এছ অ' পি

dainik janambhumi March 22, 2025

ডিজিটেল ডেস্ক : অসমীয়াৰ বাপতিসাহোন ৰঙালী বিহুটিলৈ মাজত মাথোঁ কেইটামান দিন বাকী। সমগ্ৰ ৰাজ্যখনৰ চৌপাশে এতিয়া বিহুটিক আদৰাৰ বাবে চলিছে ব্যাপক প্রস্তুতি। বিহুক লৈ ৰাইজৰ মাজত অফুৰন্ত উছাহ। জেঠৰ মাজভাগলৈকে এই উছাহৰ অন্ত নপৰিব। বিহু উদযাপন পৰম্পৰাগত দিশসমূহ কিম্বা খেতিৰ পথাৰক লৈ খিলঞ্জীয়া মানুহ বৰ বেছি ব্যস্ত নহ'লেও বিহু কমিটীসমূহৰ মাজত এইকেইদিন দিনে-ৰাতিয়ে বিহুৰ আয়োজনক লৈ আলোচনা চলিছে। এইবাৰ বিহু মঞ্চত কোন শিল্পীয়ে খলকনি তুলিব পাৰিব, কোন গায়ক-গায়িকাৰ গীতৰ অনুষ্ঠান আকর্ষণীয় হ'ব আদিক লৈ নানা চর্চা! কোনোৱে যদি গায়কৰ মাননিক লৈ চৰ্চা কৰিছে আন ক'ৰবাত আকৌ বিহুৰ সময়ত শিল্পীয়ে কি গীত পৰিৱেশন কৰিব তাক লৈ হৈছে আলোচনা। মুঠতে বিহুক লৈয়ে চ'ত মাহৰ পৰাই বহাগ-জেঠ মাহলৈকে ব্যস্ততা সকলোতে। 

এনে এক সময়তে এইবেলি বিহুত হিন্দী গীত পৰিহাৰ কৰিবলৈ পৰেশ বৰুৱা নেতৃত্বাধীন 'সংযুক্ত মুক্তি বাহিনী, অসম (স্বাধীন)'-এ অসমৰ বিহু কমিটী আৰু শিল্পীসকললৈ আহ্বান জনাইছে। বহাগ বিহুৰ তাৎপৰ্য আৰু স্বকীয়তাক মনত ৰাখিহে সকলো শিল্পী আৰু বিহু সমিতি আগবাঢ়িব লাগে বুলি সংগঠনটোৱে এক বিবৃতি দিছে। সম্প্রতি পশ্চিমৰ বিজতৰীয়া সংস্কৃতিৰ আগ্রাসনে অসমীয়া জাতীয় জীৱনৰ আয়ুসস্বৰূপ বিহুটিক সংকুচিত কৰি অনা বুলি চিন্তা প্রকাশ কৰি আলফা (স্বাঃ)ই বহাগ বিহুত সাত বিহুৰ দিনকেইটাত কোনোধৰণৰ হিন্দী গীত বিহু মঞ্চত পৰিৱেশন কৰাৰ ক্ষেত্ৰত একপ্ৰকাৰ নিষেধাজ্ঞা জৰি কৰিছে। স্বকীয়তা বিসর্জন দিয়া ৰাজ্যৰ বিহু সমিতি আৰু শিল্পীসকললৈ সশস্ত্র সংগঠনটোৱে সকীয়নি আৰু আহ্বান জনাই কয় যে হিন্দী গীতক প্রাধান্য দিলে বিহু জাতীয় উৎসৱ হৈ নাথাকিব। হিন্দী গীত বিহুৰ সৈতে কেতিয়াও সংপৃক্ত নহয়। বিহুৰ ঊর্ধ্বত কোনো সমিতি বা কণ্ঠশিল্পী হ'ব নোৱাৰে বুলিও সংগঠনটোৱে স্পষ্ট কৰে। ইয়াৰ কিছুদিন পূর্বে আগন্তুক ৰঙালী বিহু সম্পর্কত এলানি নিৰ্দেশনা জাৰি কৰিছিল বিহু সুৰক্ষা সমিতি, অসমে। গুৱাহাটীত এখন সংবাদমেল পাতি বিহু সুৰক্ষা সমিতি, অসমৰ বিষয়ববীয়াসকলে কয় যে হুঁচৰিত কোনো দিন নাৰীৰ প্ৰৱেশ নাছিল, এতিয়াও হুঁচৰিত কোনো দিন নাৰীৰ প্ৰৱেশ হোৱাটো বিহু সুৰক্ষা সমিতি, অসমে নিবিচাৰে। 

