জন্মসূত্ৰে নাগৰিকত্ব ব্যৱস্থা কৰ্তনৰ সিদ্ধান্তক লৈ আমেৰিকাত ব্যাপক প্ৰতিক্ৰিয়া

Dainik janambhumi January 23, 2025

ডিজিটেল ডেস্ক: ড’নাল্ড ট্ৰাম্পে দ্বিতীয়বাৰৰ বাবে আমেৰিকাৰ ৰাষ্ট্ৰপতি ৰূপে শপত গ্ৰহণ কৰাৰ পাছতে দেশখনত জন্মসূত্ৰে নাগৰিকত্ব লাভৰ অধিকাৰ বাতিল কৰি দিয়া নিৰ্দেশটোক লৈ ব্যাপক প্ৰতিক্ৰিয়াৰ সৃষ্টি হৈছে৷ দেশখনৰ ২২খন প্ৰদেশৰ চৰকাৰে যুক্তৰাষ্ট্ৰীয় জিলা আদালতত ট্ৰাম্পৰ এই নিৰ্দেশটোক প্ৰত্যাহ্বান জনাই আৱেদন দাখিল কৰিছে৷

এই ৰাজ্যসমূহে ট্ৰাম্পৰ আদেশ বাতিল কৰাৰ কাৰণে আদালতত আৱেদন জনায়৷ ট্ৰাম্পৰ এই নিৰ্দেশৰ পাছত আমেৰিকাত অবৈধভাৱে বা ভিছা লৈ দেশখনত বাস কৰা লোকসকলৰ শিশুৱে আমেৰিকাৰ নাগৰিকত্ব লাভ নকৰিব৷ নিউয়ৰ্ক টাইম্‌ছে কয় যে ট্ৰাম্পৰ এই আদেশে দেশখনত জন্মগতভাৱে নাগৰিকত্ব লাভৰ অধিকাৰক প্ৰত্যাহ্বান জনাইছে৷ ইয়াৰ ফলত প্ৰতিবছৰে প্ৰায় ডেৰ লাখ নৱজাতকৰ নাগৰিকত্বৰ প্ৰতি সংকটৰ সৃষ্টি হ’ব৷ ১৮খন ৰাজ্য আৰু দুখন মহানগৰ ক্ৰমে ছানফ্ৰান্সিস্কো, ৱাশ্বিংটনে মেছাচুচেট্‌ছ আৰু আন চাৰিখন ৰাজ্যই ৱাশ্বিংটন পশ্চিম জিলাৰ জিলা আদালতত ট্ৰাম্পৰ আদেশটোৰ বিৰুদ্ধে আৱেদন দাখিল কৰিছে৷ আৱেদনত এইবুলি কোৱা হৈছে যে আমেৰিকাৰ সংবিধানৰ চতুৰ্দশ সংশোধনৰ জৰিয়তে লাভ কৰা জন্মগত নাগৰিকত্বৰ অধিকাৰত বাধা দিবলৈ ৰাষ্ট্ৰ আৰু কংগ্ৰেছৰ অধিকাৰ নাই৷

উল্লেখযোগ্য যে ট্ৰাম্পে এই আদেশ কাৰ্যকৰী কৰাৰ কাৰণে এমাহ সময় দিছে৷ নিউ জাৰ্ছিৰ এটৰ্নী জেনেৰেল জে প্লেটকিনে কয় যে ৰাষ্ট্ৰপতি শক্তিশালী হ’লেও তেওঁ ৰজা নহয়৷ তেওঁ কলমৰ এটা খোঁচত সংবিধান পুনৰ লিখিব নোৱাৰে৷ ইফালে, ট্ৰাম্পৰ আদেশৰ কেইবাটাও সংগঠনে বিৰোধিতা কৰিছে৷ ট্ৰাম্পৰ এই নিৰ্দেশে আমেৰিকাত থকা প্ৰৱাসী ভাৰতীয়সকলকো প্ৰভাৱিত কৰিব আৰু তেওঁলোকৰ সন্তানে আমেৰিকাৰ নাগৰিকত্ব লাভ নকৰিব৷ উল্লেখযোগ্য যে বৰ্তমানলৈকে আমেৰিকাত গ্ৰীন কাৰ্ড বা এইচ-১ বি ভিছা লাভ কৰি বাস কৰি থকা লোকসকলৰ সন্তানে দেশখনৰ নাগৰিকত্ব লাভ নকৰিব৷ ২০২৩ চনত এখন প্ৰতিবেদনত দাবী কৰা মতে প্ৰায় ১১ লাখ ভাৰতীয়ই গ্ৰীন কাৰ্ডৰ অপেক্ষা কৰি আছে৷

ইফালে মাৰ্কিন কংগ্ৰেছৰ ভাৰতীয় মূলৰ একাংশ সদস্যয়ো এই আদেশৰ বিৰোধিতা কৰিছে৷ ভাৰতীয় মূলৰ আমেৰিকান সাংসদ ৰো খান্নাই কয় যে জন্মসূত্ৰে নাগৰিকত্বৰ অধিকাৰ বাতিল কৰাটোৱে আমেৰিকাত অবৈধ আৰু কোনোধৰণৰ নথি-পত্ৰ নোহোৱাকৈ বাস কৰা প্ৰৱাসীসকলৰ সন্তানকেই প্ৰভাৱিত নকৰে, দেশখনত এইচ-১ বি ভিছা লৈ বৈধভাৱে থকা লোকসকলকো প্ৰভাৱিত কৰিব৷ ভাৰতীয় মূলৰ আন এজন সাংসদ শ্ৰী থানেদাৰে কয় যে ট্ৰাম্পে যিয়েই নকৰক, জন্মসূত্ৰে নাগৰিকত্ব লাভৰ অধিকাৰৰ বাবে তেওঁ যুঁজ দি যাব৷ ভাৰতীয় মূলৰ আমেৰিকান কংগ্ৰেছৰ সদস্য প্ৰমিলা জয়পালে ট্ৰাম্পৰ আদেশ অসাংবিধানিক বুলি কয়৷

Share This