্বামী অৱিমুক্তেশ্বৰানন্দই আৰু কয়, 'এটা সিদ্ধান্ত ল'বলৈ এতিয়া কেন্দ্ৰীয় চৰকাৰৰ হাতত ৩৩ দিন সময় আছে। যদি এই ৩৩ দিনৰ ভিতৰত কোনো সিদ্ধান্ত নলয়, তেন্তে ১৭ মাৰ্চৰ বিয়লি ৫ বজাৰ পাছত আমি এক কঠোৰ সিদ্ধান্ত গ্ৰহণ কৰিম।'

Share This