প্রচণ্ড গ্রীষ্ম প্ৰৱাহৰ কবলত উত্তৰ ভাৰতৰ ৬খন ৰাজ্য

dainik janambhumi June 11, 2025

ডিজিটেল ডেস্কঃ সমগ্ৰ উত্তৰ ভাৰত প্রচণ্ড গ্রীষ্ম প্ৰৱাহৰ কবলত পৰিছে। উত্তৰ ভাৰতৰ ৬খন ৰাজ্য ক্রমে ৰাজস্থান, হাৰিয়ানা, উত্তৰ প্ৰদেশ, মধ্য প্রদেশ, দিল্লী আৰু উত্তৰ প্ৰদেশৰ ১৮খন মহানগৰৰ তাপমাত্রা ৪৫ ডিগ্রী চেলছিয়াছৰ অধিক হৈছে। দেশৰ ভিতৰত সৰ্বাধিক গৰম পৰিছে ৰাজস্থানৰ শ্ৰীগংগানগৰত। শ্রীগংগানগৰত কালি সর্বোচ্চ তাপমাত্রা ৪৭.৩ ডিগ্রী চেলছিয়াছ আছিল।

ইফালে ভাৰতীয় বতৰ বিজ্ঞান বিভাগে দিল্লী-ৰাষ্ট্ৰীয় ৰাজধানী অঞ্চল, পঞ্জাব, হাৰিয়ানা, ৰাজস্থান, মধ্য প্রদেশ আৰু উত্তৰ প্ৰদেশৰ অধিকাংশ অঞ্চল প্রচণ্ড গ্রীষ্ম প্ৰৱাহৰ কবলত পৰিব বুলি সতৰ্ক কৰি দিয়ে।

এই ৰাজ্যকেইখনত অহা দুদিন প্রচণ্ড গৰমে জনসাধাৰণক জলা-কলা খুওৱাৰ আশংকা কৰা হৈছে। ৰাজধানী দিল্লীৰ অধিকাংশ অঞ্চলতে কালি সর্বোচ্চ তাপমাত্রা ৪৫ ডিগ্রী চেলছিয়াছৰ কাষ চাপে। 

আই এম ডিয়ে প্রকাশ কৰা তথ্য মতে, দিল্লীৰ ৰিজ অঞ্চলত সর্বোচ্চ তাপমাত্রা ৪৪.৯ ডিগ্রী চেলছিয়াছ আছিল। ইয়াৰ উপৰি ছফদৰজঙত ৪৩.৪ ডিগ্রী, পালমত ৪৪.৩ ডিগ্রী চেলছিয়াছ, আয়া নগৰত ৪৫.৩ ডিগ্রী চেলছিয়াছ আছিল। আই এম ডিৰ মতে দিল্লীত বৃহস্পতিবাৰলৈকে সর্বোচ্চ তাপমাত্রা ৪৪-৪৫ ডিগ্রী চেলছিয়াছৰ ভিতৰত থাকিব। 

ৰাজস্থানত গ্রীষ্ম প্রৱাহে সর্বাধিক প্ৰভাৱিত কৰিছে জৈছলমেৰ, বাড়মেৰ, যোধপুৰ, পালীৰ দৰে পশ্চিমৰ জিলাসমূহক। 

আনহাতে হাৰিয়ানাৰ ছিৰছাত সোমবাৰে সর্বোচ্চ তাপমাত্রা ৪৬.৪ ৬.৪ ডিগ্রী চেলছিয়াছ আছিল। ৰাজ্যখনৰ ছয়খন জিলাত তাপমাত্রা ৪৪ ডিগ্রী চেলছিয়াছৰ অধিক হৈছে। উত্তৰ প্ৰদেশৰ ঝান্সীত সর্বাধিক গৰম পৰিছে। ঝান্সীত মঙলবাৰে বিয়লি ১ বজাত তাপমাত্রা আছিল ৪৪ ডিগ্রী চেলছিয়াছ। বাৰাণসীত তাপমাত্রা ৪৩.৮ ডিগ্রী হৈছে। কাশী বিশ্বনাথ মন্দিৰ দৰ্শনৰ বাবে অহা ভক্তসকলক অ' আৰ এছ দিয়াৰ ব্যৱস্থা কৰা হৈছে। পঞ্জাবো গ্রীষ্ম প্ৰৱাহৰ কবলত পৰিছে। ৰাজ্যখনত তাপমাত্রা স্বাভাৱিক অৱস্থাতকৈ ৩.৮ ডিগ্রীতকৈ অধিক হৈছে। হিমাচল প্ৰদেশৰ চাৰিখন জিলাত গ্রীষ্ম প্ৰৱাহ চলি আছে আৰু সর্বোচ্চ তাপমাত্রা ৪০ ডিগ্রীতকৈ অধিক হৈছে। মধ্য প্রদেশৰ ভূপাল, ইন্দোৰ আৰু উজ্জয়িনীসহ কেইবাখনো জিলাত গ্ৰীষ্ম প্ৰৱাহৰ সতৰ্কতা জাৰি কৰা হৈছে।

Share This