মহিলা বিশ্ব কাপৰ ফাইনেলত দঃ আফ্রিকা

dainik janambhumi October 30, 2025

ডিজিটেল ডেস্ক : দক্ষিণ আফ্রিকাই প্রথমবাৰলৈ মহিলাৰ এদিনীয়া বিশ্ব কাপৰ ফাইনেলত প্রৱেশ কৰিছে। ল'ৰা উলভাৰ্টৰ অধিনায়কোচিত বেটিঙৰ সহায়ত দক্ষিণ আফ্রিকাই কালি বর্ষাপাৰা ষ্টেডিয়ামত অনুষ্ঠিত চলিত বিশ্ব কাপৰ প্ৰথম ছেমি ফাইনেলত ইংলেণ্ডক ১২৫ ৰানত হৰুৱাই খিতাপৰ যুঁজলৈ আগবাঢ়ে। প্রথমে বেট ধৰি দক্ষিণ আফ্রিকাই উলভাৰ্টৰ ১৪৩টা বলত ১৬৯ ৰানৰ জৰিয়তে ৭টা উইকেট হেৰুৱাই ৩১৯ ৰান কৰে। প্রত্যুত্তৰত ৪ বাৰৰ চেম্পিয়ন ইংলেণ্ডে ৪২.৩ অ'ভাৰত ১৯৪ ৰানত কেউটা উইকেট হেৰুৱায়। 

দক্ষিণ আফ্রিকাৰ নিয়ন্ত্রিত বলিঙত তিষ্ঠিব নোৱৰা ইংলেণ্ডৰ ইনিংছত অধিনায়িকা নেট স্কাইভা ব্ৰাণ্টে সৰ্বাধিক ৬৪, এলিছা কেপছেই ৫০, ডেনিয়েলা বাইয়াটে-হজে ৩৪ আৰু লিনছে স্মিথে ২৭ ৰানৰ উল্লেখনীয় বৰঙনি যোগায়। দক্ষিণ আফ্রিকাৰ মাৰিয়ানা কেপে ২০ ৰানত সর্বাধিক ৫টা আৰু নাডিন ডে'ক্লার্কে দুটা উইকেট লাভ কৰে। ইয়াৰ আগেয়ে ল'ৰা উলভার্টৰ দুৰন্ত ১৬৯ ৰানৰ জৰিয়তে দক্ষিণ আফ্রিকাই প্রথমে বেট ধৰি ৭টা উইকেট হেৰুৱাই ৩১৯ ৰানৰ প্ৰত্যাহ্বানমূলক স্ক'ৰ থিয় কৰিছিল। 

বেটিং মুকলি কৰা অধিনায়িকা উলভার্টে মাথোঁ ১৪৩ টা বলত ২০টা চাৰি আৰু ৪টা ছয়েৰে আকর্ষণীয় শতৰানেৰে প্ৰায় অকলেই দলৰ বৃহৎ স্ক'ৰৰ ভেটি গড়ে। উলভাৰ্টৰ উপৰি তাজমিন ব্রিটছে ৬৫টা বলত ৪৫ আৰু মাৰিয়ানা কেপে ৩৩টা বল খেলি ৪২ ৰান কৰে। শেষৰ ফালে চ'লে টাইবনব ২৬টা বলত অপৰাজিত ৩৩ ৰানেৰে দক্ষিণ আফ্রিকাই স্ক'ৰ ৩০০ ৰানৰ সীমা পাৰ কৰে। ইংলেণ্ডৰ বাঁওহতীয়া স্পীনাৰ ছোফী ইকলেষ্টনে ৪৪ ৰানত সর্বাধিক ৪টা উইকেট লাভ কৰে।

Share This