তোলনি বিয়াত মাছ-মাংসৰে আপ্যায়ন কৰি এঘৰীয়া হ’ল এটা পৰিয়াল ; পুনৰ বিতৰ্কত শ্ৰীমন্ত শঙ্কৰদেৱ সঙ্ঘ

Kakali Deka February 23, 2025

ডিজিটেল ডেস্কঃ পুনৰ বিতৰ্কত শ্ৰীমন্ত শঙ্কৰদেৱ সঙ্ঘ৷ গহপুৰৰ চন্দ্ৰ বৰুৱাৰ বিতৰ্কৰ অন্ত নৌপৰোতেই আকৌ আন এক নতুন বিতৰ্কত শ্ৰীমন্ত শঙ্কৰদেৱ সঙ্ঘ৷ এইবাৰ এঘৰীয়া কৰাৰ নামত এগৰাকী বৃদ্ধাক মানসিক হাৰাশাস্তি চলোৱাৰ অভিযোগ শঙ্কৰদেৱ সঙ্ঘৰ বিৰুদ্ধে৷

শ্ৰীমন্ত শঙ্কৰদেৱ সঙ্ঘৰ বিৰুদ্ধে ক্ষোভ যোৰহাটৰ এটা পৰিয়ালৰ ৷ শ্ৰীমন্ত শঙ্কৰদেৱ সঙ্ঘৰ মতে এই পৰিয়ালটোৱে কৰিছে এটা মহাভুল ৷ পৰিয়ালটোৰ ভুল কন্যাৰ তোলনি বিয়াত আমিষ খাদ্যৰে ৰাইজক আপ্যায়ন৷ আমিষ খাদ্যৰ ভোজ দিয়াৰ বাবে এবছৰৰ বাবে শঙ্ঘই এঘৰীয়া কৰিলে পৰিয়ালটোক৷

পৰিয়ালটোৰ অভিযোগ অনুসৰি, শ্ৰীমন্ত শঙ্কৰদেৱ সঙ্ঘৰ নিয়ম অনুসৰিয়েই প্ৰথমে সকলো কৰ্ম সম্পাদন কৰা হৈছিল৷
তাৰ এমাহৰ পাছত ৰাইজক আমিষ পাৰ্টি দিছিল পৰিয়ালটোৱে৷ অৱশ্য সঙ্ঘৰ নীতি-নিয়মৰ বাবেই নাতিনীয়েকৰ তোলনি বিয়ালৈ যোৱা নাছিল আইতাক ৰাণু বৰুৱা আৰু পৰিয়ালটোৰ অন্য কোনো সদস্য৷

২০২৪ বৰ্ষৰ আগষ্ট মাহত এখন পত্ৰযোগে ৰাণু বৰুৱা নামৰ বৃদ্ধাগৰাকীক শ্ৰীমন্ত শঙ্কৰদেৱ সঙ্ঘই এবছৰৰ বাবে তেওঁলোকৰ ঘৰত কোনো ধৰণৰ ধৰ্মীয় অনুষ্ঠান নকৰাৰ কথা সদৰী কৰিছিল ৷ তাৰ পাছৰেই পৰা সংঘক পৰিয়ালটোৱে কেইবাখনো পত্ৰ প্ৰেৰণ কৰিও নাপালে কোনো উত্তৰ৷ যাৰ বাবে মানসিকভাৱে অশান্তিত ভোগা পৰিয়ালটোৱে আইনৰ দ্বাৰস্থ হ’ব বুলি প্ৰকাশ কৰিছে৷

উৎসঃ প্ৰাগ নিউজ ডিজিটেল

 

Share This