পাকিস্তানৰ অধিনায়কক কৰমৰ্দন নকৰিলে সূর্যকুমাৰে

dainik janambhumi September 10, 2025

ডিজিটেল ডেস্কঃ এছিয়া কাপ ক্রিকেট প্রতিযোগিতাৰ আগে আগে মঙলবাৰে ভাৰতৰ অধিনায়ক সূর্যকুমাৰে পাকিস্তানৰ অধিনায়ক ছলমান আগাক ৰাজহুৱাভাৱে অপদস্থ কৰে। 

উল্লেখযোগ্য যে এইবাৰৰ এছিয়া কাপ টি-২০ ফর্মেটত হ'ব আৰু আজি প্রতিযোগিতা আৰম্ভ হোৱাৰ আগে আগে ইয়াত অংশগ্রহণ কৰা দলকেইটাৰ অধিনায়কসকলৰ এখন সংবাদমেল অনুষ্ঠিত হৈছিল। সংবাদমেলত প্রতিযোগিতাত অংশগ্ৰহণ কৰা আঠটা দলৰ কেউজন অধিনায়কে অংশগ্রহণ কৰে। সংবাদমেলত ভাৰতীয় অধিনায়কজনে ছলমান আগাক কৰা ব্যৱহাৰে সকলোকে আচৰিত কৰি তোলে। সংবাদমেলত সূর্যকুমাৰে পাকিস্তানৰ অধিনায়কজনক সম্পূর্ণৰূপে অৱজ্ঞা কৰে। সূর্যকুমাৰে ছলমানক কোনো ধৰণৰ অভিবাদন নজনালে। ভাৰতীয় অধিনায়কজনে ছলমানক বাদ দি আনকেইজন অধিনায়কৰ সৈতে কৰমৰ্দন কৰাৰ লগতে মত বিনিময়ো কৰে। 

আনহাতে এছিয়ান ক্রিকেট পৰিষদৰ সভাপতি তথা পাকিস্তান ক্রিকেট ব'ৰ্ডৰ অধ্যক্ষ মহছিন নাকভীৰ সৈতে আনুষ্ঠানিকতা ৰক্ষা কৰি সূৰ্যকুমাৰে কৰমৰ্দনহে কৰে। উল্লেখযোগ্য যে পহলগামত সন্ত্রাসবাদীয়ে ২৬জন নিৰীহ পৰ্যটকক হত্যা কৰাৰ পাছত ভাৰত আৰু পাকিস্তানৰ মাজত তীব্র উত্তেজনা চলি আছে। ভাৰতে পাকিস্তানৰ সৈতে সকলো সম্পর্ক ছেদ কৰে। ইয়াৰ প্ৰভাৱ এছিয়া কাপতো দেখা পোৱা গৈছে। ভাৰতে কাইলৈ সংযুক্ত আৰব আমিৰাটৰ (ইউ এ ই) বিৰুদ্ধে মেচখনেৰে প্রতিযোগিতাত অভিযান আৰম্ভ কৰিব। ভাৰতে পাকিস্তানৰ বিৰুদ্ধে খেলিব ১০ ছেপ্টেম্বৰত। প্রতিযোগিতাৰ আয়োজক ভাৰত যদিও খেলসমূহ ইউ এ ইত অনুষ্ঠিত হ'ব।

Share This