ৰাজ্য চৰকাৰে পুনৰ ল'ব ১,৮৫০ কোটিৰ ঋণ

Dainik janambhumi February 22, 2025

ডিজিটেল ডেস্ক: ঋণ নল'লে নচলা হৈছে ৰাজ্য। সেয়েহে, মুখ্যমন্ত্রী ড° হিমন্ত বিশ্ব শৰ্মাৰ নেতৃত্বাধীন ৰাজ্য চৰকাৰখনে প্রতি মাহে হাজাৰ হাজাৰ কোটি টকাৰ ঋণ লৈ আছে। যোৱা ১৮ ফেব্ৰুৱাৰীত চৰকাৰী ষ্টক (ছিকিউৰিটি) নিলামৰ জৰিয়তে ৯০০ কোটি টকাৰ ঋণ লোৱা চৰকাৰখনে এইবাৰ পুনৰ ২৫ ফেব্ৰুৱাৰীত ১৮৫০ কোটি টকাৰ ঋণ লোৱাৰ বাবে আগবাঢ়িছে। বিত্ত বিভাগৰ এটা সূত্ৰই প্ৰকাশ কৰা মতে, দুটা পৰ্যায়ত ল'বলগীয়া ঋণৰ প্ৰথম পৰ্যায়ত ৯০০ কোটি টকাৰ ঋণ পোন্ধৰ বছৰৰ বাবে আৰু দ্বিতীয় পৰ্যায়ত ৯৫০ কোটি টকাৰ ঋণ চৰকাৰী ষ্টক (ছিকিউৰিটি) নিলামৰ জৰিয়তে লোৱাৰ সিদ্ধান্ত লৈছে।

 উল্লেখযোগ্য যে জানুৱাৰী মাহত দুটা পৰ্যায়ত মুঠ ১০০০ কোটি টকাৰ ঋণ লোৱা চৰকাৰখনে যোৱা ৪ ফেব্ৰুৱাৰীতো ৯০০ কোটি টকাৰ ঋণ লৈছিল। ইয়াৰ পাছত এটা পষেক নৌহওতেই ৰাজ্য চৰকাৰখনে ১৮ ফেব্ৰুৱাৰীত পুনৰ ৯০০ কোটি টকাৰ ঋণ লৈ এতিয়া আকৌ ১৮৫০ কোটি টকাৰ ঋণ লোৱাৰ বাবে আগবঢ়া কার্য লক্ষণীয় হৈ পৰিছে। সূত্ৰটোৰ মতে, অহা মার্চ মাহত চলিত বিত্তীয় বর্ষ শেষ হ'ব, সেয়েহে ইয়াৰ পূৰ্বে ল'ব লগীয়া সকলো ঋণ লোৱাৰ বাবে লক্ষ্য স্থিৰ কৰিছে ৰাজ্য চৰকাৰখনে।

 ইফালে, এনেদৰে প্ৰতি মাহে হাজাৰ হাজাৰ কোটি টকা ঋণ লোৱাৰ ফলত যোৱা মাৰ্চলৈকে ৰাজ্যখনৰ মুঠ ঋণৰ পৰিমাণ বৃদ্ধি পাই হৈছেগৈ ১,৫০,৯০০ কোটি টকা। চলিত বিত্তীয় বর্ষ সমাপ্ত হোৱালৈ এই ঋণৰ পৰিমাণ ১,৬৭,০০০ কোটি টকা হোৱাৰ সম্ভাৱনা আছে। ইফালে, ৰাজ্য চৰকাৰখনে প্রতি মাহে লোৱা ঋণৰ ধন ভোটৰ অংকত হিতাধিকাৰী সৃষ্টিকাৰী আঁচনিত ব্যয় কৰা বুলি বিৰোধীয়ে অভিযোগ উত্থাপন কৰি আহিছে। কিন্তু বিৰোধীৰ এই অভিযোগক কোনো ধৰণৰ গুৰুত্ব নিদি মুখ্যমন্ত্রী ড° শৰ্মাই প্রতি মাহে হাজাৰ হাজাৰ কোটি টকাৰ ঋণ লোৱাতহে গুৰুত্ব দি আহিছে।

Share This