দক্ষিণ আফ্ৰিকা ছেমি ফাইনেলত 

dainik janambhumi March 02, 2025

ডিজিটেল ডেস্ক: দক্ষিণ আফ্রিকাই ইংলেণ্ডক সাত উইকেটত হৰুৱাই আই চি চি চেম্পিয়নছ ট্ৰফীৰ ছেমি ফাইনেলত স্থান নিশ্চিত কৰে। ইয়াৰ লগে লগে আফগানিস্তানৰ ছেমি ফাইনেলৰ আশাও ধূলিসাৎ হৈ পৰে। দক্ষিণ আফ্ৰিকাৰ উপৰি ভাৰত, নিউজিলেণ্ড আৰু অষ্ট্ৰেলিয়াই ছেমি ফাইনেল খেলিব। কালিৰ মেচখনত ইংলেণ্ড বৃহৎ ব্যৱধানত জয়ী হোৱা হ'লে আফগানিস্তানে ছেমি ফাইনেল খেলাৰ যোগ্যতা অৰ্জন কৰিলেহেঁতেন, কিন্তু ইংলেণ্ডে সকলো উইকেট হেৰুৱাই ১৭৯ ৰান সংগ্ৰহ কৰাৰ লগে লগে আফগানিস্তানৰো ছেমি ফাইনেলৰ আশা নোহোৱা হৈ পৰে। 

কালিৰ মেচখনত ইংলেণ্ডে প্রথমে বেটিং কৰি ৩৮.২ অ'ভাৰত সকলো উইকেট হেৰুৱাই মাত্র ১৭৯ ৰান সংগ্ৰহ কৰে। প্ৰত্যুত্তৰত দক্ষিণ আফ্রিকাই ২৯.১ অ'ভাৰত তিনিটা উইকেট হেৰুৱাই ১৮১ ৰান সংগ্ৰহ কৰি সাত উইকেটত জয়লাভ কৰে। দক্ষিণ আফ্রিকাই মাত্র ১১ ৰানতে অপেনাৰ তৃষ্টান ষ্টাব্‌ছৰ (০) উইকেটটো হেৰুৱায়। আনজন অ'পেনাৰ ৰিয়ান ৰিকলটনে (২৭) বিদায় লোৱাৰ সময়ত দলৰ স্ক'ৰ আছিল ৪৭। সেই সময়তে ৰাছি ভান ডেৰ ডুছান আৰু হেনৰিক ক্লাছেনে তৃতীয় উইকেটত ১২৭ ৰান সংগ্ৰহ কৰি দলৰ জয়ৰ ভেটি ৰচনা কৰে। ডুছানে ৮৭টা বলত ৬টা চাৰি আৰু ৩টা ছয়েৰে ৭২ ৰান কৰি অপৰাজিত হৈ থাকে। আৰু ক্লাছেনে ৫৬টা বলত ১১টা চাৰিৰে ৬৪ ৰান কৰে। ইয়াৰ আগতে দক্ষিণ আফ্রিকাৰ বলিং আক্ৰমণৰ সন্মুখত তিষ্ঠিব নোৱাৰি ইংলেণ্ডৰ বেটাৰসকলে সহজেই আত্মসমর্পণ কৰে। 

দলৰ হৈ সর্বাধিক ৩৭ ৰান কৰে জ' ৰুটে। দক্ষিণ আফ্রিকাই তিনিখন মেচৰ পৰা ৫ পইন্ট সংগ্রহ কৰি গ্ৰুপ-বিত শীর্ষ স্থান লাভ কৰে। ইয়াৰে দুখন মেচত দল জয়ী হয়। আৰু এখন মেচ বৰষুণৰ বাবে পৰিত্যক্ত হয়। আনহাতে, অষ্ট্ৰেলিয়াই চাৰি পইণ্টেৰে দ্বিতীয় স্থান লাভ কৰে। প্রতিযোগিতাৰ ছেমি ফাইনেলত কোনে কাৰ বিৰুদ্ধে প্রতিদ্বন্দ্বিতা কৰিব সেইটো আজি ভাৰত আৰু নিউজিলেণ্ডৰ মেচখনৰ জৰিয়তে নিৰ্ধাৰিত হ'ব। এই মেচখনত ভাৰত জয়ী হ'লে গ্রুপ-এত শীর্ষ স্থান দখল কৰিব আৰু ছেমি ফাইনেলত অষ্ট্ৰেলিয়াৰ বিৰুদ্ধে খেলিব। যদি মেচখনত নিউজিলেণ্ড জিকে তেতিয়া দলটোৱে অষ্ট্ৰেলিয়াৰ বিৰুদ্ধে খেলিব। গ্রুপ-এত দ্বিতীয় স্থান লাভ কৰা দলটোৰ ছেমি ফাইনেলৰ প্রতিদ্বন্দ্বী হ'ব দক্ষিণ আফ্রিকা।

Share This