দাক্ষিণাত্যৰ ৰাজ্যসমূহত প্ৰবল বতাহ-বৰষুণ, শ্রীলংকাত ধ্বংসলীলা চলাই 'দিতৱা' ভাৰতলৈ অগ্ৰসৰ

dainik janambhumi November 30, 2025

ডিজিটেল ডেস্ক : শ্রীলংকাত ধ্বংসলীলা চলোৱাৰ পাছত শনিবাৰে ঘূৰ্ণি বতাহ (চাইক্ল'ন) দিতৱা ভাৰতৰ ফালে তীব্রবেগে আগ বাঢ়িছে। দেওবাৰে পুৱা এই দিতৱাই তামিলনাডু, পুডুচেৰী আৰু দক্ষিণ অন্ধ্র প্রদেশত আঘাত কৰাৰ আশংকা আছে। শনিবাৰে তামিলনাডু, অন্ধ্র প্রদেশ আৰু পুডুচেৰীৰ উপকূলীয় অঞ্চলত প্ৰচুৰ বৰষুণৰ সৈতে প্রবল বতাহ বলিবলৈ আৰম্ভ কৰে। 

প্ৰবল বৰষুণৰ বাবে তামিলনাডুত ৫৪খন বিমানৰ যাতায়াত বাতিল কৰা হয়। এই অঞ্চলসমূহত বিদ্যালয়-মহাবিদ্যালয়সমূহ সোমবাৰলৈকে বন্ধ থাকিব। এই অঞ্চলবোৰত দুর্যোগ ব্যৱস্থাপনাৰ ২৮টা দল মোতায়েন কৰা হৈছে। ইফালে, এই পর্যন্ত শ্রীলংকাত ঘূর্ণি বতাহ দিতৱাত ১৫৩জন নিহত হৈছে আৰু ১৩০জন সন্ধানহীন হৈ আছে। আনহাতে থাইলেণ্ডৰ প্ৰধানমন্ত্ৰী আনুটিন চাৰ্নভিৰাকুলে শনিবাৰে জনোৱা মতে দিতৱাৰ বাবে দেশখনত মৃত্যু হোৱা লোকৰ সংখ্যা হৈছে ১৬২জন। 

দেশখনৰ ১২খন প্রদেশত প্রবল বৰষুণৰ বাবে হোৱা বানত ১৪ লাখতকৈ অধিক পৰিয়াল আৰু ৩৮ লাখতকৈ অধিক লোক প্রভাৱান্বিত হৈছে। তেনেদৰে ইণ্ডোনেছিয়াত দিতৱাৰ বাবে মৃত্যু হোৱা লোকৰ সংখ্যা শনিবাৰে ২৭৯জনলৈ বৃদ্ধি পাইছে। আনহাতে দেশখনত ১৭৪জন লোক এতিয়াও সন্ধানহীন হৈ আছে। উল্লেখযোগ্য যে ঘূর্ণি বতাহ 'দিতৱা' নামটো য়েমেন দেশৰ পৰামৰ্শমতে দিয়া হৈছে। ইয়াৰ অৰ্থ হৈছে 'লেগুন' (সমুদ্র সংলগ্ন বলয়াকাৰ হ্ৰদ)। ভাৰত মহাসাগৰত থকা য়েমেনৰ দ্বীপ ছ'ক'ট্ৰাৰ উত্তৰ-পশ্চিমত থকা 'দেতৱা লেগুন'ৰ পৰাই এই নাম অহাৰ সম্ভাৱনা আছে।

Share This