আজি মহিলা বিশ্ব কাপৰ ফাইনেল, ইতিহাস সৃষ্টিৰ দিশে ভাৰত-দক্ষিণ আফ্রিকা

dainik janambhumi November 02, 2025

ডিজিটেল ডেস্ক : মহিলা এদিনীয়া বিশ্ব কাপৰ ফাইনেলত এক ইতিহাসৰ সৃষ্টি হোৱাটো নিশ্চিত। আজিৰ ফাইনেলত প্রতিদ্বন্দ্বিতা কৰিব প্রতিযোগিতাৰ আয়োজক ভাৰতৰ বিৰুদ্ধে দক্ষিণ আফ্রিকাই। ভাৰতে ইয়াৰ আগতে দুবাৰ ২০০৫ আৰু ২০১৭ চনত ফাইনেল খেলিছে যদিও এবাৰো কাপ জয় কৰিব পৰা নাই। আনহাতে, দক্ষিণ আফ্রিকাই প্ৰথমবাৰৰ বাবে ফাইনেল খেলিব। আন কথাত আজি ইয়াৰ ডি ৱাই পাটিল স্প'র্টছ একাডেমি ষ্টেডিয়ামত মহিলা ক্রিকেট বিশ্বই এক নতুন চেম্পিয়ন লাভ কৰাটো নিশ্চিত। দুয়োটা দলে প্রথমবাৰৰ বাবে খিতাপ জয় কৰিবলৈ সর্বতো প্রকাৰে যুঁজ দিয়াটো নিশ্চিত আৰু সেয়েহে আজি এখন উত্তেজনাপূর্ণ ফাইনেল দেখিবলৈ পোৱাৰ সম্ভাবনা আছে। 

উল্লেখযোগ্য যে ভাৰতে প্রতিযোগিতা সুন্দৰ আৰম্ভণি কৰে, কিন্তু মাজতে দলটোৰ প্রদর্শন সামান্য হতাশাজনক হৈ পৰে আৰু একেৰাহে তিনিখন মেচত পৰাজিত হয়। অৱশ্যে, ইয়াৰ পাছত আয়োজক দলটোৱে সুন্দৰভাৱে প্রত্যাবর্তন কৰে আৰু ফাইনেলত উপনীত হয়। ছেমি ফহিনেলত জেমিমা ৰড্ৰিগুৱেজে নিজৰ কেৰিয়াৰৰ সর্বশ্রেষ্ঠ ইনিংছ খেলে। তেওঁৰ অপৰাজিত ১২৭ৰানৰ সহায়ত ভাৰতে শক্তিশালী অষ্ট্ৰেলিয়াৰ বিৰুদ্ধে অভিলেখৰ সৃষ্টি কৰি ফাইনেলৰ পথ মুকলি কৰে। তেওঁৰ লগতে অধিনায়িকা হৰমনপ্রীত কৌৰৰ ৮৯ ৰানৰ সহায়ত ভাৰতে ৩৩৯ ৰানৰ বিশাল লক্ষ্য অতিক্রম কৰে। প্রতিযোগিতাত সাতখন মেচৰ ছখনত জয়ী হৈ ফাইনেলত উপনীত হোৱা দক্ষিণ আফ্রিকাই খিতাপ জয়ব বাবে ভাৰতক তীব্ৰ প্রত্যাহবান জনোৱাটো নিশ্চিত। ল'ৰা ৱ'লভার্ডৰ নেতৃত্বত দক্ষিণ আফ্রিকা দলটোৱে অনুশাসন আৰু আক্রমণাত্মক খেলৰ মাজত সন্তলন ৰক্ষা কৰি খেলি গৈছে। 

অলৰাউণ্ডৰ মেৰিজেন কেপ আৰু বেগী বলাৰ অয়াবংগা খাকাই গুৰুত্বপূর্ণ খেলত সুন্দৰ প্রদর্শন কৰিছে। দক্ষিণ আফ্রিকাই ছেমি ফাইনেলত ইংলেণ্ডক পৰাজিত কৰি ফাইনেলৰ পথ প্রশস্ত কৰে। আজি নয়ী মুম্বাইৰ বতৰ সামান্য গৰম আৰু আর্দ্র হোৱাৰ সম্ভাৱনা আছে। পুৱাৰ ভাগত বতৰ ডাৱৰীয়া হৈ থাকিব আৰু তাপমাত্রা ৩২ ডিগ্রী চেলছিয়াছ হ'ব পাৰে। দুপৰীয়া বতৰ ফৰকাল হ'ব আৰু গৰম ৩৯° চেলছিয়াছৰ সমান অনুভব কৰিব। আজি দুই-এজাক পাতলীয় বৰষুণ হ'ব পাৰে, কিন্তু ইয়াৰ ফলত খেলত বিশেষ বাধাৰ সৃষ্টি নহয় বুলি কোৱা হৈছে। আজি প্রথম অৱস্থাত উইকেটে বেগী বলাৰক সহায় কৰাৰ সম্ভাৱনা আছে। বিয়লিলৈ তাপমাত্রা হ্রাস পাই ২৫ ডিগ্রী চেলছিয়াছ হ'ব পাৰে আৰু বতৰ সেমেকা হৈ থাকিব পাৰে। মেচখনৰ দ্বিতীয় ইনিংছত কুঁৱলীয়ে গুৰুত্বপূর্ণ ভূমিকা পালন কৰিব পাৰে আৰু ইয়ালৈ চাই টছত জয়ী হোৱা দলে প্রথমে বেটিং নকৰাৰ সিদ্ধান্ত লোৱাৰ সম্ভাৱনা আছে। নিশাৰ ভাগত উইকেট সেমেকা হৈ থাকিব পাৰে আৰু তেনে অবস্থাত বলাৰৰ বাবে বল নিয়ন্ত্রণত ৰখাটো কঠিন হৈ পৰিব পাৰে। ফাইনেল বিয়লি ৩বজাৰ পৰা আৰম্ভ হ'ব।

Share This