টেবুল টেনিছ জয়েৰে অভিযান অসমৰ

Dainik janambhumi February 10, 2025

ডিজিটেল ডেস্ক: উত্তৰাখণ্ডত চলি থকা ৩৮সংখ্যক ৰাষ্ট্ৰীয় ক্রীড়াত অসমৰ পুৰুষ দলে টেবুল টেনিছৰ গ্রুপ মেচত অংশ লৈ প্রথমখন খেলত উত্তৰ প্ৰদেশৰ বিৰুদ্ধে ৩-০ৰ ব্যৱধানত জয়েৰে অভিযান আৰম্ভ কৰিছে। অসমৰ হৈ দলীয় প্রতিদ্বন্দ্বিতাত নমা শাংকব গৌতম বৰুৱাই উত্তৰ প্ৰদেশৰ প্রতিদ্বন্দ্বীক ১১-৭, ৭-১১, ১১-২, ১১-৩-ত পৰাভূত কৰি অসমক ভাল আৰম্ভণি দিয়াৰ পাছত আনগৰাকী অসম সন্তান অগ্নিৱ ভাস্কৰ গোহাঁয়ে প্রতিপক্ষৰ বিৰুদ্ধে ১১-৩, ১১- ৯, ১৩-১১ৰ পোনপটীয়া ব্যৱধানত জয়েৰে অগ্রগতি ২-০ কৰে। 

আনহাতে, অসমৰ শীৰ্ষ খেলুৱৈ প্রিয়ানুজ ভট্টাচার্যই পাঁচটা ছেটৰ মাৰাথন খেলত প্রতিপক্ষক ১১-৯, ৮-১১, ৯-১১, ১২-১০, ১১-৮ত পৰাভূত কৰি অসমক গুৰুত্বপূৰ্ণ জয় দিয়ে। গ্ৰুপৰ বাকী দুখন খেলত অসমে তেলেংগানা আৰু তামিলনাডুৰ বিৰুদ্ধে খেলিব। ইফালে, ৰাষ্ট্ৰীয় ক্ৰীড়াৰ ইতিহাসত অসমৰ বাবে অন্যতম গুৰুত্বপূৰ্ণ বিবেচিত বাতৰিতো হ'ল মহিলা লন বল খেলুৱৈ বনগীতা হাজৰিকাই ৰাজ্যৰ হৈ সৰ্বাধিক ৰাষ্ট্ৰীয় ক্রীড়াত অংশ লৈ অভিলেখ গঢ়াৰ লগতে ভাৰতীয় ক্রীড়াতো এই সফলতাৰে অনন্য কৃতিত্ব অর্জন কৰাটো। চলিত ৩৮সংখ্যক ৰাষ্ট্ৰীয় ক্রীড়াত শনিবাৰে (৮ ফেব্ৰুৱাৰীত) বনগীতাই মহিলাৰ ডাবলছত সতীর্থ নয়নমণি শইকীয়াৰ সৈতে যুটি বান্ধি সোণ লাভ কৰে। 

উল্লেখ্যযোগ্য যে উত্তৰাখণ্ড ৰাষ্ট্ৰীয় ক্রীড়া বনগীতাৰ কেৰিয়াৰৰ ষষ্ঠখন গেমছ। ২০০৭ত গুৱাহাটীত অনুষ্ঠিত ৩৩সংখ্যক ৰাষ্ট্ৰীয় ক্ৰীড়াৰ লন বলত অংশ লৈ বর্ণিল কেৰিয়াৰৰ আৰম্ভণি কৰা বনগীতাই ক্রমাগত ৬খন ৰাষ্ট্ৰীয় ক্রীড়াত অসমক প্রতিনিধিত্ব কৰিলে, লগতে প্রতিখন গেমছতে পদক অর্জন কৰিবলৈও সক্ষম হৈছে। ২০০৭ৰ পৰা ২০২৫লৈ ১৮ বছৰীয়া বিৰামহীন ক্রীড়া যাত্ৰাত বনগীতাই ৰাষ্ট্ৰীয় ক্রীড়াত চাৰিটা সোণৰ লগতে তিনিটা ৰূপৰ পদক জয় কৰিবলৈ সক্ষম হৈছে। গুৱাহাটীৰ অভিষেক ৩৩সংখ্যক ৰাষ্ট্ৰীয় ক্রীড়াত সোণ জয়েৰে কেৰিয়াৰৰ আৰম্ভণি কৰা অসম কন্যাই উত্তৰাখণ্ডতো ৰাজ্যক সোণ দিবলৈ সক্ষম হয়। ইয়াৰ পূৰ্বে ২০১১ৰ ঝাৰখণ্ড আৰু ২০২৩ৰ গোৱা ৰাষ্ট্ৰীয় ক্রীড়াতো তেওঁ সোণ লাভ কৰিছিল। বিপৰীতে ২০১৫ৰ কেৰালা তথা ২০২২ৰ গুজৰাট ৰাষ্ট্ৰীয় ক্ৰীড়াত ৰূপ জয় কৰে। গুৱাহাটীৰ ৩৩সংখ্যক ৰাষ্ট্ৰীয় ক্রীড়াত অংশ লোৱা দুজন খেলুৱৈয়ে এইবাৰ উত্তৰাখণ্ডৰ অসম দলত আছে। এগৰাকী বনগীতা আৰু আনগৰাকী অসম দলৰ চীফ দ্য মিছন অভিজিত ভট্টাচার্য। ইফালে, দেশৰ সৰ্ববৃহৎ ক্রীড়া মহোৎসৱখনৰ এথলেটিকছ ইভেণ্টৰ মহিলাৰ লং জাম্পত প্রতিদ্বন্দ্বিতা কৰা অসমৰ অম্বিকা নাৰ্জাৰীয়ে ৬.০৩ মিটাৰ অতিক্রমী চতুর্থ স্থানত থাকে। অসমে এই পর্যন্ত ৩টা সোণ, ১৫টাকৈ ৰূপ আৰু ব্ৰঞ্জ জয়েৰে পদক তালিকাত ২০সংখ্যক স্থানত আছে।

Share This