দিব্যাংগও হ'ব পাৰিব ন্যায়াধীশ 

dainik janambhumi March 04, 2025

ডিজিটেল ডেস্ক: উচ্চতম ন্যায়ালয়ে সোমবাৰে এটা ঐতিহাসিক ৰায়ত কয় যে কোনো এজন যোগ্য ব্যক্তিক কেৱল তেওঁৰ শাৰীৰিক অক্ষমতাৰ কাৰণেই ন্যায়িক সেৱাত ভর্তি হোৱাৰ পৰা বঞ্চিত কৰিব নোৱাৰি। দেশৰ সৰ্বোচ্চ আদালতে ৰায়টোত কয় যে দিব্যাংগ ব্যক্তিৰ প্ৰতি ন্যায়িক সেৱাৰ পৰীক্ষাত কোনো ধৰণৰ ভেদভাব ৰাখিব নালাগে আৰু চৰকাৰে তেওঁলোকৰ বাবে উপযুক্ত পৰিৱেশৰ সৃষ্টি কৰিবলৈ ইতিবাচক পদক্ষেপ গ্রহণ কৰা উচিত। 

উচ্চতম ন্যায়ালয়ৰ ন্যায়াধীশদ্বয় জে বি পাৰদিবালা আৰু আৰ মহাদেৱনক লৈ গঠিত এখন বিচাৰপীঠে এই ঐতিহাসিক ৰায় দি কয় যে কোনো এজন প্রার্থীক কেৱল তেওঁৰ দিব্যাংগতাৰ কাৰণেই ন্যায়িক সেৱাৰ পৰা বঞ্চিত কৰিব নোৱাৰে। সকলো যোগ্য দিব্যাংগ প্রার্থীক উপযুক্ত সুযোগ আৰু সুবিধা দিয়া উচিত। বিচাৰপীঠে কালি এই ৰায়টোৰ যোগেদি দিব্যাংগ প্রার্থীৰ ক্ষেত্ৰত মধ্য প্রদেশৰ ন্যায়িক সেৱা পৰীক্ষাৰ ক্ষেত্ৰত থকা নিয়ম বাতিল কৰে। উক্ত নিয়মৰ অধীনত দৃষ্টিহীন আৰু কম দৃষ্টিসম্পন্ন প্রার্থী ন্যায়িক সেৱাৰ পৰীক্ষাত অৱতীৰ্ণ হ'ব নোৱাৰিছিল। উক্ত ৰায়টোৰ পাছত এতিয়া যোগ্য দৃষ্টি শক্তিহীন ব্যক্তিও ন্যায়াধীশ হ'ব পাৰিব। উচ্চতম ন্যায়ালয়ে ৰায়টোত এই কথাত গুৰুত্ব আৰোপ কৰে যে ন্যায়িক সেৱাৰ বাছনী পৰীক্ষাত কাট-অফ বা অন্য বাধাৰ দৰে পৰোক্ষ ভেদভাব অন্ত পেলাব লাগে, যাতে প্রকৃত সমতা সুনিশ্চিত কৰিব পাৰি।

বিচাৰপীঠখনে মধ্য প্রদেশৰ ন্যায়িক সেৱাৰ নিয়মত থকা প্রথম প্রয়াসত ন্যূনতম ৭০% নম্বৰ লাভ কৰা বা ন্যূনতম তিনি বছৰৰ ওকালতি কৰাৰ অভিজ্ঞতাৰ প্ৰয়োজন হোৱাৰ ব্যৱস্থাকো বাতিল কৰে। এতিয়া কেৱল ন্যূনতম শৈক্ষিক অৰ্হতাৰ ক্ষেত্রতহে প্রযোজ্য হ'ব। উল্লেখযোগ্য যে এই গোচৰটোৰ শুনানি আৰম্ভ হয় প্রাক্তন মুখ্য ন্যায়াধীশ ডি ৱাই চন্দ্রচূড়লৈ দৃষ্টিশক্তি দুৰ্বল এগৰাকী প্ৰাৰ্থীৰ মাতৃয়ে প্ৰেৰণ কৰা এখন পত্ৰৰ পাছত। উচ্চতম ন্যায়ালয়ে এই পত্রখন সংবিধানৰ ৩২ নম্বৰ অনুচ্ছেদৰ অধীনত আৱেদনলৈ সলনি কৰিছিল আৰু এই সম্পর্কত মধ্য প্রদেশ উচ্চ ন্যায়ালয়, ৰাজ্য চৰকাৰ আৰু কেন্দ্ৰীয় চৰকাৰলৈ জাননী জাৰি কৰিছিল। উচ্চতম ন্যায়ালয়ে যোৱা বছৰ এই কথা লক্ষ্য কৰিছিল যে মধ্য প্রদেশ ন্যায়িক সেৱাৰ পৰীক্ষাত দৃষ্টিহীন বা কম দৃষ্টিশক্তিসম্পন্ন লোকৰ বাবে সংৰক্ষণৰ ব্যৱস্থা নাছিল। ইয়াৰ দ্বাৰা দিব্যাংগ অধিকাৰ আইনৰ ব্যৱস্থাসমূহ উলংঘা কৰা হৈছিল।

Share This