এইজন অভিনেতাই কৰিব সৌৰভ গাংগুলীৰ বায়'পিকত মুখ্য অভিনয় 

Kakali Deka February 23, 2025

ডিজিটেল ডেস্ক: বিচিচিআইৰ প্ৰাক্তন সভাপতি তথা ভাৰতীয় ৰাষ্ট্ৰীয় ক্ৰিকেট দলৰ প্ৰাক্তন অধিনায়ক সৌৰভ গাংগুলীয়ে শেহতীয়াকৈ তেওঁৰ বহু প্ৰত্যাশিত বায়’পিক সম্পৰ্কে এটা আপডেট শ্বেয়াৰ কৰিছে। 

তেওঁ প্ৰকাশ কৰে যে বলীউডৰ অভিনেতা ৰাজকুমাৰ ৰাওৱে ছবিখনত তেওঁৰ চৰিত্ৰত অভিনয় কৰিব। বিগত কেইবছৰমানৰ পৰা আয়ুষ্মান খুৰানা, ৰণবীৰ কাপুৰ আদিকে ধৰি কেইবাটাও নাম বায়’পিকখনৰ সম্ভাৱ্য লিড হিচাপে উত্থাপন কৰা হৈছিল। অৱশ্যে এতিয়া সৌৰভ গাংগুলীয়ে নিজেই নিশ্চিত কৰিছে যে ৰাজকুমাৰ ৰাৱে ছবিখনত তেওঁৰ চৰিত্ৰত অভিনয় কৰিব।

বৃহস্পতিবাৰে পশ্চিম বংগৰ বৰ্ধমানত সংবাদ মাধ্যমৰ সৈতে হোৱা কথা-বতৰাত সৌৰভ গাংগুলীয়ে এই ঘটনা সন্দৰ্ভত এইদৰে কয়। তেওঁ লগতে প্ৰকাশ কৰে যে সময়সূচীৰ সমস্যাৰ বাবে বায়’পিকখন মুক্তি পাবলৈ এবছৰতকৈও অধিক সময় লাগিব। 

ৰাজকুমাৰ ৰাওৰ কেইবাটাও আকৰ্ষণীয় প্ৰকল্প চলি আছে। বাৰাণসীত নিৰ্মিত এক অনন্য টাইম-লুপ ছবি ‘ভূল চুকে মাফ’ৰ বাবে তেওঁ মেডক ফিল্মছৰ দীনেশ বিজানৰ সৈতে পুনৰ মিলিত হ’ব, য’ত বামিকা গাব্বীয়েও সহ অভিনয় কৰিব। কিছুদিন পূৰ্বে মুক্তি লাভ কৰিছিল ছবিখনৰ টিজাৰ। কৰণ শৰ্মাৰ পৰিচালনাৰে নিৰ্মিত এই ছবিখন ২০২৫ চনৰ ১০ এপ্ৰিলত মুক্তি পাব। বাৰাণসীত পৰিৱেশিত এই ছবিখনে সৰু চহৰৰ ৰোমাঞ্চৰ সাৰমৰ্ম উপস্থাপন কৰিছে। 

ইয়াৰ উপৰি ২০২৫ চনৰ ২০ জুনত ছবিগৃহত মুক্তি পাবলগীয়া তেওঁৰ আগন্তুক একচন থ্ৰিলাৰ ‘মালিক’ত গেংষ্টাৰৰ চৰিত্ৰত অভিনয় কৰিবলৈ সাজু হৈছে ৰাজকুমাৰ। পত্নী পাত্ৰলেখাৰ সৈতে আৰম্ভ কৰা প্ৰডাকচন হাউটোও ঘোষণা কৰে অভিনেতাগৰাকীয়ে। প্ৰডাকচন হাউছৰ প্ৰথম প্ৰজেক্ট হ’ব ৰাও, সন্যা মালহোত্ৰা, অভিষেক বেনাৰ্জী, অৰ্চনা পুৰাণ সিং আদি অভিনীত নেটফ্লিক্স ছবি ‘ট’ষ্টাৰ’।


উৎসঃ প্ৰাগ নিউজ ডিজিটেল
 

Share This