পৰিয়ালৰ বাবে কৰ্ণাটকত হাজিৰা কৰিও 'নীট'ত উত্তীর্ণ শুভম

dainik janambhumi August 31, 2025

ডিজিটেল ডেস্কঃ পৰিয়ালক সহায় কৰিবৰ বাবে কৰ্ণাটকৰ বেংগালুৰুত নির্মাণ শ্রমিক হিচাপে কাম কৰা ওড়িশাৰ ১৯ বছৰীয়া শুভম সাবৰ নামৰ ছাত্ৰজনৰ সপোন সাকাৰ হৈছে। চিকিৎসক হোৱাৰ সপোন দেখা নীট-ইউ জি পৰীক্ষাত সফল হোৱাৰ পাছত শুভমে ওড়িশাৰ বেহৰামপুৰস্থিত এম কে চিজি মেডিকেল কলেজ আৰু এম বি বি এছ পাঠ্যক্রমত নামভৰ্তি কৰিছে। শুভমে প্ৰথমবাৰতেই নীট-ইউ জি পৰীক্ষা পাছ কৰে আৰু অনুসূচিত জনজাতি শ্ৰেণীত ১৮,২১২ ৰেংক লাভ কৰে।

ওড়িশাৰ খোধী জিলাৰ বানপুৰ উন্নয়ন খণ্ডৰ মুডুলিধাহ গাঁৱৰ এটা দৰিদ্ৰ পৰিয়ালৰ সন্তান সাবৰে পৰীক্ষাৰ পাছতে বেংগালুৰুত কাম কৰিবলৈ গৈছিল। তাৰ পাছত যোৱা ১৪ জুনত তেওঁৰ শিক্ষক বাসুদেৱ মহাৰাণাই তেওঁক ফ'ন কৰে। সেই বিষয়ে পি টি আইক শুভমে কয়, 'শেহতীয়াকৈ যেতিয়া বেংগালুৰুত এটা নির্মাণস্থলীত কাম কৰি আছিলোঁ, মই মোৰ শিক্ষকৰ পৰা এটা ফ'ন কল পালোঁ, যি মোক মিঠাই বিলাবলৈ কৈছিল। মই আচৰিত হৈছিলোঁ আৰু তেওঁক কাৰণ সুধিলোঁ। তেওঁ হাঁহিলে আৰু মোক জনালে যে মই নীটৰ পৰীক্ষাত উত্তীৰ্ণ হৈছোঁ।

এটা সপোন বাস্তৱত পৰিণত হ'ল। মই মোৰ চকুলো ধৰি ৰাখিব পৰা নাছিলোঁ। মোক নিয়োগ কৰা ঠিকাদাৰজনৰ অনুমতি লৈ পিছদিনাই মই ঘৰলৈ উভতি আহিলোঁ।' তিনিমাহ বেংগালুৰুত কাম কৰি ছাত্ৰজনে ৪৫,০০০ উপার্জন কৰে, আৰু তাৰে ২৫,০০০ সঞ্চয় কৰে। প্ৰব্ৰজনকাৰী শ্ৰমিকৰূপে তেওঁৰ বেংগালুৰু যাত্ৰাৰ বিষয়ে সাংবাদিকে প্রশ্ন কৰাত সাবৰে কয়- 'মোৰ কোনো বিকল্প নাছিল। পৰিয়ালক সহায় কৰাৰ প্ৰয়োজন আছিল। তেওঁ আৰু কয়, 'মই পাঁচজনীয়া অতি দৰিদ্ৰ পৰিয়ালৰ সন্তান। নীটৰ পৰীক্ষা শেষ হোৱাৰ পাছত মই মোৰ পৰিয়ালক সহায় কৰিবলৈ কিছু ধন উপাৰ্জনৰ সিদ্ধান্ত ল'লোঁ। মই স্থানীয় এজন ঠিকাদাৰৰ সৈতে যোগাযোগ কৰিলোঁ আৰু তেওঁ মোক বেংগালুৰুলৈ পঠিয়াই দিলে। মই কৰা সঞ্চয়ে মোক মেডিকেল কলেজত নামভৰ্তি কৰাত সহায় কৰিলে।' প্রথমে সাবৰে আৰক্ষী বিষয়া হোৱাৰ সপোন দেখিছিল। কিন্তু উচ্চতৰ অধ্যয়নৰ বাবে প্রস্তুতি চলোৱাৰ সময়তে চিকিৎসক হ'বলৈ মন মেলিলে। এতিয়া শুভমৰ পিতৃ-মাতৃ সহদেৱ আৰু ৰংগী দুয়োগৰাকীয়ে আশা কৰিছে যে তেওঁৰ পুত্ৰই যাতে পাঁচবছৰীয়া এম বি বি এছ পাঠ্যক্ৰম সমাপ্ত কৰিব পাৰে, তাৰ বাবে যেন চৰকাৰে আৰ্থিক সাহায্য আগবঢ়ায়।

উল্লেখযোগ্য যে এইবছৰৰ নীট-ইউ জি পৰীক্ষাৰ প্ৰশ্নকাকত যথেষ্ট টান হোৱা বুলি শিক্ষার্থীসকলে অভিযোগ কৰিছিল। পৰীক্ষাত অৱতীৰ্ণ হৈছিল ২২.০৯ লাখ পৰীক্ষার্থী আৰু উত্তীর্ণ হৈছিল প্রায় ১২.৩৬ লাখ। এই সংখ্যা আছিল যোৱা বছৰতকৈ কম। মন কৰিবলগীয়া যে চৰকাৰী আৰু বেচৰকাৰী চিকিৎসা মহাবিদ্যালয় মিলাই দেশত এম বি বি এছ পাঠ্যক্ৰমত (নামভৰ্তিৰ বাবে) মুঠ ১,০৮,০০০ আসন আছে।

Share This