ডিজিটেল ডেস্ক: মহাকাশত মুঠ ৬২ ঘণ্টা ৬ মিনিট খোজকাঢ়ি (স্পেচৱাক) ভাৰতীয় মূলৰ মহাকাশচাৰী সুনীতা উইলিয়ামছে ভংগ কৰিলে এগৰাকী মহিলাই ইয়াৰ পূৰ্বে সৃষ্টি কৰা অভিলেখ। ২০২৪ চনৰ জুনৰ পৰা আন্তঃৰাষ্ট্ৰীয় মহাকাশ কেন্দ্রত (আই এছ এছ) থকা উইলিয়ামছ আৰু তেওঁৰ সতীর্থ বুচ্চ উইলম'ৰে বৃহস্পতিবাৰে মহাকাশত খোজ কাঢ়িছিল।
বেয়া হোৱা বেতাঁৰ যোগাযোগৰ হার্ডৱেৰ আঁতৰাবলৈ আৰু কক্ষপথত ঘূৰি থকা পৰীক্ষাগাৰৰ বাহিৰৰ মাইক্ৰ'অর্গেনিজম থাকে নেকি সেয়া চাবলৈ নমুনা সংগ্ৰহ কৰিবলৈ দুয়োজনে আই এছ এছৰ বাহিৰলৈ গৈছিল। তেওঁলোকৰ স্পেচৱাক আৰম্ভ হৈছিল পুৱা ৭-৪৩ বজাত (ই টি) আৰু অন্ত পৰিছিল বিয়লি ১-০৮ বজাত।
তেওঁলোকে ৫ ঘণ্টা ২৬ মিনিট মহাকাশত খোজকাঢ়িছিল। ই আছিল উইলিয়ামছৰ নৱম আৰু উইলম'ৰৰ পঞ্চম স্পেচৱাক। ইয়াকে ধৰি সুনীতা উইলিয়ামছে মহাকাশত খোজকঢ়া সময় হ'ল ৬২ ঘণ্টা ৬ মিনিট। ইয়াৰ আগতে প্রাক্তন মহাকাশচাৰী পেগী হুইটছনে মুঠ ৬০ ঘণ্টা ২১ মিনিট স্পেচৱাক কৰি অভিলেখ সৃষ্টি কৰিছিল।