থাইলেণ্ড-কম্বোডিয়াৰ যুদ্ধ অব্যাহত, ১৫জনৰ মৃত্যু

dainik janambhumi July 26, 2025

ডিজিটেল ডেস্ক : থাইলেণ্ড আৰু কম্বোডিয়াৰ মাজত চলি থকা যুদ্ধত তৃতীয় দেশৰ হস্তক্ষেপৰ বিষয়টো নস্যাৎ কৰিছে থাইলেণ্ডে। শুকুৰবাৰে থাইলেণ্ডৰ বিদেশ মন্ত্ৰালয়ে কয় যে কম্বোডিয়াই আক্রমণ বন্ধ কৰিলেহে দুয়োখন দেশৰ আলোচনাৰ মাধ্যমেৰে সমস্যা সমাধান কৰা হ'ব। উল্লেখযোগ্য যে আমেৰিকা, চীন আৰু মালয়েছিয়াই দুয়োখন দেশৰ মাজত যুদ্ধৰ অন্ত পেলাবলৈ মধ্যস্থতা কৰিবলৈ বিচাৰিছে। থাই বিদেশ মন্ত্ৰ্যালয়ৰ মুখ্যপাত্ৰ নিকর্নডেজ বালানকুৰাই দুয়োখন দেশৰ মাজত তৃতীয় দেশৰ হস্তক্ষেপ নাকচ কৰে। 

ইফালে, থাইলেণ্ড-কম্বোডিয়াৰ সীমান্তৰ বিবদমান অঞ্চলত থকা এটা শিৱ মন্দিৰক লৈ সূত্রপাত হোৱা যুদ্ধ এতিয়াও অব্যাহত আছে। থাই আৰু কম্বোডিয়ান সেনাৰ মাজত হোৱা প্ৰচণ্ড সংঘৰ্ষত এতিয়ালৈকে ১৫জন লোকে প্রাণ হেৰুৱাইছে। দুয়োখন দেশৰ মাজত গুলীয়াগুলী, ৰকেটৰে আক্রমণ চলি আছে। থাইলেণ্ডৰ সেনাই কম্বোডিয়াত বিমান আক্রমণ সংঘটিত কৰিছে। শুকুৰবাৰে কম্বোডিয়াৰ অডাৰ মীনকে প্ৰদেশৰ মুখ্য বিষয়া জেনেৰেল খব লীয়ে কয় যে কম্বোডিয়াৰ সীমান্তৱৰ্তী এলেকাত থাই সেনাই স্থল আক্রমণ চলায়। 

বৃহস্পতিবাৰে কম্বোডিয়াৰ চাৰিজন অসামৰিক লোক নিহত হয়। ইয়াৰ পাছতেই সীমান্তৱৰ্তী এলেকাৰ পৰা কম্বোডিয়াৰ প্রশাসনে প্রায় ৪০০০ লোকক নিৰাপদ ঠাইলৈ স্থানান্তৰ কৰে। আনহাতে, ৰাষ্ট্ৰসংঘৰ সচিব প্রধান এন্টনিঅ' গুটেৰেছে দুয়োখন দেশৰ মাজৰ যুদ্ধত উদ্বিগ্ন হৈ যুদ্ধ অন্ত পেলোৱাৰ বাবে দুয়োখন দেশকে আহ্বান জনায়।

Share This