যুদ্ধ বন্ধ কৰিবলৈ পুটিনক ধমকি ট্ৰাম্পৰ

dainik janambhumi July 16, 2025

ডিজিটেল ডেস্ক : ৫০ দিনৰ ভিতৰত ইউক্রেইন যুদ্ধ বন্ধ কৰিবলৈ ৰাছিয়াৰ ৰাষ্ট্ৰপতি ভ্লাডিমিৰ পুটিনক কঠোৰভাৱে সকীয়াই দিছে আমেৰিকাৰ ৰাষ্ট্ৰপতি ড'নাল্ড ট্রাম্পে। ইয়াৰ লগতে ট্রাম্পে পুটিনক এই বুলিও ভাবুকি দিয়ে যে যদিহে ৫০ দিনৰ ভিতৰত যুদ্ধ বন্ধ নকৰে তেতিয়া দেশখনৰ বিৰুদ্ধে আমেৰিকাই ১০০% শুল্ক আৰোপ কৰিব। ট্রাম্পে ৰাছিয়াৰ পৰা খাৰুৱা তেল ক্ৰয় কৰা দেশবোৰকো ইয়াৰ লগতে ভাবুকি দিয়ে।

আন এটা বাতৰি মতে আমেৰিকাই ৰাছিয়াত প্রত্যক্ষভাৱে আক্রমণ নকৰে যদিও ইউক্রেইনৰ সৈতে এক গোপন পৰিকল্পনা কৰিছে। সেই অনুসৰি মস্কো আৰু ছেইন্ট পিটাৰ্ছবার্গত ভয়াৱহ আক্রমণ কৰিবলৈ ট্রাম্পে ইউক্রেইনক বিধ্বংসী অস্ত্ৰৰ যোগান ধৰিব। ট্রাম্পে হোৱাইট হাউছত, নাটোৰ সচিব প্রধান তথা নেদাৰলেণ্ডৰ উপ-প্রধানমন্ত্রী মাৰ্ক ৰুটেৰ সৈতে কৰা আলোচনাৰ সময়ত ইউক্রেইনলৈ বৃহৎ পৰিমাণৰ অস্ত্র-শস্ত্ৰ প্ৰেৰণ কৰাৰ কথা ঘোষণা কৰে। ট্রাম্পে কয়, 'আমি ৰাছিয়াৰ কাৰ্যত অত্যন্ত অসন্তুষ্ট। যদি ৰাছিয়াই ৫০ দিনৰ ভিতৰত যুদ্ধ-বিৰতি চুক্তি নকৰে তেতিয়া তেওঁলোকৰ বিৰুদ্ধে বৃহৎ হাৰত শুল্ক আৰোপ কৰা হ'ব। এই শুল্কৰ হাৰ ১০০%ও হ'ব পাৰে।' ট্রাম্পে কয়, 'মই বিভিন্ন বিষয়ত বাণিজ্যক ব্যৱহাৰ কৰিছোঁ। কিন্তু যুদ্ধৰ সমাধানৰ বাবে ই আটাইতকৈ ভাল উপায়।'

ট্রাম্পে পুটিনক সমালোচনা কৰি কয়, 'তেওঁ (পুটিন) ভালেমান লোকক মূর্খ সজালে। তেওঁ বুশ্ব, ক্লিন্টন, ওবামা আৰু বাইডেনক মূর্খ সজালে।' ট্রাম্পে পুটিনক ভাবুকি দিয় কয়, 'পুটিনে নিজৰ আগ্রাসন অব্যাহত ৰাখিলে তেওঁ গুৰুতৰ পৰিণামৰ সন্মুখীন হ'ব। আপোনালোকে এটা কথা জানে যে এটা নিশ্চিত বিন্দুত শেষ মুহূর্তত আলোচনা নহয়, ব্যৱস্থা গ্ৰহণ কৰাহে হয়।' ট্রাম্পে লগতে এই কথা নিশ্চিত কৰে যে ৰাছিয়াৰ আক্ৰমণৰ পৰা ইউক্রেইনক বচোৱাত সহায় কৰিবৰ কাৰণে আমেৰিকাই দেশখনৰ পেট্রিয়ট এয়াৰ ডিফেন্স প্ৰণালীৰ যোগান ধৰিব। আনহাতে, যুদ্ধ-বিৰতিৰ বাবে আমেৰিকাৰ মধ্যস্থতাত হোৱা আলোচনা ব্যর্থ হোৱাৰ বাবে ট্রাম্পে হতাশা প্রকাশ কৰে।

ইফালে ৰুটেই কয় যে আমেৰিকাই নাটোৰ জৰিয়তে ইউক্রেইনলৈ অস্ত্র যোগান ধৰিব। উল্লেখযোগ্য যে কালি ট্রাম্পৰ বিশেষ দূত অৱসৰপ্ৰাপ্ত লেফটেনেন্ট জেনেৰেল কীথ কেলাঙে কীভত ইউক্রেইনৰ ৰাষ্ট্ৰপতি ভল'ডিমিৰ জেলেনস্কীৰ সৈতে আলোচনাত মিলিত হয়। তেওঁলোকে ইউক্রেইনৰ বায়ু প্ৰতিৰক্ষা শক্তিশালী কৰা, যুটীয়াভাৱে অস্ত্ৰ নিৰ্মাণ কৰা আৰু ইউৰোপীয় দেশৰ সৈতে মিলি আমেৰিকাৰ অস্ত্ৰ ক্ৰয় কৰাৰ বিষয়ে আলোচনা কৰে। ইয়াৰ লগতে ৰাছিয়াৰ বিৰুদ্ধে কঠোৰ আন্তঃৰাষ্ট্ৰীয় নিষেধাজ্ঞা আৰোপ কৰাৰ বিষয়েও আলোচনা কৰে।

Share This