যুদ্ধ-বিৰতি চুক্তি কম্বোডিয়াই ভংগ কৰাৰ অভিযোগ তুলিলে থাই সেনাই

dainik janambhumi July 30, 2025

ডিজিটেল ডেস্ক : সোমবাৰে স্বাক্ষৰিত থাইলেণ্ড-কম্বোডিয়াৰ মাজৰ যুদ্ধ-বিৰতি চুক্তি কম্বোডিয়াই ভংগ কৰা বুলি থাইলেণ্ডে অভিযোগ কৰিছে। ৰয়েল থাই আৰ্মীৰ মুখপাত্র মেজৰ জেনেৰেল উইনথাই চুঙাৰেই কয় যে সোমবাৰে নিশাই কম্বোডিয়াই থাই ভূখণ্ডৰ বিভিন্ন অঞ্চলত অক্রমণ চলায়। তেওঁ কয় যে ইয়াক যুদ্ধ-বিৰতি চুক্তিৰ ইচছাকৃত উলংঘন বুলি থাইলেণ্ডে গণ্য কৰিছে। 

থাইলেণ্ডৰ সেনা বিষয়াজনে কয় যে কম্বোডিয়া দখল কৰিবলৈ থাইলেণ্ডে সেনাক ব্যৱহাৰ কৰা নাই যদিও দেশখনৰ ভূ-খণ্ড বেদখল প্ৰতিৰোধ আৰু ৰাষ্ট্ৰীয় সার্বভৌমত্ব ৰক্ষা কৰিবলৈ প্ৰত্যুত্তৰ দিয়ে। ইফালে, কম্বোডিয়াই থাইলেণ্ডৰ এই অভিযোগ খণ্ডন কৰিছে। 

কম্বোডিয়াৰ সেনাৰ মুখপাত্র মেলি সুচিতাই কয় যে কম্বোডিয়ান সেনাই যুদ্ধ বিৰতিৰ সিদ্ধান্ত আখৰে আখৰে পালন কৰিছে। উল্লেখযোগ্য যে মালয়েছিয়াৰ মধ্যস্থতাত দুয়োপক্ষই সোমবাৰে যুদ্ধ-বিৰতি চুক্তিত স্বাক্ষৰ কৰিছিল। এই পর্যন্ত দুয়োখন দেশৰ সীমা বিবাদৰ ফলত ৩৮জন লোকে প্রাণ হেৰুৱাইছে আৰু ৩,০০,০০০ তকৈও অধিক লোক স্থানান্তৰিত হৈছে।

Share This