মণিপুৰত আকৌ জুই

dainik janambhumi June 11, 2025

ডিজিটেল ডেস্কঃ মাজত কিছুদিন স্তিমিত হৈ থাকিলেও মণিপুৰৰ অগ্নিগর্ভ অৱস্থাটোৰ যে অলপো সলনি হোৱা নাই সেইটো প্রকট হৈ উঠিছে যোৱা তিনিটা দিনৰ ৰাজ্যখনৰ পৰিস্থিতিত। তাত পুনৰ ৰাজপথত টায়াৰ জ্বলিছে, চৰকাৰী কাৰ্যালয় জ্বলাই দিয়া হৈছে, নিৰাপত্তা বাহিনীৰে প্ৰতিবাদী লোকৰ ঠায়ে ঠায়ে সংঘর্ষ লাগিছে। আচলতে ৰাজ্যখনত সংঘাতত লিপ্ত দুটা মূল জনগোষ্ঠী মেইটেই আৰু কুকিসকল ইমানেই স্পর্শকাতৰ হৈ আছে যে উক্ত লোকসকল উত্তেজিত হ'ব পৰা ঘটনা ঘটিলেই তাত লগে লগে জুই জ্বলি উঠে।

জনসাধাৰণৰ ক্ষোভৰ বাৰুদত এইবাৰ জুই লগোৱা কাণ্ডটো ঘটিল এ কানন সিং নামৰ মেইটেই নেতাজনক চাৰি সতীৰ্থসহ চি বি আয়ে গ্ৰেপ্তাৰ কৰাৰ পৰিপ্ৰেক্ষিতত। ইতিমধ্যে বিভিন্ন মাধ্যমত প্রকাশ পাইছেই যে ২০২৩ চনত ৰাজ্যখনত প্রথম গোষ্ঠী সংঘৰ্ষৰ দাবানল জ্বলিছিল। সেই সময়ত মেইটেইসকলক উত্তেজিত কৰা আৰু সংঘৰ্ষৰ ঘটনাবিলাকৰ নেতৃত্ব দিয়া নেতাসকলৰ অন্যতম প্রধান আছিল কানন সিং। মেইটেইসকলৰ এটা প্ৰভাৱশালী সংগঠন 'অৰম্বাই টেংগ্গল'ৰ কমাণ্ডাৰৰ দায়িত্বত আছে এই কানন সিং। এসময়ত মণিপুৰ আৰক্ষীৰ কনিষ্টবলৰ চাকৰি কৰা কানন সিঙৰ বিৰুদ্ধে আছে সীমান্তৰ সিপাৰৰ পৰা অস্ত্ৰৰ চোৰাং সৰবৰাহ কৰাকে ধৰি বহু গুৰুতৰ অপৰাধৰ অভিযোগ। বন্দুকৰ চোৰাং বেহাত জড়িত থকা বুলি প্রমাণিত হোৱা বাবে ২০২০ চনত তেওঁ চাকৰিৰ পৰা নিলম্বিতও হৈছিল। এনে অপৰাধৰ বাবে চলিত বৰ্ষৰ ৩ মাৰ্চত তেওঁক চাকৰিৰ পৰা বৰ্খাস্ত কৰা হয়। তেওঁ ম'ৰেত নিৰাপত্তা বাহিনীক আক্ৰমণৰ এটা গোচৰত জড়িত আছিল য'ত দুজন আৰক্ষী কামাণ্ডো নিহত আৰু কেইবাজনো আহত হৈছিল। মণিপুৰ আৰক্ষীত কুখ্যাত হৈ পৰা এই কানন সিঙেই মেইটেইসকলৰ প্ৰভাৱশালী সংগঠন 'অৰম্বাই টেংগ্গল'ৰ নেতা হোৱা সূত্রেই অপৰাধী হোৱা সত্ত্বেও তেওঁক গ্ৰেপ্তাৰ কৰাৰ লগে লগে পুনৰ প্ৰতিবাদত উত্তাল হৈ পৰিছে অগ্নিগর্ভ ৰাজ্যখন। এই 'অৰম্বাই টেংগ্গল'ৰো আছে এক গুৰুত্বপূৰ্ণ ইতিহাস।

