দুৰাৰোগ্য নহয় কেঞ্চাৰ

dainik janambhumi July 24, 2025

দৈনিক জনমভূমি : অপ্রিয় হ'লেও সত্য যে আমাৰ দেশৰ মহিলাসকলে দুবিধ কেঞ্চাৰত বেছিকৈ ভোগে। এবিধ হৈছে স্তন কেঞ্চাৰ আৰু আনবিধ জৰায়ু কেঞ্চাৰ। স্তন কেঞ্চাৰ (breast can-cer) এতিয়া সার্বজনীন ৰোগত পৰিণত হৈছে, অৰ্থাৎ কমক চাৰি ই ক্ৰমাৎ বাঢ়িহে গৈছে। ২০১৮ বৰ্ষত ভাৰতত এইবিধ কেঞ্চাৰত ৮৭,০৯০ গৰাকী মহিলাৰ মৃত্যু হৈছে, যিটো সেই বছৰটোত বিশ্বৰ ভিতৰতে দ্বিতীয় সর্বোচ্চ হিচাপে পৰিগণিত হৈছিল।

আনহাতে, আমাৰ দেশত মহিলাৰ দ্বিতীয় মৃত্যুদূতৰূপী কেঞ্চাৰবিধেই হৈছে জৰায়ু কেঞ্চাৰ (cervical cancer)। এইবিধ কেঞ্চাৰত প্রতি এক লাখ ৰোগীৰ ভিতৰত ১১.২ শতাংশই মৃত্যুমুখত পৰিছে। ২০২৩ বৰ্ষত ভাৰতত ৭৯,৯০৬গৰাকী মহিলাৰ মৃত্যুৰ কাৰণ জৰায়ু কেঞ্চাৰ। সি যি নহওক, শেহতীয়া ভাল খবৰটো হৈছে ভাৰতবৰ্ষত এই মাৰাত্মক জৰায়ু কেঞ্চাৰ নির্মূলকৰণৰ অর্থে ভেকচিনেশ্যন প্রগ্রেম আৰম্ভ হৈছে। প্রথম পর্যায়ত কম বয়সীয়া ছোৱালী তথা কিশোৰীক লক্ষ্য কৰি লোৱা এই অভিযানত প্ৰদান কৰা হৈছে HPV (Human Papillomavirus) ভেকচিন। তাতোকৈ ভাল লগা খবৰটো হৈছে এই ভেকচিন এতিয়া আমাৰ অসম আহি পাইছেহি।

মাহচেৰেক পূর্বে গুৱাহাটীৰ ই এছ আই চি হস্পিটেলত প্রথম পৰ্যায়ত ১০ বছৰৰ পৰা ১৬ বছৰ বয়সৰ ১০০গৰাকী কিশোৰীক এই ভেকচিন দিয়া হৈছে। চিকিৎসালয়খনৰ শিশু বিভাগৰ মুৰব্বী তথা বিশেষজ্ঞ চিকিৎসক ডাঃ ৰঞ্জিত ডেকাই জনোৱা মতে, এই ভেকচিনৰ সাফল্য ইতিমধ্যে ক্লিনিকেলি প্রমাণিত হৈছে আৰু চিকিৎসালয়খনত অচিৰেই দ্বিতীয় পৰ্যায়ৰ ভেকচিনেশ্যন আৰম্ভ হ'ব। ডাঃ ডেকাই দিয়া ভাল খবৰৰ সমানে ফ্লৰিডাৰ এদল বিজ্ঞানীয়েও বিশ্ববাসীৰ প্ৰতি আন এক আশাব্যঞ্জক খবৰ কঢ়িয়াই আনিছে। আমেৰিকাৰ ফুৰিডা বিশ্ববিদ্যালয়ৰ এদল বিজ্ঞানীয়ে এম আৰ এন এ নামৰ এনে এবিধ ভেকচিন প্রস্তুত কৰি উলিয়াইছে, যি মানৱ শৰীৰৰ যিকোনো টিউমাৰ সম্পৰ্কীয় কেঞ্চাৰ নির্মূল সম্ভৱ হৈ উঠিব।

