গীতা উপাধ্যায়ক বাসগৃহতে পদ্মশ্রী অর্পণ তিনি মন্ত্ৰীৰ

dainik janambhumi August 04, 2025

ডিজিটেল ডেস্ক : ৰাজ্য চৰকাৰৰ তিনিজন মন্ত্ৰীৰ লগতে ৰাজ্য চৰকাৰৰ গৃহ সচিব পার্থ মজুমদাৰসহ গৃহ আৰু ৰাজনৈতিক বিভাগৰ অতিৰিক্ত মুখ্য সচিব অজয় তিৱাৰীয়ে দেওবাৰে সন্ধিয়া তেজপুৰত উপস্থিত হৈ প্রবীণ সাহিত্যিক গীতা উপাধ্যায়ক আনুষ্ঠানিকভাৱে পদ্মশ্রী সন্মান অর্পণ কৰে। উল্লেখযোগ্য যে ৰাজ্য চৰকাৰৰ মন্ত্ৰীত্ৰয় চন্দ্ৰমোহন পাটোৱাৰী, ৰণোজ পেগু আৰু অশোক সিংহলে দেওবাৰে বিয়লি উপস্থিত হয় তেজপুৰ চানমাৰি নিৱাসী প্রথিতযশা সাহিত্যিক তথা সাহিত্য অকাদেমি বঁটাপ্রাপক গীতা উপাধ্যায়ৰ বাসগৃহত। তেওঁলোকে সাহিত্যিক উপাধ্যায়ক ভাৰত চৰকাৰে প্ৰদান কৰা সন্মানীয় পদ্মশ্রী সন্মান আনুষ্ঠানিকভাৱে অর্পণ কৰে। যিহেতু বিগত সময়ছোৱাত শাৰীৰিক অসুস্থতাৰ বাবে উপাধ্যায়ে এই বঁটা ৰাষ্ট্ৰপতিৰ পৰা গ্ৰহণ কৰিব নোৱাৰিলে। সেয়ে ভাৰত চৰকাৰে প্ৰদান কৰা এই বঁটা অসম চৰকাৰৰ গৃহ সচিব, গৃহ আৰু ৰাজনৈতিক বিভাগৰ অতিৰিক্ত মুখ্য সচিবৰ উপস্থিতিত তিনিও মন্ত্রীয়ে আজি সাহিত্যিকগৰাকীক অর্পণ কৰে। 

ইফালে, অসুস্থতাৰ মাজতে এই সন্মান গ্রহণ কৰি সুখী বুলি উল্লেখ কৰি চৰকাৰক ধন্যবাদ জ্ঞাপন কৰে সাহিত্যিক গীতা উপাধ্যায়ে। প্রণিধানযোগ্য যে 'এন ফ্রাংকৰ ডায়েৰী'ৰ দৰে বিশ্ব সাহিত্যৰ উল্লেখনীয় গ্ৰন্থৰ অসমীয়া অনুবাদেৰে অসমীয়া সাহিত্যৰ ভঁৰাল চহকী কৰা তথা নেপালী আৰু অসমীয়া দুয়োটাই মোৰ মাতৃভাষা বুলি গৌৰৱ কৰি অহা ৰাজ্যৰ এগৰাকী প্রবীণ সাহিত্যিক তথা দেশৰ স্বাধীনতা সংগ্ৰামী ছবিলাল উপাধ্যায়ৰ নাতিনী তেজপুৰ নিৱাসী গীতা উপাধ্যায়লৈ দেশৰ কেন্দ্ৰীয় চৰকাৰে এইবাৰ পদ্মশ্রী সন্মান আগবঢ়াইছিল। গীতা উপাধ্যায়ৰ জন্ম হৈছিল অবিভক্ত শোণিতপুৰৰ বিহালীৰ স্বাধীনতা সংগ্রামী ছবিলাল উপাধ্যায়ৰ ঐতিহ্যমণ্ডিত পৰিয়ালত। ছবিলাল উপাধ্যায়ৰ পুত্ৰ টংকনাথ উপাধ্যায় আৰু বোৱাৰী ভাগীৰথী দেৱীৰ কন্যা গীতা উপাধ্যায়। এগৰাকী সুলেখিকা, অনুবাদকৰ উপৰি সুবক্তা উপাধ্যায় সামাজিক কাম-কাজৰ বাবেও বিশেষভাৱে পৰিচিত। 

ভাৰতীয় সাহিত্যলৈ তেওঁৰ উল্লেখযোগ্য অৱদানৰ বাবে গীতা উপাধ্যায়ক সন্মান জনোৱা হৈছে। ৰাজ্যিক পৰ্যায়ৰ লগতে ৰাষ্ট্ৰীয় বঁটাৰেও সন্মানিত উপাধ্যায়ে ২০১২-ত অসমীয়াৰ পৰা নেপালীলৈ জ্যোতিপ্ৰসাদ আগৰৱালাৰ নাটক 'কাৰেঙৰ লিগিৰী'ৰ অনুবাদৰ বাবে সাহিত্য অকাদেমি অনুবাদ বঁটা লাভ কৰে। পুনৰ ২০১৬ত 'জন্মভূমি মেৰ' স্বদেশ' উপন্যাসৰ বাবে সাহিত্য অকাদেমি বঁটা লাভ কৰি সাহিত্য অকাদেমিৰ দুটা শিতানত পুৰস্কাৰ লাভ কৰা প্ৰথমগৰাকী নেপালী সাহিত্যিক হিচাপে পৰিগণিত হয়।

Share This