এইবাৰ দুই শতাধিক গ্ৰন্থ বিপণীৰে দেখুৱাব চমক

Dainik janambhumi January 23, 2025

ডিজিটেল ডেস্কঃঅসমৰ বৃহত্তম জাতীয় অনুষ্ঠান অসম সাহিত্য সভাৰ  সপ্তসপ্তিতম দ্বি-বাৰ্ষিক অধিৱেশনলৈ মাজত মাত্ৰ কেইটামান দিন বাকী থকা অৱস্থাত তুংগত উঠিছে প্ৰস্তুতি৷ অধিৱেশনৰ অন্যতম আকৰ্ষণ হ’ব গ্ৰন্থমেলা৷ ইতিমধ্যে পশ্চিম বংগ, দিল্লী, গুৱাহাটী আদিকে ধৰি ৰাজ্যৰ  বিভিন্ন ঠাইৰ পৰা দুই শতাধিক গ্ৰন্থৰ বিপণীয়ে অংশ ল’ব বুলি জানিব পৰা গৈছে৷ অধিৱেশনস্থলীত গ্ৰন্থ বিক্ৰীৰ হাৰ বৃদ্ধিৰ বাবে উদ্‌যাপন সমিতিয়ে ইতিমধ্যে বিভিন্ন ব্যৱস্থা গ্ৰহণ কৰিছে৷ আনহাতে অধিৱেশনৰ আটাইকেইটা দিনতে গ্ৰন্থমেলাৰ লগত সংগতি ৰাখি গ্ৰন্থমেলাৰ বাকৰিত বিভিন্ন প্ৰতিযোগিতাৰ আয়োজন কৰা হৈছে৷ কাৰ্যসূচী অনুসৰি ৩১ জানুৱাৰীত দিনৰ ১০ বজাত ছাত্ৰ-ছাত্ৰীসকলৰ মাজত সাধু কোৱা প্ৰতিযোগিতা অনুষ্ঠিত হ’ব৷

এই প্ৰতিযোগিতাৰ বাবে ‘ক’ শাখাত প্ৰাক্‌-প্ৰাথমিকৰ পৰা তৃতীয় শ্ৰেণীলৈ আৰু ‘খ’ শাখাত চতুৰ্থ শ্ৰেণীৰ পৰা অষ্টম শ্ৰেণীলৈকে সাধু কোৱা প্ৰতিযোগিতাত অংশগ্ৰহণ কৰিব পাৰিব৷ এই প্ৰতিযোগিতাত নিৰ্বাচিত প্ৰথম পুৰস্কাৰ তিনি হাজাৰ টকা, দ্বিতীয় পুৰস্কাৰ দুই হাজাৰ টকা, তৃতীয় পুৰস্কাৰ এক হাজাৰ টকা৷ প্ৰতিযোগিতাৰ নিয়মাৱলী প্ৰতিগৰাকী প্ৰতিযোগীয়ে প্ত মিনিটকৈ সময় পাব৷ প্ৰতিযোগিতাৰ বাবে কোনো ভৰ্তি মাচুল নাই৷ নাম জমা দিয়াৰ সময়ত প্ৰতিযোগীসকলে নিজৰ বিদ্যালয়ৰ পৰিচয়-পত্ৰ অথবা অধ্যক্ষ শিক্ষকৰ পৰা পঢ়ি থকা শ্ৰেণীৰ প্ৰমাণ-পত্ৰ দেখুৱাব লাগিব৷ সাধুকথা অসমীয়া মান্য ভাষাত ক’ব লাগিব৷ সাধুটোৰ শেষত সাধুটোৰ পৰা পোৱা নীতিশিক্ষা ক’ব লাগিব৷ প্ৰতিযোগীসকলে ২৮ জানুৱাৰী বা তাৰ আগতে সম্পূৰ্ণ নাম, ঠিকনা লিখি পঠাব লাগিব৷ আনহাতে ৩১ জানুৱাৰীৰ  আবেলি দুই বজাত ক শাখাত অষ্টম শ্ৰেণীলৈ ‘ভ্ৰাম্যভাষতকৈ কিতাপেই শ্ৰেষ্ঠ’ শীৰ্ষক তৰ্ক  প্ৰতিযোগিতা আৰু ‘খ’ শাখাত নৱম শ্ৰেণীৰ পৰা স্নাতকোত্তৰলৈ ‘সাহিত্যই জাতিৰ চিনাকি’ শীৰ্ষক তৰ্ক প্ৰতিযোগিতা অনুষ্ঠিত হ’ব৷ নিৰ্বাচিত দুয়োখন প্ৰতিযোগিতাত প্ৰথম,  দ্বিতীয় আৰু তৃতীয় প্ৰতিযোগীক ক্ৰমে পাঁচ হাজাৰ, চাৰি হাজাৰ, তিনি হাজাৰ টকা প্ৰদান কৰা হ’ব৷ তদুপৰি ৰ ফেব্ৰুৱাৰীৰ দিনৰ ১১ বজাত দশম শ্ৰেণী পৰ্যন্ত অসমৰ বিষয়ে লিখিত কুইজ প্ৰতিযোগিতা অনুষ্ঠিত হ’ব৷ প্ৰথম পুৰস্কাৰ তিনি হাজাৰ টকা, দ্বিতীয় পুৰস্কাৰ দুই হাজাৰ টকা আৰু তৃতীয় পুৰস্কাৰ এক হাজাৰ টকা৷ ভিন্ন শিক্ষানুষ্ঠানৰ শিক্ষাৰ্থীৰে দুগৰাকীকৈ দল গঠন কৰিব পাৰিব৷

প্ৰতিযোগিতাখন দশম শ্ৰেণী পৰ্যন্ত মুকলি থাকিব৷ নাম জমা দিয়াৰ সময়ত প্ৰতিযোগীসকলে নিজৰ বিদ্যালয়ৰ পৰিচয়-পত্ৰ দেখুৱাব লাগিব৷ ইয়াৰ পাছত ১১-৩০ বজাত অসম সাহিত্য সভা বিষয়ক মুকলি কুইজ প্ৰতিযোগিতা অনুষ্ঠিত হ’ব৷ এই প্ৰতিযোগিতাত প্ৰথম পুৰস্কাৰ ছয় হাজাৰ, দ্বিতীয় পাঁচ হাজাৰ আৰু তৃতীয় চাৰি হাজাৰ টকা পুৰস্কাৰ ধাৰ্য কৰা হৈছে৷ আনহাতে গ্ৰন্থমেলা উপ-সমিতিৰ সহযোগত ‘আধুনিক তথ্য আৰু প্ৰযুক্তিবিদ্যাৰ যুগত গ্ৰন্থ অধ্যয়নৰ প্ৰয়োজনীয়তা’ শীৰ্ষক মুকলি প্ৰবন্ধ প্ৰতিযোগিতা অনুষ্ঠিত হ’ব৷ এই প্ৰতিযোগিতাত নিৰ্বাচিত তিনিটা শ্ৰেষ্ঠ প্ৰবন্ধৰ বাবে পুৰস্কাৰ প্ৰদান কৰা হ’ব৷ এই প্ৰতিযোগিতাত প্ৰথম পুৰস্কাৰ পাঁচ হাজাৰ, দ্বিতীয় চাৰি হাজাৰ আৰু তৃতীয় তিনি হাজাৰ টকা ধাৰ্য কৰা হৈছে৷

Share This