আনহাতে, বিহু সন্মিলনীবিলাকত পৰম্পৰা, লোক সংস্কৃতি আৰু লোক নাচ আদিৰ শিল্পীসকলক অগ্রাধিকাৰ নিদিয়াক লৈ অসন্তুষ্টি ব্যক্ত কৰি লোক শিল্পীসকলক যথোপযুক্ত মাননি আৰু গুৰুত্ব দিয়াৰ পোষকতা কৰে বিহু সুৰক্ষা সমিতি, অসমে। বিহু সন্মিলনসমূহ নিশা ১২ বজাৰ আগত শেষ হ'ব লাগে বুলিও নির্দেশনা দিয়ে বিহু সুৰক্ষা সমিতিয়ে। আনহাতে, জাতীয় সাজপাৰহে বিহুত পৰিধান কৰিবলৈ আহ্বান জনায় সুৰক্ষা সমিতিয়ে। পাইজামা-পাঞ্জাবীৰ সলনি চুৰিয়া-চোলা পৰিধান কৰিবলৈ আহ্বান জনায় সুৰক্ষা সমিতিয়ে। ৭ বিহুৰ ভিতৰতে বিহু শেষ হ'ব লাগে বুলি উল্লেখ কৰি সমিতিয়ে অন্ততঃ ১৫ দিনৰ ভিতৰত বিহু শেষ কৰিবলৈকো অনুৰোধ জনাইছে। ইফালে, একাংশ মহিলাই ধুতী পিন্ধি হুঁচৰি পৰিৱেশন কৰা প্ৰসংগ উত্থাপন কৰি বিহু সুৰক্ষা সমিতিৰ বিষয়ববীয়াসকলে কয় যে অসমৰ ইতিহাসত মহিলাই হুঁচৰি পৰিৱেশন কৰাৰ পৰম্পৰা নাই আৰু এই পৰম্পৰা সকলোকে মানি চলিবলৈ আহ্বান জনাইছে বিহু সুৰক্ষা সমিতি, অসমে। লোক পৰম্পৰা, লোক সংস্কৃতি আৰু লোক নাচ আদিৰ শিল্পীসকলক অগ্রাধিকাৰ নিদিয়াক লৈ বিহু সুৰক্ষা সমিতি, অসমে যি অসন্তুষ্টি ব্যক্ত কৰিছে সেয়া সঁচাকৈয়ে প্রশংসনীয়। কাৰণ বৰ্তমান সময়ত বিহুৰ অনুষ্ঠানবোৰত জাতীয় সংস্কৃতিৰ বিভিন্ন অনুষ্ঠান পৰিৱেশন হ'লেও 'ফাংচন'ৰ গুৰুত্ব বেছি। একপ্ৰকাৰ বহুজাতিক কোম্পানীৰ বিজ্ঞাপনথলী হৈ পৰা এনে 'ফাংচন'বোৰত একাংশ সুৰামত্ত লোকৰ উদ্ভণ্ডালিয়ে চৰম পৰ্যায় পায়গৈ। ক'ৰবাত শিল্পীক অপমান, প্রাপ্য মাননি নিদিয়াৰ ঘটনা যদি সংঘটিত হয়, আন ক'ৰবাত আকৌ শিল্পীয়ে মাতাল হৈ মঞ্চতে অভদ্রামি কৰাৰ ঘটনাও প্রত্যক্ষ কৰিবলগীয়া হয় দর্শকে। এনে ধৰণৰ ঘটনা সঁচাকৈয়ে দুর্ভাগ্যজনক। হেঁপাহৰ সাতদিনীয়া উৎসৱ এক-ডেৰমাহলৈ চলি থকাৰ ফলত ৰাজ্যখনত অধ্যয়নৰ পৰিৱেশ আৰু কৰ্মসংস্কৃতি ৰসাতলে যাবলৈ বাকী নাই। এইবোৰ কাৰণতেই প্ৰতিবছৰেই এইদৰে বিহুৰ আগে-পাছে নানাধৰণৰ বিতৰ্ক হয়। আলফা (স্বাঃ)ৰ আহ্বানো গুৰুত্বপূৰ্ণ। সংগঠনটোৱে পূর্বেও এইধৰণৰ আহ্বান জনাই আহিছে। 

কিন্তু কেৱল হিন্দী গীত গালেই বিহুৰ স্বকীয়তা হেৰাই যাব বুলি ক'লে হয়তো ভুল হ'ব। কৃষিভিত্তিক উৎসৱটোৰ শিপা পাহৰি আজি আমি সকলো ব্যস্ত কেৱল ৰং-ৰহইচত। কৃষিকৰ্মৰ প্ৰতি এলাগী হৈ বহিঃৰাজ্যৰ পৰা আমদানিকৃত সামগ্ৰীৰ ওপৰত নিৰ্ভৰশীল হৈ পৰাচামক সোঁৱৰাই দিবলৈ কোনো নাই। ৰঙালী বিহুত আপোনজনলৈ দিয়া বিহুৱান গামোচাৰ বজাৰো এতিয়া বহিৰাগতৰ হাতত। অসমীয়াৰ স্বাভিমানৰ প্ৰতীক এই গামোচাক লৈ এচাম বহিৰাগত বণিয়াই এইদৰে চলাই গৈছে ৰমৰমীয়া ব্যৱসায়। ৰাজ্যৰ শিপিনীসকলৰ মূৰত ৰামটাঙোন শোধাই একাংশ ব্যৱসায়ীয়ে এই আমদানিকৃত গামোচাৰ ৰেহা চলাই গৈছে আৰু ইয়াৰ নীৰৱ সাক্ষী হৈ ৰৈছোঁ আমি। একেদৰে পিঠা-পনাৰ বজাৰো লাহে লাহে অনা অসমীয়াৰ হাতলৈ যোৱাৰ পথত। কৃষ্টি-সংস্কৃতি-ঐতিহ্য-পৰম্পৰাক পাহৰি 'পৰৰ পিঠাৰে বিহু' পতাৰ লেখীয়া এইবোৰ বিষয়ৰ লগতে বিহুৰ সময়ত ৰাজ্যখনত যি হাৰত সুৰাৰ বিক্ৰী হয় সেইবোৰ বিষয়ক লৈও আলফা (স্বাঃ) নাইবা বিহু সুৰক্ষা সমিতিৰ দৰে সংগঠনে মাত মতাটো দৰকাৰ। অপ্রিয় হ'লেও এয়াই সত্য যে চেনেহৰ বিহুটিক লৈ যে ইতিমধ্যেই ব্যৱসায় আৰম্ভ হৈ গৈছে, সেয়া আমি পাহৰিব নালাগিব।

Share This