চিৰাঙৰ কাজলগাঁৱত দুদিনীয়া কৃষক মেলা ; জিলা কৃষি বিষয়াৰ কাৰ্যালয় ভৱন মুকলি

Kakali Deka March 07, 2025

ডিজিটেল ডেস্কঃ চিৰাং জিলাৰ সদৰ কাজলগাঁৱত বি টি চিৰ কৃষি বিভাগৰ দ্বাৰা নিৰ্মাণ কৰি উলিওৱা এছ অ' পি ডি আঁচনিৰ অধীনত এক কোটি টকা ব্যয় সাপেক্ষে নিৰ্মাণ কৰি উলিওৱা জিলা কৃষি বিষয়াৰ নৱ নিৰ্মিত কাৰ্যালয় গৃহৰ আজি শুভ উদ্বোধন কৰা হয় ৷ 

নৱ নিৰ্মিত কাৰ্যালয় গৃহৰ শুভ উদ্বোধন কৰে কোকৰাঝাৰ লোক সভা সমষ্টিৰ সাংসদ জয়ন্ত বসুমতাৰীয়ে ৷ এই অনুষ্ঠানত উপস্থিত থাকে চিৰাং জিলাৰ আয়ুক্ত যতীন বৰা, বি টি চিৰ কৃষি বিভাগৰ সঞ্চালক ফণীধৰ ব্ৰহ্মসহ অন্যান্য বিষয়াসকল ৷ 

আনহাতে জিলা কৃষি বিষয়াৰ কাৰ্যালয় চৌহদত  কৃষি প্ৰযুক্তি ব্যৱস্থাপনা অভিকৰণ (ATMA)ৰ অধীনত জিলা কৃষি বিষয়াৰ কাৰ্যালয়ে আয়োজন কৰিছে দু-দিনীয়া "কৃষক মেলা" ৷ আজি প্ৰদৰ্শনী মুকলি অনুষ্ঠানত উপস্থিত থাকি বি টি চিৰ সচিব অমৰজ্যোতি বৰ্মনে কৃষি মেলাখনৰ শুভাৰম্ভ কৰে ৷  জিলা কৃষি বিষয়া মুনীন্দ্ৰ নাৰায়ণ দাসে উদ্দেশ্য ব্যাখ্যা কৰা অনুষ্ঠানত কৃষি, মীন, ৰেচম আৰু পশু পালন আৰু পশু চিকিৎসা বিভাগৰ ১২ খন ষ্টল দিয়া হৈছে ৷ অনুষ্ঠানত বি টি চিৰ কৃষি বিভাগৰ সচিব অমৰ জ্যেতি বৰ্মন, সঞ্চালক ফণীধৰ ব্ৰহ্ম, চিৰাং কৃষি বিজ্ঞান কেন্দ্ৰৰ জ্যেষ্ঠ বিজ্ঞানী চন্দন ডেকা, বিজনী মহকুমা কৃষি বিষয়া উপানন্দ পাটোৱাৰীসহ ভালেমান কৃষকে অংশগ্ৰহণ কৰে ৷

 

উৎসঃ প্ৰাগ নিউজ ডিজিটেল

Share This