'নেচাৰ বায় 'মেডিকেল ইঞ্জিনীয়াৰিং' শীর্ষক বার্তালোচনীখনত প্রকাশ পোৱা প্রতিবেদন মতে, গৱেষকৰ দলটোৱে নিগনিৰ দেহত প্রয়োগ কৰি এই ভেকচিনবিধৰ সাফল্য দেখা পাইছে। ভেকচিনবিধে বিশেষভাবে কেঞ্চাৰৰ প্ৰতিৰক্ষা প্ৰণালী শক্তিশালী কৰি তোলা দেখা যায়। ইউ এফ হেল্থৰ অংকল 'জিষ্ট তথা মুখ্য গবেষক ড° এলিয়াছ ছয়ুৰে ব্যক্ত কৰা মতে অচিৰেই এই ভেকচিনবিধ মানৱ শৰীৰত প্ৰয়োগ কৰি চোৱা হ'ব আৰু সফলকাম হ'লে সমগ্র বিশ্বতে ইয়াক মুকলি কৰি দিয়া হ'ব। কিছুদিন পূর্বে ভাৰতৰে এদল বিজ্ঞানীয়ে মানুহে দৈনন্দিন ব্যৱহাৰ কৰা মছলাৰ পৰা কৰ্কট ৰোগ-প্ৰতিৰোধী ঔষধ আৱিষ্কাৰ কৰিব পৰা যাব বুলি ঘোষণা কৰিছিল।

ইয়াৰ দিনচেৰেক পাছত আন এদল ভাৰতীয় গৱেষক-চিকিৎসকে এজন ৰোগীৰ দ্বিতীয়বাৰ কেঞ্চাৰৰ আক্ৰমণ ৰোধ কৰিব পৰা ঔষধ আৱিষ্কাৰৰ দাবী কৰিছে। ভাৰতবৰ্ষৰ মুম্বাইৰ টাটা মেম'ৰিয়েল হস্পিটেলৰ এইদল গৱেষক চিকিৎসকে যোৱা দহ বছৰ ধৰি চলোৱা গৱেষণাৰ অন্তত এবিধ টেবলেট আৱিষ্কাৰ কৰি উলিয়াইছে। দলটোৰ অন্যতম সদস্য, কৰ্কট ৰোগৰ শল্য চিকিৎসক, পদ্মশ্রী ডাঃ বাজেন্দ্র বড়ৱেৰ মতে তেওঁলোকে আৱিষ্কাৰ কৰা টেবলেটে দ্বিতীয়বাৰৰ বাবে কৰ্কট হোৱাটো প্ৰতিৰোধ কৰিব আৰু লগতে ৰেডিয়েশ্যন আৰু কেম থেৰাপীৰ দৰে চিকিৎসাৰ পার্শ্বক্রিয়া ৫০ শতাংশ হ্রাস কৰিব। তদুপৰি পেংক্রিয়াছ, হাওঁফাওঁ আৰু মুখ গহ্বৰৰ কৰ্কট ৰোগৰ চিকিৎসাতো এই টেবলেটৰ পৰা উপকাৰ পোৱা যাব। সাধাৰণতে কেঞ্চাৰেই হওক, যক্ষ্মাই হওক বা কভিডেই হওক, এজন ৰোগীৰ বাবে দ্বিতীয়বাৰ আক্রমণেই আটাইতকৈ ভয়াৱহ হৈ পৰে। এনেক্ষেত্ৰত ডাঃ ৰাজেন্দ্ৰ বড়ৱে নেতৃত্বাধীন দলটোৰ আৱিষ্কাৰ স্বাভাৱিকতেই সকাহজনক খবৰ। কেৱল সেয়াই নহয়, এইধৰণৰ খবৰে এই কথাও প্রতীয়মান কৰে যে দুৰাৰোগ্য বুলি কেঞ্চাৰক সন্মুখত লৈ মানুহ নামৰ প্ৰাণীবিধ শুই-বহি থকা নাই। খ্রীষ্টপূর্ব প্রায় ৩০০০ বছৰৰ পুৰণি ৰোগবিধৰপৰা পৰিত্ৰাণ লাভৰ প্ৰচেষ্টা আজিও অব্যাহত আছে আৰু আগলৈও চলি থাকিব। ইজিপ্তৰ প্ৰাচীন পুথিসমূহত উল্লেখ পোৱা মতে তেতিয়াৰ মিচৰৰ অথবা পেৰুৰ মামিবোৰত এই ৰোগৰ চিন লাভ কৰা হৈছিল। অর্থাৎ মিচৰৰ বা পেকৰ মামিবোৰৰ আয়ুস যিমান পুৰণি, সমানে পুৰণি কেঞ্চাৰ ৰোগো।

