৮ দিনত বিনিয়োগকাৰীৰ ২৫ লাখ কোটি টকা লোকচান

Dainik janambhumi February 15, 2025

ডিজিটেল ডেস্ক: ভাৰতীয় শ্বেয়াৰ বজাৰত সংকট অব্যাহত আছে। বিদেশী বিনিয়োগকাৰীয়ে বৃহৎ পৰিমাণৰ ধন উলিয়াই নিয়া, তৃতীয় ত্রৈমাসিকত
ভাৰতৰ উন্নয়নৰ হাৰ হ্ৰাস পোৱাৰ দৰে কাৰকৰ ফলত আজি একেৰাহে অষ্টম দিনলৈ ভাৰতীয় শ্বেয়াৰ বজাৰত সূচকাংক নিম্নগামী হোৱাৰ ধাৰা অব্যাহত আছে।

ব'ম্বে ষ্টক এক্সছেঞ্জৰ সূচকাংক ছেনছেক্স ১৯৯ পইন্ট অৱনমিত হৈ ৭৫,৯৩৯ পইন্ট হয়গৈ।আনহাতে, ৰাষ্ট্ৰীয় ষ্টক এক্সছেঞ্জৰ সূচকাংক ১০২ পইন্ট নিম্নগামী হৈ ২২,৯২৯ পইন্ট হয়গৈ। নিফটিৰ চাৰিটা শ্বেয়াৰক বাদ দি আন সকলো শ্বেয়াৰৰ মূল্য হ্রাস পায়। সর্বাধিক ৪.৫২% হ্রাস পায় আদানি গ্ৰুপৰ শ্বেয়াৰৰ মূল্য। ব'ম্বে ষ্টক এক্সছেঞ্জৰ সূচকাংক নিম্নগামী হোৱাৰ ফলত বিনিয়োগকাৰীৰ প্ৰায় সাত লাখ কোটি টকা লোকচান হয়। ইয়াৰ ফলত বজাৰ মূলধন প্রায় ৪০০ লাখ কোটি টকা হয়গৈ। মন কৰিবলগীয়া যে শ্বেয়াৰ বজাৰত পতন অব্যাহত থকাৰ ফলত যোৱা আঠ দিনত বিনিয়োগকাৰীয়ে প্রায় ২৫ লাখ কোটি টকা লোকচানৰ সন্মুখীন হৈছে। ছেনছেক্সৰ তালিকাভুক্ত ৩০টা কোম্পানীৰ বজাৰ মূলধন যোৱা আঠ দিনত ৪২৫.৫০ লাখ কোটি টকাৰ পৰা ৪০০ লাখ কোটি টকা হয়গৈ। চলিত বছৰত ছেনছেক্স ৩.১৯% আৰু নিফটি ৩.৪৩% নিম্নগামী হয়। মন কৰিবলগীয়া যে আমেৰিকাৰ ৰাষ্ট্ৰপতি ড'নাল্ড ট্রাম্পে বিভিন্ন দেশৰ বিৰুদ্ধে সমানুপাতিক কৰ আৰোপ কৰাৰ কথা ঘোষণা কৰে। ইয়াৰ প্ৰভাৱো শ্বেয়াৰ বজাৰত পৰে। 

ভাৰতীয় শ্বেয়াৰ বজাৰত সৃষ্টি হোৱা হাহাকাৰ পৰিস্থিতিৰ বাবে বিদেশী বিনিয়োগকাৰীও বহু পৰিমাণে দায়ী। বিদেশী বিনিয়োগকাৰীয়ে ভাৰতীয় বজাৰৰ পৰা বৃহৎ পৰিমাণৰ ধন উলিয়াই নিয়ে। চলিত বছৰত বিদেশী বিনিয়োগকাৰীয়ে ভাৰতীয় বজাৰত থকা ৯৭,১০৪ লাখ কোটি টকাৰ, অৰ্থাৎ প্রায় এক লাখ কোটি টকাৰ শ্বেয়াৰ বিক্ৰী কৰি ধন উলিয়াই নিয়ে। ইফালে, ভাৰতৰ মূল্যৱান ধাতুৰ বজাৰত সোণৰ দামে প্রায় প্রতিদিনে অভিলেখৰ সৃষ্টি কৰি আছে। ২৪ কেৰেটৰ প্ৰতি দহ গ্রাম সোণৰ দামে প্ৰথম বাৰৰ বাবে ৮৬ হাজাৰ টকাৰ সীমা অতিক্রম কৰে। বজাৰৰ লেনদেন চলি থকাৰ সময়ত সোণৰ দাম প্রতি দহ গ্রামত ৮৬,০৮৯ টকা হয়গৈ। অৱশ্যে বজাৰৰ লেনদেন সামৰাৰ পৰত ৯০ টকা হ্রাস পাই প্রতি দহ গ্রামত হয়গৈ ৮৫,৯৯৮ টকা।

Share This