মণিপুৰৰ ৰাজপৰিয়ালৰ সন্তান তথা ৰাজ্য সভাৰ সদস্য লেইছেম্বা ছানাজৌবাই প্রতিষ্ঠা কৰিছিল এই সংগঠনটো। এটা ৰেডিকেল সংগঠন ৰূপে পৰিচিত হ'লেও ইয়াৰ সূচনা হৈছিল। এটা ধর্মীয় সংগঠন হিচাপে লাহে লাহে ই ইমানেই প্রভাৱশালী হৈ পৰে যে গোষ্ঠী সংঘৰ্ষৰ সময়ত ২০২৪ চনত ই মেইটেই জনপ্রতিনিধিসকলক গোটাই সভাও অনুষ্ঠিত কৰিছিল। অভিযোগ উঠা মতে, কুকিৰ বিৰুদ্ধে হোৱা সংঘৰ্ষৰ মূলতঃ নেতৃত্ব দিছিল এই 'অৰম্বাই টেংগ্গল'-এ। গতিকে, কানন সিঙৰ গ্ৰেপ্তাৰক লৈ মণিপুৰত প্ৰতিবাদৰ দাবানল জ্বলাটোত চাবলৈ গ'লে অস্বাভাৱিকতা একো নাই। তাত এন বীৰেন সিঙৰ চৰকাৰখনক নিলম্বিত কৰি ৰাষ্ট্ৰপতিৰ শাসন প্ৰৱৰ্তন কৰাৰ পাছত গোষ্ঠী সংঘর্ষত জড়িত শক্তিবিলাকক চিনাক্ত কৰি ব্যৱস্থা গ্রহণ কৰাৰ প্ৰক্ৰিয়া এটা যে চলিছে সতীর্থসহ কানন সিঙৰ গ্রেপ্তাৰে তাকেই প্রতীয়মান কৰে। কিন্তু ৰাজ্যখনৰ প্ৰধান জনগোষ্ঠী মেইটেইসকলে চৰকাৰৰ এনে ব্যৱস্থা যে বিচৰা নাই সেইটো প্রমাণ কৰে শেহতীয়া উগ্র প্রতিবাদে। মেইটেইসকলৰ একাংশ বিধায়কে মিলি তাত পুনৰ বিজেপিৰ চৰকাৰ প্ৰতিষ্ঠা কৰিব পাৰি নেকি তাৰ প্ৰচেষ্টা চলোৱাৰ খবৰ ইতিমধ্যে প্রকাশ পাইছে। ইয়াৰ অৰ্থ হ'ল মণিপুৰত থকা ৰাজনৈতিক আৰু সামাজিক প্রভুত্ব মেইটেইসকলে কোনো পৰিস্থিতিতে খর্ব হ'বলৈ দিব নিবিচাৰে। কানন সিঙৰ গ্ৰেপ্তাৰৰ পাছত উদ্ভুত পৰিস্থিতি প্রকৃততে কেন্দ্ৰীয় চৰকাৰ, বিশেষকৈ গৃহ মন্ত্ৰী অমিত শ্বাহৰ বাবে এক প্রত্যাহ্বান।

কিয়নো দেশত শান্তি আৰু প্ৰগতি সমান্তৰালভাৱে বর্তাই ৰাখিব পৰাৰ সামৰ্থ্য থকা একমাত্র বিজেপিৰহে আছে বুলি দলটোৱে দাবী কৰে। তেনে এটা দলৰ চৰকাৰ থকা অৱস্থাতে মণিপুৰত গোষ্ঠী সংঘৰ্ষৰ জুইকুৰা আজিলৈকে নুমুৱাব নোৱৰাটো বিজেপিৰ বাবে বাবে এটা ব্যর্থতা ৰূপে চিহ্নিত হৈ আছে। বিৰোধী দলবিলাকে এই ব্যর্থতালৈকে আঙুলিয়াই থাকে। প্রধানমন্ত্রী নৰেন্দ্ৰ মোদীও আজিলৈকে সংঘর্ষ বিধ্বস্ত ৰাজ্যখনলৈ যাব নোৱৰাটোও এই ক্ষেত্ৰত এটা উদাহৰণ হৈ পৰিছে। গতিকে, মণিপুৰক অশান্ত কৰি ৰাখিব খোজা শক্তিবোৰক নিয়ন্ত্ৰণলৈ আনিব পৰাটো গৃহ মন্ত্রী অমিত শ্বাহ তথা কেন্দ্রীয় চৰকাৰৰ বাবে এক প্রত্যাহ্বান। কেইবা দশক ধৰি উগ্ৰপন্থীৰ মুক্ত বিচৰণ ভূমি হৈ থকা মণিপুৰত প্ৰায় প্ৰতিটো জনগোষ্ঠীৰে সশস্ত্র সংগঠন আছিল। তাৰে কিছুমান নোহোৱা হ'লেও কিছুমান এতিয়াও সক্রিয় হৈ আছে। গতিকে, অস্ত্ৰৰ প্রতি দুৰ্বলতা ৰাজ্যখনৰ বহু মানুহৰ এতিয়াও আছে। আছে অস্ত্রই নিয়ন্ত্ৰণ কৰিব পৰা এক সামাজিক পৰিৱেশ। সেই দুর্বলতা নোহোৱা কৰিবলৈ তথা তাত শান্তি আৰু প্ৰগতিৰ নতুন সংস্কৃতি ৰচনা কৰিবলৈ চৰকাৰ কঠোৰ হোৱাৰ গত্যন্তৰ নাই। জনজীৱনক অশান্ত কৰি ৰাখিব খোজা অপৰাধীসকলৰ ক্ষেত্ৰত চৰকাৰে শূন্য সহনশীলতাৰ নীতি ল'বই লাগিব। এইক্ষেত্ৰত জনতাৰ পৰা অহা প্রত্যাহ্বানৰ চৰকাৰে কেনেদৰে মোকাবিলা কৰে সেইটো লক্ষণীয় হ'ব।

Share This