তুৰস্কৰ এখন বিলাসী হোটেলত নিমিষতে ছাই হৈ গ'ল ৭৬ গৰাকী

Kakali Deka January 22, 2025

ডিজিটেল ডেস্ক: উত্তৰ-পশ্চিম তুৰস্কৰ এটা জনপ্ৰিয় স্কি ৰিজ'ৰ্টত থকা এখন ১২ মহলীয়া হোটেলত ভয়ংকৰ অগ্নিকাণ্ডৰ ঘটনা সংঘটিত হয় ।এই ঘটনাত কমেও ৭৬ জন লোকে প্ৰান হেৰুৱাবলগীয়া হয়।লগতে আহত হয় ৫১ জনকৈ লোক।হোটেলখন ধোঁৱাৰে আৱৰি থকাৰ ফলত অতিথিসকলে জুইৰ পৰা পলাই যোৱাৰ পথ বিচাৰি উলিওৱাটো কঠিন হৈ পৰিছিল।বিশাল ৰিজ’ৰ্টখনৰ দেৱালত কাঠৰ আৱৰণ আছিল। ফলত জুই দ্ৰুতগতিত বিয়পি পৰে।আনহাতে হোটেলখনত 238 গৰাকী পঞ্জীভুক্ত অতিথি আছিল ।

পুৱা ৩:২৭ বজাত জুই লগাৰ খবৰ পোৱাৰ পিছতেই অগ্নি নিৰ্বাপক বিভাগে পুৱা ৪:১৫ বজাত জুই নিৰ্বাপিত কৰিবলৈ আৰম্ভ কৰে। আনহাতে প্ৰত্যক্ষদৰ্শীৰ মতে, জুই লগাৰ সময়ত সেই ৰিজ’ৰ্টখনত বহুসংখ্যক অতিথি আছিল। প্ৰাণ বচাবলৈ বহুতেই খিৰিকীৰে বিছনা চাদৰ ওলমাই নমাৰ চেষ্টা কৰে।যাৰ ফলত ওপৰৰ পৰা তলত পৰি প্ৰাণ হেৰুৱায় কেইবাজনো লোকে।

চৰকাৰে এই অগ্নিকাণ্ডৰ তদন্তৰ নেতৃত্ব দিবলৈ ছয়জন বিচাৰকক নিযুক্তি দিছে । এই হোটেলখনৰ ৰেষ্টুৰেণ্ট শাখাত উক্ত ঘটনাৰ সূত্ৰপাত হোৱা বুলি সন্দেহ কৰা হৈছে । এই অগ্নিকাণ্ডৰ তদন্তৰ অংশ হিচাপে ইতিমধ্যে ৯ জন লোকক আটক কৰা হৈছে।ইফালে তুৰস্কৰ ৰাষ্ট্ৰপতি ৰিচেপ তায়িপ এৰ্দোগানে এই ঘটনাক লৈ ৰাষ্ট্ৰীয় শোকৰ দিন পালন কৰিব বুলি ঘোষণা কৰিছে । বিদেশত থকা চৰকাৰী ভৱন আৰু তুৰস্কৰ কূটনৈতিক মিছনৰ সকলো পতাকা অৰ্ধনমিত হৈ থাকিব বুলি কয় ৰাষ্ট্ৰপতিগৰাকীয়ে ।

উল্লেখযোগ্য যে ইস্তানবুলৰ পৰা প্ৰায় তিনিশ কিলোমিটাৰ আঁতৰৰ বলু প্ৰদেশৰ কৰগলু পৰ্বতৰ পাদদেশত অৱস্থিত কাৰতালকায়া চহৰখন স্কিসহ বিভিন্ন বৰফৰ ক্ৰীড়াৰ বাবে অতি জনপ্রিয় ঠাই ।সেইবাবে এই ৰিজ'ৰ্টত দেশ-বিদেশৰ হেজাৰ হেজাৰ পৰ্যটকৰ শীতকালত সমাগম ঘটে । এইদৰে বিদ্যালয়সমূহ দুসপ্তাহ ধৰি শীতকালীন বন্ধ আছিল।শীতকালীন শিক্ষানুষ্ঠান বন্ধৰ বাবে পৰ্যটকৰে ভৰি আছিল এই হোটেলখন ।

Share This