গুৱাহাটীত চাঞ্চল্যকৰ ঘটনা, দুই বন্ধুৱে কাম দিবলৈ আনি হত্যা কৰিলে সঞ্জীৱ নাথক

Kakali Deka February 21, 2025

ডিজিটেল ডেস্কঃ গুৱাহাটী মহানগৰীত পুনৰ সংঘটিত হৈছে এক চাঞ্চল্যকৰ ঘটনা । কাম দিয়াৰ  চলেৰে গুৱাহাটীলৈ মাতি আনি হত্যা কৰিলে বন্ধুক।  দুই বন্ধুৱে মৰিগাঁৱৰ সঞ্জীৱ নাথক হত্যা কৰাৰ অভিযোগ উত্থাপন হৈছে। সঞ্জীৱ নাথৰ দুই বন্ধু প্ৰহ্লাদ নাথ আৰু আনন্দ দাসৰ বিৰুদ্ধে হত্যাৰ অভিযোগ উত্থাপন কৰিছে সঞ্জীৱৰ পৰিয়ালে৷

জানিব পৰা মতে, ১৭ জানুৱাৰীত কামৰ সন্ধানত দুই বন্ধুৱে গুৱাহাটীলৈ আনিছিল সঞ্জীৱক, উজান বজাৰৰ অমিত এজেঞ্চি নামৰ এটা ছিকিউৰিটি এজেঞ্চিত সুমুৱাই দিছিল সঞ্জীৱক । কিন্তু ১৯ জানুৱাৰীৰ নিশা পল্টন বজাৰৰ কিৰণশ্ৰী এপার্টমেণ্টত সঞ্জীৱক প্ৰহাৰ কৰিছিল দুই বন্ধুৱে, তাৰ পৰাই সঞ্জীৱক লৈ গৈছিল বিলপাৰলৈ৷ নিশাৰ আন্ধাৰত দুই বন্ধুৰ সহযোগত এটা গুণ্ডা বাহিনীৰ দলে বেয়াকৈ প্ৰহাৰ কৰি পেলাই দিছিল সঞ্জীৱক।

পৰিয়াৰ লোকে সদৰী কৰা অনুসৰি সঞ্জীৱে ঘটনাৰ মাজতে ঘৰলৈ ফ'ন কৰি বচাওক বচাওক বুলি পৰিয়ালক আহ্বান কৰিছিল আৰু ঘটনাৰ নিশাই পৰিয়ালৰ লোক গুৱাহাটীত উপস্থিত হৈছিল যদিও কোনো সন্ধান উলিয়াব পৰা নাছিল  সঞ্জীৱৰ পৰিয়ালৰ লোকে । সঞ্জীৱৰ দুই বন্ধুৰ পৰাও পোৱা নাছিল কোনো সঁহাৰি ৷

২০ জানুৱাৰীত পল্টন বজাৰ থানাত সঞ্জীৱৰ নিৰুদ্দেশৰ এজাহাৰ দাখিল কৰিছিল। পৰিয়ালৰ লোকে ঘটনাৰ প্ৰায় ৫ দিন পাছত জি এম চি এইচত সঞ্জীৱ ভর্তি হৈ থকাৰ তথ্য লাভ কৰিছিল পৰিয়ালৰ লোকে৷ অতি সংকটজনক অৱস্থাত চিকিৎসা চলিছিল সঞ্জীৱৰ, কিন্তু বৃহস্পতিবাৰৰ নিশা মৃত্যুক আঁকোৱালি লয় সঞ্জীৱ নাথে । 

ইফালে সঞ্জীৱক মাৰধৰ কৰাৰ কথা প্ৰকাশ কৰিলেই প্ৰহ্লাদৰ পৰা হত্যাৰ ভাবুকি পৰিয়ালৰ লোকক । সঞ্জীৱৰ মৃত্যুৰ খবৰ পোৱাৰ পাছতেই মৰিগাঁৱৰ বাসগৃহত মৃত্যু হয় সঞ্জীৱৰ বৰদেউতাকৰ৷ দোষীক কঠোৰ শাস্তিৰ দাবী জনাইছে ভুক্তভোগী পৰিয়ালৰ লোকে

Share This