অৱশ্যে তেতিয়া ইয়াক কেঞ্চাৰ বা কৰ্কট বুলি নামকৰণ কৰা হোৱা নাছিল। গ্রীক চিকিৎসক হিপ 'ক্রেটিছে (খ্রীষ্টপূর্ব ৬৪০-৩৭০) ইয়াক কাৰকিনোমা বা কার্চিনোমা বুলি আখ্যা দিছিল। গ্রীক শব্দ কার্চিনোছ বা কার্চিনোমাৰ অৰ্থ হৈছে- কেঁকোৰা। যিহেতু কেঞ্চাৰ ৰোগত আক্রান্তসকলৰ টিউমাৰবোৰো দেখাত কেঁকোৰাৰ দৰেই আছিল, সেয়ে সেই তেতিয়াৰ পৰাই ইয়াৰ নাম কেঁকোৰা বা কর্কট বা কেঞ্চাৰ হৈ পৰে। আমাৰ ভাৰতবৰ্ষত ১৭শতিকামানৰ পৰাহে কৰ্কট ৰোগৰ বিষয়ে চিন্তা কৰা দেখা যায়। অৱশ্যে ভাৰতৰ মধ্যযুগীয় সাহিত্যত কৰ্কট ৰোগৰ উল্লেখ খুব কমেইহে পোৱা গৈছিল। পৰৱৰ্তী সময়ত অর্থাৎ ১৮৬০-১৯১০ চনৰ ভিতৰত ভাৰতীয় একাংশ চিকিৎসকে কেইবাটাও 'কেঞ্চাৰ কেছ ছিৰিজ' প্ৰকাশ কৰিছিল। অৱশ্যে ভাৰতীয় চিকিৎসা ক্ষেত্রত প্রাকৃতিকভারে সেই তেতিয়াৰে পৰা কেঞ্চাৰ চিকিৎসা চলি আহিছে। দেশত প্রাকৃতিকভাৱে লাভ কৰা বনৌষধি গছ-বনৰ দ্বাৰা এনে প্রচেষ্টাৰ ইতিহাস আছে। অৱশ্যে বিশ্বৰ চিকিৎসা ক্ষেত্রখনতো প্রশান্ত মহাসাগৰীয় এবিধ গছৰ বাকলিত পোৱা 'পেক্লিটেক্সল' আৰু এবিধ সৰু সাগৰীয় প্রাণী স্পঞ্জৰ পৰা বিকশিত কৰা 'এৰিবুলিন' ঔষধৰ দ্বাৰা চিকিৎসাৰ কথা উল্লেখ পোৱা যায়। সি যি নহওক, সঠিক ঔষধ বজাৰত উপলব্ধ নোহোৱালৈকে চিকিৎসা বিজ্ঞানৰ প্রচেষ্টা চলি থাকিব। শেহতীয়াকৈ এ আই (আর্টিফিচিয়েল ইন্টেলিজেঞ্চ) ৰ দ্বাৰাও কেঞ্চাৰ নিৰ্ণয় আৰু চিকিৎসা প্রক্রিয়া আৰম্ভ হৈছে।

বিশেষকৈ ৰোগৰ দ্রুত চিনাক্তকৰণত ইচমকপ্রদ সাফল্য দিছে। আগন্তুক দিনত ঔষধ প্ৰস্তুতকৰণতো এ আইৰ প্ৰয়োগ হ'ব। তথাপি কিন্তু জনতা সচেতন নহ'লে বিশ্বত কেঞ্চাৰ ৰোগীৰ সংখ্যা বৃদ্ধি পায়েই থাকিব। আমাৰ অসমতে বছৰি ৫০ হাজাৰ কেঞ্চাৰ আক্রান্ত চিনাক্ত হোৱা বুলি অসম বিধানসভাত স্বয়ং স্বাস্থ্য মন্ত্রীয়েই ঘোষণা কৰিছে। বিশেষজ্ঞসকলৰ মতে জীৱন ধাৰণ প্ৰণালী, হৰমনজনিত কাৰণ, মদ্যপান, ধূমপান, কেমিকেলজনিত পৰিস্থিতি আদি অনেক কাৰকৰ বাবেই কেঞ্চাৰৰ আক্রমণ বৃদ্ধি পাইছে। যদি সেয়াই হয়, তেনেহ'লে কেঞ্চাৰ ৰোগো মানৱসৃষ্ট এক প্রক্রিয়া। এতিয়া ভেকচিন আৱিষ্কাৰৰ সমানে মানৱসৃষ্ট এই কাৰকসমূহৰ প্ৰতিৰোধ অভিযানো চলাই থাকিব পাৰিলেহে চূড়ান্ত বিজয় অর্জন কৰিব পৰা যাব।

Share This