মৰ্মান্তিক! দুই বছৰীয়া কণমানিৰ জন্ম দিনটোতে জ্বলিল পিতৃৰ চিতা

Rashmi July 22, 2025

ডিজিটেল ডেস্কঃ মৃত্যু এক শিল্প । জীৱনৰ কঠিন শিলত কটা নিৰ্লোপ ভাস্কৰ্য । মৃত্যু কাৰ-কেতিয়া আহে সেয়া কোনেও নাজানে । কিন্তু সেই মৃত্যু যদি আকস্মিক হয়, সেই মৃত্যু যদি নিজ পত্নীৰ ভুলৰ বাবে হয়, সেই মৃত্যু যদি কণমানি সন্তানৰ জন্ম দিনৰ ফূৰ্তি-আনন্দৰ বিপৰীতে হয়, তেন্তে তাতোকৈ দুখজনক আৰু হৃদয়বিদাৰক আন একোৱেই হ'ব নোৱাৰে । 

ঠিক তেনে এক মৰ্মান্তিক আৰু হৃদয়বিদাৰক ঘটনা সংঘটিত হ'ল ধিঙত । পত্নীৰ মানসিক আৰু শাৰীৰিক অত্যাচাৰ সহ্য কৰিব নোৱাৰি দুই বছৰীয়া কণমানি সন্তানৰ জন্মদিনটোতে  আত্মহননৰ দৰে পথ বাছি ল'লে পিতৃয়ে । অভিযোগ অনুসৰি, তিনি বছৰ পূৰ্বে ধিঙৰ নাম ডুমডুমীয়াৰ দীপাংকৰ নাথৰ সৈতে বিবাহ পাশত আবদ্ধ হৈছিল ধিঙৰ বৰভেটি সোণাৰি গাঁৱৰ পৰিনীতা শইকীয়া । বিবাহৰ এসপ্তাহৰ পাছৰে পৰাই দুয়োৰে মাজত আৰম্ভ হৈছিল সাংসাৰিক অশান্তিৰ। তাৰ মাজতে দুয়োৰে জীৱনলৈ আগমন ঘটিল এটি কন্যা সন্তানৰ । কিন্তু দীপাংকৰ আৰু পৰিনীতাৰ সংসাৰত ঘূৰি অহা নাছিল শান্তি । বছৰটোৰ বেছিসংখ্যক দিনেই পিতৃ গৃহত থকা পৰিনীতাই প্ৰায়েই স্বামী দীপাংকৰক চলাই আহিছিল মানসিক আৰু শাৰীৰিক অত্যাচাৰ।

 তাৰ মাজতেই উলহ-মালহেৰে দুই বছৰীয়া কণমানি সন্তানৰ জন্মদিন পালনৰ বাবে সমগ্ৰ প্ৰস্তুতি প্ৰায় সম্পন্ন কৰি তুলিছিল পিতৃ দীপাংকৰে। কিন্তু কণমানিজনীক লৈ পিতৃগৃহত থকা পৰিনীতাই অমান্তি হৈছিল স্বামী গৃহত জন্ম দিন পালনৰ এই সিদ্ধান্ত । তাতেই দুয়োৰে মাজত ফ'নতে সৃষ্টি হৈছিল বিতৰ্কৰ । 

পত্নীৰ মানসিক অত্যাচাৰ সহিব নোৱাৰি মৰিগাঁৱৰ পৰা ধিঙলৈ আহি থকা পথতে ৰৈ বিহপান কৰে দীপাংকৰে । লগে লগে দীপাংকৰক ধিং এফ আৰ ইউত আৰু তাৰ পাছত নগাঁৱৰ এখন চিকিৎসালয়ত ভৰ্তি কৰোৱা হয় যদিও মৃত্যুক সাবটি লয় দীপাংকৰে । অৱশেষত কণমানি শিশুৰ জন্ম দিনটোতে জ্বলিল দীপাংকৰৰ চিতা। মৃত্যুৰ পাছতো দীপাংকৰক চাবলৈ এবাৰো নাহিল নিষ্ঠুৰ পত্নী।
 
ইয়াকে লৈ এতিয়া জাঙুৰ খাই উঠিছে ধিঙৰ নাম ডুমডুমীয়াৰ মহিলা সমাজ । পৰিনীতা শইকীয়াৰ মানসিক আৰু শাৰীৰিক অত্যাচাৰ সহ্য কৰিব নোৱাৰি দীপাংকৰে আত্মহননৰ কৰিছে বুলি গুৰুতৰ অভিযোগ পৰিয়ালৰ লোকৰ । স্থানীয় মহিলাসকলৰ অভিযোগ অনুসৰি এই সমগ্ৰ ঘটনাৰ বাবে জগৰীয়া কেৱল পৰিনীতা শইকীয়া। ইতিমধ্যে পৰিনীতা শইকীয়াৰ বিৰুদ্ধে ধিং আৰক্ষী থানাত এজাহাৰ দাখিল কৰিছে দীপাংকৰৰ পৰিয়ালৰ লোকে।


উৎস : প্ৰাগ নিউজ ডিজিটেল

Share This