১৯৭১ চনৰ জনসংখ্যাৰ ভিত্তিত সমষ্টিৰ সীমা পুনৰ নির্ধাৰণ হ'ব তামিলনাডুত

dainik janambhumi March 06, 2025

ডিজিটেল ডেস্ক: তামিলনাডুৰ শাসকীয় দল ডি এম কে আৰু কেন্দ্ৰীয় চৰকাৰৰ মাজত ৰাজ্যখনত হিন্দী ভাষা আৰোপৰ বিষয়ত তীব্র বিবাদ চলি থকাৰ মাজতে বুধবাৰে মুখ্যমন্ত্ৰী এম কে ষ্টালিনৰ নেতৃত্বত ৰাজ্যখনৰ সকলো ৰাজনৈতিক দলৰ নেতাৰ এখন বৈঠক অনুষ্ঠিত কৰা হয়। এই বৈঠকত ডি এম কেৰ প্ৰধান বিৰোধী দল এ আই এ ডি এম কেৰ প্ৰতিনিধিও উপস্থিত আছিল। বৈঠকখনত ৰাজ্যখনত হিন্দী ভাষা আৰোপ কৰা আৰু সমষ্টিৰ সীমা পুনৰ নিৰ্ধাৰণ আদি বিষয়ত আলোচনা কৰা হয়। বৈঠকত প্রধানমন্ত্রী মোদীলৈ আহ্বান জনায় এটা প্ৰস্তাৱ স্টালিনে উত্থাপন কৰে। প্ৰস্তাৱটোত কোৱা হয় যে যদি ৰাজ্যখনত সমষ্টিৰ সীমা পুনৰ নিৰ্ধাৰণ কৰা হয়, তেনেহ'লে ১৯৭১ চনৰ লোকপিয়ল অনুসৰি হোৱা জনসংখ্যাৰ ভিত্তিত হ'ব লাগিব। 

তদুপৰি সমষ্টিৰ সীমা পুনৰ নিৰ্ধাৰণ কৰোঁতে যদি সাংসদৰ সংখ্যা বৃদ্ধি পাই, তেনেহ'লে সকলো ৰাজ্যৰ পৰা সমানুপাতিভাৱে জনপ্রতিনিধিৰ উপস্থিতি সু-নিশ্চিত কৰাৰ ক্ষেত্ৰত সাংবিধানিক সংশোধনীৰো পোষকতা কৰা হয় প্ৰস্তাৱটোত। এই বৈঠকখনত বিজেপি আৰু ইয়াৰ স্থানীয় সহযোগী তামিল মানিলা কংগ্রেছ (এম) সহ পাঁচটা সৰু বিৰোধী দল বৈঠকখনত উপস্থিত নাছিল।

Share This